“Unang Panan-awon,” Mga Hilisgotan ug mga Pangutana (2023)
Giya sa Pagtuon sa Ebanghelyo
Unang Panan-awon
Si Joseph Smith nakakita sa Dios nga Amahan ug ni Jesukristo
Daghang asoy sa kasulatan ang naghisgot bahin sa mga propeta nga nakig-istorya sa Dios (tan-awa sa Amos 3:7). Gitudlo sa Biblia nga nakig-istorya ang Dios kang Moises “nawong sa nawong” (Exodo 33:11). Ang mga propeta sa Basahon ni Mormon nakig-istorya o personal usab nga gibisita ni Jesukristo ug nakadawat og direksyon gikan Kaniya para sa ilang panahon (pananglitan, tan-awa sa 3 Nephi 11).
Human sa kamatayon ug Pagkabanhaw ni Jesus ug sa kamatayon sa Iyang mga Apostol, ang Simbahan ni Kristo nasagulan og sayop nga mga kausaban sa Iyang doktrina ug mga ordinasa. Sa daghang katuigan ang kalibotan anaa sa kahimtang nga espirituwal nga kangitngit tungod sa pagkawala sa presensya sa Simbahan ni Kristo. Sa tingpamulak sa 1820, nabalaka ang batan-ong si Joseph Smith sa kaayohan sa iyang kalag ug nagtinguha nga masayod hain nga simbahan ang iyang apilan. Miadto siya sa kakahoyan duol sa iyang balay ug nag-ampo sa Dios alang sa direksyon. Agig tubag sa iyang pag-ampo, mipakita kang Joseph ang Dios nga Amahan ug si Jesukristo. Sama kang Moises, direktang nakig-istorya si Joseph sa Dios. Kini nga hitabo, nailhan nga Unang Panan-awon, mao ang sinugdanan sa Pagpahiuli sa ebanghelyo ni Jesukristo sa atong panahon (tan-awa sa Joseph Smith—Kasaysayan 1:7–20).
Unsa Ang Unang Panan-awon?
Sa tingpamulak sa 1820, usa ka batan-on nga ginganlan og Joseph Smith nag-ampo sa kakahoyan duol sa iyang balay sa estado sa New York, USA. Agig tubag sa iyang pag-ampo, mipakita kaniya ang Dios nga Amahan ug si Jesukristo. Human niini nga pagpadayag, gitawag si Joseph Smith aron mahimong propeta sa Ginoo, ug dayon nagsugod ang Pagpahiuli sa ebanghelyo ni Jesukristo.
Katibuk-ang Pagpasabot sa hilisgotan: Unang Panan-awon
May kalabotan nga mga giya sa pagtuon sa ebanghelyo: Mga Propeta, Pagpahiuli sa Ebanghelyo, Personal nga Pagpadayag
Seksiyon 1
Makakat-on Ka sa Imong Kaugalingon Nga Nahitabo Gayod ang Unang Panan-awon
Ang katinuod sa pagpakita sa Dios nga Amahan ug sa Iyang Anak si Jesukristo ngadto sa batan-ong Joseph Smith usa ka importanteng bahin sa Pagpahiuli sa Simbahan ni Kristo. Gipamatud-an sa Unang Panan-awon ang kamatuoran nga nabuksan ang kalangitan ug ang Dios nakig-istorya pag-usab ngadto sa tawo.
Mahimo natong tun-an ang mga asoy ni Joseph Smith sa Unang Panan-awon. Pwede usab natong pangutan-on ang Dios kon nahitabo ba gayod ang Unang Panan-awon (Moroni 10:4–6). Samtang buhaton nato kining mga butanga, tudloan kita sa Espiritu Santo sa kamatuoran sa Unang Panan-awon (tan-awa sa Alma 5:45–46).”
