Ang Sakrament Makatabang Kanato Nga Mahimong Balaan

Ni Elder Peter F. Meurs

Sa Seventy

Ikonsiderar ang lima ka mga paagi sa pagdugang sa epekto ug gahum sa atong regular nga pag-apil sa sagradong ordinansa sa sakrament.

Usa sa akong unang mga handumanan mao ang mga miting sa sakrament didto sa among panimalay sa Warrnambool, Australia. Mga 10 ngadto sa 15 ka mga tawo ang mitambong sa among branch, ug ang akong papa, nga usa sa tulo ka naghupot sa priesthood, regular nga dunay oportunidad sa pagpanalangin sa sakrament. Nahinumdom ko sa akong mga pagbati samtang mapaubsanon ug mabinantayon niyang gibasa ang mga pulong sa mga pag-ampo sa sakrament. Sa kasagaran magkurog ang iyang tingog samtang gibati niya ang Espiritu. Usahay kinahanglan siyang mohunong aron makontrolar ang iyang mga emosyon sa dili pa makompleto ang pag-ampo.

Isip usa ka singko anyos, wala ko kasabut sa hingpit nga kahulugan sa unsay gisulti o gibuhat; hinoon, nasayud ko nga dunay espesyal nga butang nga nahitabo. Mabati nako ang kalma ug mapasaligon nga impluwensya sa Espiritu Santo samtang namaIandong ang akong amahan sa gugma sa Manluluwas alang kanamo.

Ang Manluluwas nagtudlo: “Ug kini kamo mobuhat kanunay ngadto kanila kinsa naghinulsol ug nagpabunyag sa akong ngalan; ug kamo mobuhat niini agi og handumanan sa akong dugo, diin Ako mipaagas alang kaninyo, nga kamo unta makasaksi ngadto sa Amahan nga kamo sa kanunay mahinumdom kanako. Ug kon kamo sa kanunay mahinumdom kanako kamo makaangkon sa akong Espiritu uban kaninyo” (3 Nephi 18:11).

Gidapit ko kamo sa pagkonsiderar og lima ka mga paagi sa pagdugang sa epekto ug gahum sa atong regular nga pag-apil sa sagradong ordinansa sa sakrament, usa ka ordinansa nga makatabang kanato nga mahimong balaan.

1. Pangandam Daan

Makasugod kita sa atong pagpangandam alang sa sakrament sa dili pa magsugod ang sakrament miting. Ang Sabado mahimong usa ka maayong panahon sa pagpamalandong sa atong espirituhanong pag-uswag ug pagpangandam.

Ang mortalidad usa ka mahinungdanon nga gasa sa atong panaw aron mahimong sama sa atong Langitnong Amahan. Tungod sa panginahanglan, gilakip niini ang mga pagsulay ug mga hagit nga naghatag og mga opotunidad aron kita mausab ug molambo. Si Haring Benjamin nagtudlo nga “ang kinaiyanhon nga tawo mao ang usa ka kaaway sa Dios, … ug mahimo, hangtud sa kahangturan, gawas kon siya motugyan ngadto sa mga pagdani sa Balaang Espiritu, ug isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo” (Mosiah 3:19). Ang atong pag-apil sa ordinansa sa sakrament naghatag og oportunidad nga mas matugyan ang atong mga kasingkasing ug mga kalag ngadto sa Dios.

Sa atong pagpangandam, ang atong mga kasingkasing magmapaubsanon samtang mopahayag kita og pasalamat sa Pag-ula ni Kristo, maghinulsol sa atong kasaypanan ug mga kahuyang, ug mangayo og tabang sa Amahan sa atong padayon nga panaw aron mas mahimong sama Kaniya. Makapaaabut dayon kita sa oportunidad nga mahatag sa sakrament aron mahinumdom sa Iyang sakripisyo ug mabag-o ang atong pasalig ngadto sa tanang mga pakigsaad nga atong gihimo.

2. Sayo nga Moabut

Ang atong kasinatian sa sakrament mapalambo kon moabut kita sa wala pa ang miting ug mamalandong samtang gitukar ang prelude music.

Sayo nga moabut alang sa miting sa sakrament

Si Presidente Boyd K. Packer nagtudlo: “Ang prelude music, kon gitukar nga dunay balaanong pagtahud, makahatag og espirituhanong kalig-on. Nagdapit kini og inspirasyon.” “Dili kini usa ka panahon,” si Presidente Russell M. Nelson mipasabut, “alang sa panag-istoryahanay o pagpadala og mga mensahe apan usa ka panahon sa mainampuong pagpamalandong samtang ang mga lider ug mga miyembro espirituhanong nangandam alang sa sakrament.”

3. Kanta ug Pagkat-on gikan sa mga Pulong sa Himno sa Sakrament

Ang himno sa sakrament usa ka importante gayud nga bahin sa atong kasinatian sa sakrament. Ang musika mopalambo sa atong hunahuna ug mga pagbati. Ang himno sa sakrament dunay mas dako pa nga impluwensya kon mag-focus kita sa mga pulong ug sa gamhanang doktrina nga gitudlo. Daghan kita og makat-unan gikan sa mga pulong sama sa “Samdan, nasakitan, nag-antus alang kanato,” “Atong hinumduman ug siguruon nga ang atong mga kasingkasing ug mga kamot limpyo ug putli,” ug “Diin ang kaangayan, gugma, ug kalooy balaanong naghiusa!”

Pagkanta ug pagkat-on gikan sa mga hymno

Samtang manganta kita sa himno agig pagpangandam sa pag-ambit sa mga ilhanan sa sakrament, ang mga pulong mahimong kabahin sa atong pasalig sa pakigsaad. Ikonsiderar, sama pananglit, “Gihigugma ka namo, Ginoo; ang among mga kasingkasing napuno. Maglakaw kami sa gipili nimo nga dalan.”

