Librarya
Adlawng Igpapahulay

“Adlawng Igpapahulay,” Mga Hilisgotan ug mga Pangutana (2023)

Imahe
mga batan-ong babaye diha sa simbahan

Giya sa Pagtuon sa Ebanghelyo

Adlawng Igpapahulay

“Hinumdomi ang adlaw nga igpapahulay ug ilha kini nga balaan” (Exodo 20:8)

Unsay sagad nimong gihimo sa adlawng Igpapahulay? Dihang tinguhaon nimo nga tahoron ang Igpapahulay sa paagi sa Ginoo, imong masugdan ang pagtan-aw sa Igpapahulay isip usa ka kalipay (tan-awa sa Isaias 58:13–14). Ang pagsimba sa Dios diha sa Simbahan kauban ang laing mga tawo, pag-ambit sa sakramento, ug pagbalaan sa adlaw diha sa panimalay magdala og espirituwal nga gahom diha sa imong kinabuhi ug makapaduol nimo ngadto sa Dios. Ang paggahin og usa ka adlaw kada semana aron mopahulay sa trabaho ug kalingawan maoy usa ka paagi sa pagpakita sa atong gugma sa Dios ug sa atong tinguha nga sundon Siya ug tumanon ang atong mga pakigsaad. Si Presidente M. Russell Ballard mipasabot, “Ang gahom sa adlaw nga Igpapahulay mao ang pagsinati diha sa simbahan ug sa panimalay sa kahimuot, sa kalipay, ug sa kainit sa pagbati sa Espiritu sa Ginoo nga walay bisan unsa nga pagkabalda.”

Unsa Ang Adlawng Igpapahulay?

Ang Igpapahulay usa ka balaan nga adlaw nga gigahin sa Dios aron makapahulay kita sa atong mga trabaho ug makasimba Kanya. Human sa Paglalang sa kalibotan, gipanalanginan sa Dios ang ikapito nga adlaw ug gihimo kini nga sagrado (tan-awa sa Genesis 2:2–3). Gisugo sa Dios ang mga Israelinhon nga “hinumdomi ang adlaw nga igpapahulay ug ilha kini nga balaan” (Exodo 20:8). Human sa Pagkabanhaw ni Jesukristo, gisugdan sa Iyang mga disipulo ang pagtuman sa Igpapahulay kada Dominggo, o ang unang adlaw sa semana (tan-awa sa Marcos 16:2; Mga Buhat 20:7; 1 Mga Taga-Corinto 16:1–2). Sa ulahing mga adlaw, gibag-o sa Dios ang Iyang sugo nga tumanon ang adlawng Igpapahulay (tan-awa sa Doktrina ug mga Pakigsaad 59:9–13; 68:29).

Katibuk-ang pagpasabot sa hilisgotan: Adlawng Igpapahulay

May kalabotan nga mga giya sa pagtuon sa ebanghelyo: Simbaha ang Dios nga Amahan, Sakramento, Pagpuasa, Pagsunod sa Ebanghelyo ni Jesukristo

Seksiyon 1

Ang Imong Pagtuman sa Adlawng Igpapahulay Usa ka Timaan sa Imong Debosyon ngadto sa Dios

Imahe
kongregasyon

Si Presidente Russell M. Nelson miingon: “Unsaon nato sa pagbalaan ang adlaw nga Igpapahulay? Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan [tan-awa sa Exodo 31:13]. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay.” Unsang klase nga timaan ang gihatag sa Dios sa imong pagtuman sa adlawng Igpapahulay?

Mga butang nga angayang hunahunaon

  • Tan-awa ang bidyo gikan ni Elder Jeffrey R. Holland “Upon My Holy Day—Rest and Renewal” (1:26). Gidasig kita ni Elder Holland nga lahi ang himoon nga mga butang sa adlawng Igpapahulay kay sa ubang adlaw. Unsa nga mga impresyon ang imong nadawat bahin sa pagtahod sa adlawng Igpapahulay ug sa pagbalaan niini?

Kalihokan alang sa pagkat-on uban sa laing mga tawo

Pagkat-on pa og dugang

Seksiyon 2

Gipasidunggan ni Jesukristo ang Adlawng Igpapahulay

Imahe
Si Jesukristo nga nag-ayo og buta nga tawo

Sa panahon sa Bag-ong Tugon, ang dili awtorisado nga mga regulasyon ug mga tradisyon gipaila ngadto sa kultura sa mga Judeo bahin sa unsay himoon ug dili himoon sa adlawng Igpapahulay. Kasagaran tamayon si Jesus sa relihiyosong mga lider sa Iyang panahon kon giunsa Niya ug sa Iyang mga disipulo pagsunod sa Igpapahulay. Si Jesus mitudlo nga “ang adlaw nga igpapahulay gibuhat alang sa tawo” ug nga Siya usab ang “Ginoo sa igpapahulay” (Marcos 2:27, 28). Aron hinumdoman ang adlaw nga ang Ginoo nabanhaw, gituman sa mga disipulo ni Jesukristo ang Igpapahulay sa unang adlaw sa semana (tan-awa sa Marcos 16:2; Mga Buhat 20:7; 1 Mga Taga-Corinto 16:1–2).