Mga butang nga angayang hunahunaon
-
Si Presidente Gordon B. Hinckley mitudlo: “Ang atong katibuk-ang kusog nag-agad sa pagkatinuod sa maong panan-awon. Anaa ra kon nahitabo ba kadto o wala. Kon wala, nan kini nga buhat panglingla. Kon nahitabo kini, kini ang labing importante ug labing nindot nga nabuhat ilawom sa mga langit.” Sa unsang paagi ang pagkatinuod sa Unang Panan-awon nakaapektar sa imong kinabuhi? Kon wala pa ka makadawat og pagpamatuod sa pagkatinuod niini, unsaon nimo pagpaningkamot aron mahimo kini?
-
Samtang nagkat-on ka bahin sa Unang Panan-awon, makatabang tingali ang pagbasa sa nagkalain-laing asoy nga gihatag ni Joseph Smith sa maong hitabo. Anaa kini sa “Accounts of Joseph Smith’s First Vision” sa website sa Joseph Smith Papers. Ngano kaha nga si Joseph Smith mipili sa paghatag og gibug-aton sa lainlaing detalye sa piho nga mga asoy? Unsa ang bag-ong mga panabot bahin sa Unang Panan-awon ang imong nabatonan pinaagi sa pagtuon sa lainlaing mga asoy?
Kalihokan alang sa pagkat-on uban sa laing mga tawo
-
Tan-awa og dungan ang bidyo nga “Pangutan-a ang Dios: Ang Unang Panan-awon ni Joseph Smith” (6:35). Ipakigbahin ngadto sa mga sakop sa grupo nga gihimo kini nga bidyo gamit ang mga detalye gikan sa kada asoy ni Joseph Smith sa panan-awon. Unsay imong gibati samtang nagtan-aw niini nga paghulagway? Unsay imong nakat-onan nga wala nimo mahunahunai sa una? Dapita ang mga sakop sa grupo sa pagpakigbahin sa ilang mga impresyon ug mga ideya.
Pagkat-on pa og dugang
-
Isaias 29:13–14; Joel 2:28–29; Mga Taga-Efeso 1:10; 2 Nephi 3:6–15; Joseph Smith—Kasaysayan 1:23–26
-
“Ang Unang Panan-awon: Ang Amahan ug Anak Nagpakita ngadto ni Joseph Smith,” Mga Pagtulun-an sa mga Presidente sa Simbahan: Joseph Smith (2011), 31–42
-
“Ang Unang Panan-awon: Panaw ngadto sa Sagrado nga Kakahoyan,” Kasaysayan sa Simbahan, history.ChurchofJesusChrist.org
-
“The First Vision,” New Era, Aug. 2018, 44
Seksiyon 2
Ang Pagsabot sa Unang Panan-awon Makapalig-on sa Imong Pagpamatuod sa Gipahiuli nga Ebanghelyo ni Jesukristo
Agig dugang sa importanteng tahas sa Unang Panan-awon diha sa Pagpahiuli sa ebanghelyo ni Jesukristo, makakat-on usab kita og mahinungdanong mga kamatuoran sa ebanghelyo pinaagi sa pagtuon sa panan-awon ni Joseph Smith. Ang kinaiya sa Dios, ang panginahanglan nga ipahiuli ang Simbahan ni Kristo, ang katuyoan sa ebanghelyo, ug uban pang importanteng mga kamatuoran nga gipadayag niadtong panahona.
Giklaro sa pagpakita sa Dios nga Amahan ug ni Jesukristo ang mga kamatuoran bahin sa kinaiya sa Dios nga nawala sa daghang mga siglo. Usa sa labing importante niini mao nga ang Langitnong Amahan ug si Jesukristo duha ka managlahi nga mga binuhat nga dunay mga lawas nga parehas nato (tan-awa sa Joseph Smith—Kasaysayan 1:17; tan-awa usab sa Doktrina ug mga Pakigsaad 130:1, 22). Gitubag ni Jesukristo ang mga pangutana ni Joseph Smith bahin sa mga relihiyon sa iyang panahon ug giingnan si Joseph nga wala sa kalibotan ang tinuod nga Simbahan ni Jesukristo (tan-awa sa Joseph Smith—Kasaysayan 1:19–20). Ug gamit ang duha ka simpleng pulong, gitudloan sa Dios nga Amahan si Joseph og importanteng kahanas para niadtong nangita sa kamatuoran: Iyang gitudlo si Jesukristo ug misugo, “Paminawa Siya!” (Joseph Smith—Kasaysayan 1:17).
