“Sakramento,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Sakramento
Usa ka sagrado nga ordinansa aron mapaduol kita ngadto ni Jesukristo
Unsa ang kahulugan sa sakramento diha kanimo? Ang pag-apil niining sagrado nga ordinansa matag semana mahimong usa ka espirituhanong hitabo sa imong kinabuhi kon imong tinguhaon nga masabtan ang kahulogan niini. Sa wala pa ang Iyang Paglansang sa Krus, gipundok ni Jesus ang Iyang mga disipulo alang sa usa ka panihapon aron sa pagsaulog sa Pagpalabay. Nasayod Siya nga ang Iyang mortal nga kinabuhi hapit na matapos ug nga Iyang biyaan ang Iyang mga disipulo. Gusto Niya nga mahinumdoman nila ang Iyang mga pagtulun-an. Niana nga kahimtang, si Jesus mihatag og pan ug bino ngadto sa Iyang mga disipulo, mipasabot nga sila moambit sa paghinumdom sa Iyang lawas ug dugo.
Ang imong mga paningkamot sa pagtuon sa kahulogan ug katuyoan sa sakramento makatabang nimo nga mobati og lawom nga pasalamat sa tanan nga Iyang nabuhat alang kanimo.
Unsa Ang Sakramento?
Ang sakramento usa ka ordinansa sa pagkapari diin ang mga miyembro sa Simbahan moambit sa pan ug tubig kada semana agig paghinumdom sa maulaong sakripisyo ni Jesukristo. Ang gipikas-pikas nga pan usa ka pahinumdom sa Iyang lawas ug sa Iyang pisikal nga pag-antos. Ang tubig nagsimbolo sa dugo ni Jesus, miagas tungod sa grabeng kasakit. Kon kita takos nga moambit sa sakramento, atong gibag-o ang atong mga pakigsaad sa Ginoo, atong gihuptan ang kapasayloan sa atong mga sala, ug atong gipasalig pag-usab ang atong mga kaugalingon sa pagsunod ni Jesukristo.
Kinatibuk-ang pagpasabot sa hilisgotan: Sakramento
May kalabotan nga mga giya sa pagtuon sa ebanghelyo: Jesukristo, Mortal nga Pagpangalagad ni Jesukristo, Pag-ula ni Jesukristo, Mga Pakigsaad ug mga Ordinansa, Adlaw nga Igpapahulay
Seksiyon 1
Ang Sakramento Nagtabang Kanimo sa Paghinumdom ni Jesukristo
Sa adlaw human nga Siya milagrosong mipakaon sa 5,000, si Jesus nagsangyaw ug mitudlo nga “ang mokaon sa akong unod ug moinom sa akong dugo may kinabuhing walay kataposan ug banhawon ko siya sa kataposang adlaw” (Juan 6:54). Niadtong panahona, kini nga mga pulong lagmit nakapalibog sa Iyang mga disipulo. Hinoon, ang kahulogan niini sa kaulahian nahimong mas klaro sa dihang ang Ginoo mipaila sa sakramento ngadto sa Iyang mga disipulo atol sa Katapusang Panihapon.
Isip miyembro sa Ang Simbahan ni Jesukristo sa mga Santos sa Ulahing mga Adlaw, aduna kay responsibilidad sa pagtudlo sa ebanghelyo. Ang pag-ambit sa pan ug tubig makatabang nimo sa paghinumdom sa unod ug dugo ni Jesukristo, nga libre Niyang gihatag alang sa tanang anak sa Dios.
Mga butang nga angay hunahunaon
-
Basaha ang mga asoy sa kasulatan bahin ni Jesukristo nga nagpaila sa ordinansa sa sakramento ngadto sa Iyang mga disipulo sa Jerusalem (tan-awa sa Mateo 26:26–28; Marcos 14:22–24; Lucas 22:19–20) ug sa mga Nephita (tan-awa sa 3 Nephi 18:1–11). Unsay inyong nakat-onan gikan niini nga mga tudling mahitungod sa sakramento? Mahimong makatabang usab ang pagbasa sa mga asoy nga makit-an sa Hubad ni Joseph Smith, Mateo 26:22, 24–25 (sa Hubad ni Joseph Smith) ug Hubad ni Joseph Smith, Marcos 14:20–25 (sa Hubad ni Joseph Smith).
-
Basaha ang Moises 5:4–8. Sa karaang panahon, gisugo sa Dios ang Iyang mga anak sa paghalad og mananap nga sakripisyo sa pagkatandi, o pagkasama, sa sakripisyo ni Jesukristo—ang Kordero sa Dios. Sa unsang paagi ang sakramento nagsilbi og katuyoan karon sama sa mga sakripisyo sa panahon sa Daang Tugon? (Tan-awa usab sa Doktrina ug mga Pakigsaad 59:9–12.)