4. Espirituhanong Moapil sa mga Pag-ampo sa Sakrament (Tan-awa sa Moroni 4–5)

Imbis mobaliwala sa pamilyar nga mga pulong sa mga pag-ampo sa sakrament, daghan kita og makat-unan ug mas mobati pa og dugang samtang espirituhanon kitang moapil pinaagi sa pagkonsiderar sa mga pasalig ug may kalabutan nga mga panalangin nga nalakip niining sagradong mga pag-ampo.

Ang pan ug tubig gipanalanginan ug gibalaan alang sa atong mga kalag. Nagpahinumdom kini kanato sa sakripisyo sa Manluluwas ug nga makatabang Siya kanato aron mahimong balaan.

Ang mga pag-ampo nagpasabut nga moambit kita sa pan agi og paghinumdom sa lawas sa Anak, nga Iyang gihatag isip bugti aron makwalipikado ang tanan alang sa pagkabanhaw, ug moinum kita sa tubig agi og paghinumdom sa dugo sa Anak, nga gawasnon Niyang gipaagas aron matubos kita sa kondisyon nga maghinulsol.

Ang mga pag-ampo mipaila sa mga pakigsaad uban sa mga pulong nga “Nga sila andam.” (Moroni 4:3). Kining mga pulong dunay dakong potensyal nga gahum alang kanato. Andam ba kita nga moserbiyo ug moapil? Andam ba kita nga mag-usab? Andam ba kita nga maningkamot nga mabuntog ang atong mga kahuyang? Andam ba kita nga motabang ug mopanalangin sa uban? Andam ba kita nga mosalig sa Manluluwas?

Samtang ang mga saad gipahayag ug samtang kita nag-ambit, atong gikumpirmar sa atong mga kasingkasing nga kita andam nga:

Modala diha sa atong mga kaugalingon sa pangalan ni Jesukristo.
Maningkamot nga motuman sa tanan Niyang mga sugo.
Kanunay nga mohinumdom Kaniya.

Ang pag-ampo gitapos pinaagi sa talagsaon nga pagdapit ug saad: “Nga sila unta sa kanunay makabaton sa iyang Espiritu uban kanila” (Moroni 4:3).

Si Pablo misulat, “Ang bunga sa Espiritu mao ang gugma, kalipay, kalinaw, pailub, pagkamapuanguron, pagkamaayo, pagkamatinumanon, kaaghop, [ug] pagpugong sa kaugalingon.” (Mga Taga-Galacia 5:22–23). Ang maanindot nga mga panalangin ug mga gasa ang maato kon tumanon nato ang atong mga pakigsaad.

5. Mamalandong ug Mohinumdumi Kaniya samtang Gipakigbahin ang mga Ilhanan sa Sakrament

Ang balaang mga gutlo samtang gipakigbahin sa mga naghupot sa priesthood ang sakrament mahimong sagrado ngari kanato.

Samtang gi-apud-apod ang pan, mahimong mamalandong kita nga sa kinatas-ang buhat sa gugma alang kanato, ang Manluluwas midala “diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan” (Alma 7:12).

Hinaut nga atong hinumduman ang mahimayaong panalangin sa Pagkabanhaw nga “modangat sa tanan, … ulipon ug gawasnon, lalaki ug babaye, dautan ug matarung; ug gani walay buhok sa ilang mga ulo nga mawala; apan ang matag butang ipahiuli ngadto sa iyang hingpit nga bayanan” (Alma 11:44).

Apan samtang gipakigbahin ang tubig, mahimo natong mahinumduman ang hangyo sa Ginoo:

“Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol; …

“Kansang pag-antus nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya” (D&P 19:16, 18).

Atong mahinumduman nga Siya midala “diha kaniya sa [atong] mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa [atong] mga kahuyang” (Alma 7:12).

Sa atong pagkonsiderar sa atong kasinatian sa sakrament, mahimo natong pangutan-on ang atong kaugalingon:

Unsay akong buhaton karong semanaha aron mas maandam alang sa sakrament?
Mas makatampo ba ko sa balaang pagtahud ug pagpadayag nga mahimong mag-uban sa pagsugod sa sakrament miting?
Unsa nga doktrina ang gitudlo diha sa himno sa sakrament?
Unsay akong nadungog ug gibati samtang naminaw ko sa mga pag-ampo sa sakrament?
Unsay akong gihunahuna samtang gipakigbahin ang sakrament?

Si Elder David A. Bednar nagtudlo: “Ang ordinansa sa sakrament usa ka balaan ug binalik-balik nga pagdapit nga sinserong maghinulsol ug mabag-o sa espirituhanon. Ang pag-ambit sa sakrament, sa kaugalingon niini, dili makapasaylo sa mga sala. Apan kon tinuoray kitang mangandam ug moapil niining balaan nga ordinansa uban sa mapainubsanong kasingkasing ug mahinulsulong espiritu, nan ang saad nga kita kanunayng makabaton sa Espiritu sa Ginoo maanaa kanato. Ug pinaagi sa makapabalaan nga gahum sa Espiritu Santo isip padayon natong kompanyon, kita kanunayng makabaton og kapasayloan sa atong mga sala.”

Ako mopamatuod sa daghang mga panalangin nga maato samtang palambuon nato ang atong pagpangandam ug espirituhanong pag-apil diha sa ordinansa sa sakrament. Ako mopamatuod og dugang nga kining mga panalangin maato tungod sa gugma sa atong Amahan sa Langit ug sa walay kinutuban nga maulaong sakripisyo sa Iyang Pinalanggang Anak, nga si Jesukristo. Sa Iyang sagradong pangalan, nga mao si Jesukristo, amen.