Mga butang nga angayang hunahunaon
-
Basaha ang pakigpulong ni Elder Dieter F. Uchtdorf nga “Ang mga Bunga sa Unang Panan-awon,” nga hatagan og pagtagad ang “mga bunga” nga iyang gihisgotan ug kon sa unsang paagi kini may kalabotan sa imong kinabuhi. Sa unsang paagi nakaimpluwensiya nimo ang Unang Panan-awon? Unsay kahulogan niini para nimo? Pwede nimong irekord ang imong mga gihunahuna diha sa imong journal.
-
Basaha ang “Usa ka Matinud-anon nga Pagpangita Nagantihan,” ni Elder Patricio M. Giuffra. Niini nga pakigpulong sa kinatibuk-ang komperensiya, gilista ni Elder Giuffra ang lima ka importanteng kamatuoran nga iyang nakat-onan sa leksiyon sa misyonaryo diin una niyang nadungog ang istorya sa Unang Panan-awon. Hain niini nga mga kamatuoran ang naay personal nga importansiya para nimo? Sa unsang paagi kini nga mga kamatuoran nakapalig-on sa imong pagpamatuod ug nakapanalangin sa imong kinabuhi?
Kalihokan alang sa pagkat-on kauban ang laing mga tawo
-
Bisan ang Unang Panan-awon usa ka milagrosong panghitabo, sinugdanan lang kini sa Pagpahiuli sa ebanghelyo. Daghan pang espirituwal nga panalangin ang misunod. Ikonsiderar kini nga kamatuoran samtang dungan ninyong basahon ang “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Samtang magbasa ka, hunong kadiyot aron hisgotan ang mga pagbisita sa anghel human sa Unang Panan-awon. Ngano kaha nga ang Pagpahiuli nagsugod sa usa ka panan-awon sa Langitnong Amahan ug ni Jesukristo? Sa unsang paagi giandam sa Unang Panan-awon kon unsay mahitabo sa umaabot?
-
Sa mga kamatuoran nga atong nakat-onan gikan sa Unang Panan-awon mao nga tubagon sa Dios ang Iyang mga anak kon duna silay problema. Tan-awa ang trailer sa The First Vision: A Joseph Smith Papers Podcast, diin gihisgotan sa tigsaysay sa Simbahan nga si Spencer W. McBride kini nga kamatuoran. Dayon dapita ang mga sakop sa grupo nga ipakigbahin ang ilang mga pagbati ug mga panabot.
Pagkat-on pa og dugang
-
Neil L. Andersen, “Lig-ona ang Inyong Pagtuo pinaagi sa Unang Panan-awon,” Liahona, Abr. 2020, 52–55
-
Adilson de Paula Parrella, “Mahinungdanong mga Kamatuoran—Nagkinahanglan sa Atong Paglihok,” Liahona, Nob. 2017, 115–16
Seksiyon 3
Ang Unang Panan-awon Makatudlo Nimo Kon Unsaon sa Pagkat-on Bahin sa Kamatuoran
Makakat-on ka gikan sa ehemplo ni Joseph Smith kon unsaon pagpangita sa kamatuoran. Gipahayag sa kasaysayan ni Joseph Smith nga gusto siyang mahibalo kon hain nga simbahan siya moapil. Nakapangutana siya niini samtang nagbasa siya sa Biblia, busa dihang iyang gibasa ang Santiago 1:5–6, kini nga mga pulong makahuloganon kaayo ngadto kaniya: “Ug kon aduna man kaninyoy nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayod, ug sa walay pagpamoyboy; ug kini igahatag kaniya. Apan papangayoa siya uban ang pagtuo sa wala gayoy pagduhaduha.”