-
Ang Ginoo misulti ni Joseph Smith nga dili igsapayan kon unsa ang atong kan-on o imnon alang sa sakramento basta atong hinumdoman ang katuyoan sa pagbuhat sa ingon (tan-awa sa Doktrina ug mga Pakigsaad 27:1–2). Ikonsiderar kon nganong ang atong gigamit isip mga simbolo sa sakramento dili sama ka importante sa unsay nakatabang niadtong mga simbolo nga atong mahinumdoman.
Kalihokan alang sa pagkat-on uban sa laing tawo
-
Ikonsiderar ang pagtan-aw og dungan sa bidyo nga “Sacrament” (2:59) o “Always Remember Him” (5:27). Mahimo nimong hisgotan kon sa unsang paagi ang imong mga paningkamot sa paghinumdom ni Jesukristo ug sa Iyang maulaong sakripisyo makaimpluwensya sa imong mga pagbati ug mga aksyon. Unsay imong mahimo aron mas makapunting ngadto kang Jesukristo atol sa miting sa sakramento ug kon moambit sa sakramento?
Pagkat-on pa og dugang
-
Jeffrey R. Holland, “Tan-awa ang Kordero sa Dios,” Liahona, Mayo 2019, 44–46
Seksiyon 2
Ang Takos nga Pag-andam alang sa Sakramento Nagdala og mga Panalangin
Usahay makaplagan nimo ang imong kaugalingon nga naglingkod lang diha sa sakramento, nakalimot sa tinuoray nga pagdawat ug pagsinati niining sagrado nga ordinansa sigon sa tuyo sa Ginoo. Apan ang imong mga paningkamot sa pag-andam ug takos nga pag-ambit sa sakramento makapahimo nimong kwalipikado alang sa daghang mga panalangin.
Si Elder David A. Bednar mipasabot: “Ang ordinansa sa sakramento usa ka balaan ug binalik-balik nga pagdapit nga sinserong maghinulsol ug mabag-o sa espirituhanon. Ang pag-ambit sa sakramento, sa kaugalingon niini, dili makapasaylo sa mga sala. Apan kon tinuoray kitang mangandam ug moapil niining balaan nga ordinansa uban sa mapainubsanong kasingkasing ug mahinulsolong espiritu, nan ang saad nga kita kanunayng makabaton sa Espiritu sa Ginoo maanaa kanato. Ug pinaagi sa makabalaang gahom sa Espiritu Santo isip padayon natong kompanyon, kita kanunayng makabaton og kapasayloan sa atong mga sala. ”
Mga butang nga angay hunahunaon
-
Basaha ang 1 Mga Taga-Corinto 11:23–29. Unsa ang gipasabot sa usa ka tawo sa “pagsusi sa iyang kaugalingon” kon moambit sa sakramento? Nganong importante ang pagpangandam sa takos nga pagdawat sa sakramento?
-
Paminaw o basaha ang mga pulong sa himno sa sakramento, sama sa “Adunay Usa ka Labong nga Bungtod sa Layo” o “Sa Pagpaubos, Among Manluluwas.” Sa unsang paagi nga ang pagpamalandong sa mensahe nga makita sa himno sa sakramento makapalambo sa imong pasalamat alang sa ordinansa sa sakramento?
Kalihokan alang sa pagkat-on uban sa laing tawo
-
Basaha ang mga pag-ampo alang sa sakramento, nga makita sa doktrina ug mga Pakigsaad 20:75–79. Dapita ang pipila sa imong grupo sa pagpangita sa unsay atong gisaad sa dihang moambit kita sa sakramento samtang ang uban mangita sa unsay gisaad sa Ginoo nga buhaton isip balos. Mahimo usab nimong ipabasa sa grupo ang Doktrina ug mga Pakigsaad 20:37 ug hisgotan ang mga pagkaparehas tali sa mga saad nga gihimo atol sa sakramento ug sa pakigsaad sa bunyag.
Pagkat-on pa og dugang
-
Jeffrey R. Holland, “Tan-awa ang Kordero sa Dios,” Liahona, Mayo 2019, 44–46
-
Kevin W. Pearson, “Ikaw Andam Ba Gihapon?,” Liahona, Nob. 2022, 67–69
-
Peter F. Meurs, “Ang Sakramento Makatabang Kanato nga Mahimong Balaan,” Liahona, Nob. 2016, 85–87
Ubang mga Kapanguhaan mahitungod sa Sakramento
-
Mga kapanguhaan alang sa mga bata