Si Presidente Russell M. Nelson mitudlo: “Kon ang langitnong kasinatian ni Joseph Smith sa Sagrado nga Kakahoyan nakatudlo kanato og bisan unsa, kana mao nga ang mga langit abli ug nga ang Dios makigsulti sa Iyang mga anak.” Bisan kon ang mga tubag sa inyong mga pangutana dili moabot pinaagi sa usa ka panan-awon, makaseguro gihapon ka nga ang Dios maminaw ug motubag sa imong mga pag-ampo. Samtang makugihon kang naningkamot ug nagbaton ka og hugot nga pagtuo sa Dios, makaseguro ka nga—sama kang Joseph Smith—tumanon sa Dios ang Iyang mga saad.
Mga butang nga angayang hunahunaon
-
Samtang nagkat-on kita bahin sa ebanghelyo ni Jesukristo, tanan kita naay mga pangutana. Ang uban matubag dayon, samtang ang uban nanginahanglan og dakong paningkamot. Unsang mga pangutana ang naa ka bahin sa ebanghelyo, sa mga kasulatan, o sa mga pulong sa buhing mga propeta? Uban sa mga pangutana sa imong hunahuna, basaha ang 1 Nephi 15:6–11. Unsay imong nakat-onan niining mga bersikulo bahin kon sa unsang paagi madawat ang pagpadayag? Unsaon nimo pagpakita og hugot nga pagtuo kang Jesukristo samtang naghulat sa mga tubag nga imong gitinguha?
-
Basaha ang artikulo nga “Ang Unang Panan-awon: Usa ka Sundanan sa Personal nga Pagpadayag,” ni Presidente Henry B. Eyring. Unsay imong nakat-onan niini nga artikulo bahin sa pagpangandam aron makadawat og personal nga pagpadayag? Unsa ang ginagmay nga mga kausaban ang imong mahimo sa imong kinabuhi aron matabangan ka nga mas modawat sa mga pag-aghat sa Espiritu Santo?
Kalihokan alang sa pagkat-on kauban ang laing mga tawo
-
Basaha ang 1 Nephi 10:17–19 isip usa ka grupo. Unsay imong nakat-onan niining mga bersikulo bahin sa kaandam sa Dios nga tubagon ang atong mga pag-ampo? Unsa nga personal nga mga kasinatian ang imong naangkon tungod sa pagkadawat og personal nga pagpadayag? Dapita ang mga sakop sa grupo sa pagpakigbahin sa ilang mga ideya ug mga kasinatian kon angayan.
-
Dapita ang mga sakop sa grupo nga personal nga basahon o paminawon ang pakigpulong ni Presidente Nelson nga “Pagpadayag alang sa Simbahan, Pagpadayag alang sa Atong mga Kinabuhi.” Hangyoa sila nga mohatag og espesyal nga pagtagad sa iyang pagtulun-an bahin sa pagdawat og personal nga pagpadayag. Dayon magpundok isip usa ka grupo ug dapita ang kada tawo nga ipakigbahin kon unsay iyang nakat-onan. Nakamatikod ka ba og bisan unsang sumbanan sa unsay namatikdan sa mga sakop sa imong grupo nga matulun-anon? Unsay imong nakat-onan gikan kang Presidente Nelson ug sa imong grupo bahin sa kon sa unsang paagi nga mas makadawat ka og personal nga pagpadayag?
Pagkat-on pa og dugang
-
Jeffrey R. Holland, “Ang Mensahe, ang Kahulugan, ug ang Pundok sa Katawhan,” Liahona, Nob. 2019, 6–8
-
Richard J. Maynes, “Ang Unang Panan-awon: Yawi sa Kamatuoran,” Ensign, Hunyo 2017, 61–65
-
“Pag-ampo ug Personal nga Pagpadayag,” Mga Pagtulun-an sa mga Presidente sa Simbahan: Joseph Smith (2007), 125–34