Isip usa ka importante nga bahin sa atong pagtuman sa Igpapahulay, kita moambit sa sakramento agig paghinumdom sa maulaong sakripisyo, pagkamatay, ug Pagkabanhaw ni Kristo. Kon moambit kita sa sakramento, mihimo kita og pakigsaad sa pagdala diri kanato sa ngalan ni Jesukristo, sa pagsunod sa Iyang mga sugo, ug sa paghinumdom Kaniya kanunay. Agig balos, nagsaad ang Dios kanato nga kita makabaton sa Balaang Espiritu sa kanunay uban kanato. Ang pagbaton sa Espiritu naglakip sa pagkabalaan ug pagpasaylo sa atong mga sala. Nagpasabot usab kini sa kanunay nga pag-uban ug paggiya sa Espiritu Santo. Ang adlawng Igpapahulay usa ka kahigayonan sa pagpamalandong sa mga panalangin nga imong nadawat isip sumusunod ni Jesukristo.

Mga butang nga angayang hunahunaon

  • Basaha ang mosunod nga mga asoy sa Manluluwas nga nagtahod sa adlawng Igpapahulay: Juan 5:2–15; Lucas 13:11–17; 14:1–6. Sa unsang paagi ang mga tawo niini nga mga asoy napanalanginan pinaagi sa pag-alagad sa Manluluwas? Sa laing tudling, si Jesus miingon, “Busa uyon sa kasugoan ang pagbuhat og maayo sa adlaw nga igpapahulay” (Mateo 12:12). Unsa sa imong hunahuna ang gipasabot sa “pagbuhat og maayo” sa adlawng Igpapahulay?

    Unsaon nimo pagsunod ang ehemplo ni Jesus sa pagpangalagad sa uban sa adlawng Igpapahulay?

Kalihokan alang sa pagkat-on uban sa laing mga tawo

  • Isip usa ka grupo, tan-awa ang bidyo nga “Gratitude on the Sabbath Day” (3:39). Hisgoti ang mga paagi nga atong mapakita ang atong pagdayeg ug pagpasalamat kang Jesukristo sa adlawng Igpapahulay. Unsa ang koneksyon tali sa pagbalaan sa adlawng Igpapahulay ug sa pagbati og pasalamat para sa mga panalangin sa Dios?

Pagkat-on pa og dugang

Seksiyon 3

Pagbalaan sa Adlawng Igpapahulay Motabang Nato nga Magpabiling “Walay Buling Gikan sa Kalibotan”

Imahe
pamilya nga nagbasa

Ang Ginoo mitudlo, “Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalibotan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw” (Doktrina ug mga Pakigsaad 59:9). Ang atong pagsimba duyog sa uban sa adlawng Igpapahulay wala lang maglakip sa pag-ambit sa sakramento apan naglakip usab sa pag-ampo, pagkanta og mga himno, paghatag ug pagdawat og mga panalangin sa pagkapari, pagpaambit og mga pagpamatuod, pagtuon sa mga kasulatan, ug paghatag og serbisyo.

Mga butang nga angayang hunahunaon

  • Ang pag-apil sa miting sa sakramento usa ka makahuloganong paagi sa pagsentro sa imong kinabuhi kang Jesukristo ug pagdugang sa espirituhanon nga kalig-on. Kon lig-on kita sa espirituhanong paagi, mas andam kita nga molikay ug mobuntog sa tentasyon. Sa unsang paagi ang pagbalaan sa adlawng Igpapahulay ug pag-apil sa miting sa sakramento nakatabang sa imong mga paningkamot nga mahimong “walay buling gikan sa kalibotan”?

  • Rebyoha ang mensahe sa Ginoo bahin sa adlawng Igpapahulay nga makita sa Doktrina ug mga Pakigsaad 59:9–15. Bahin niini nga tudling, si Presidente M. Russell Ballard mipakigbahin, “Palihog timan-i ang pipila ka importanting mga pulong niini nga pagpadayag: hingpit nga kalipay paglipay pagpasalamat malipayong mga kasingkasing masadyaong kasingkasing, ug usa ka malipayong panagway. Kini ingon ngari kanako nga ang pagsunod sa Igpapahulay nga adlaw kinahanglang magdala og mga pahiyom sa atong mga nawong.” Kanus-a kamo nakasinati niini nga matang sa mga pagbati sa Igpapahulay? Unsay imong gibuhat aron himoong malipayon nga kasinatian ang imong pagsimba sa adlawng Igpapahulay?

Kalihokan alang sa pagkat-on uban sa laing mga tawo

  • Tan-awa ang bidyo nga “Is There a Place for Me?” (3:59). Hisgoti ang kaimportante sa pagtabang sa uban aron mobati nga sila nahisakop sa ilang kongregasyon sa simbahan. Sa unsang paagi ang imong mga paningkamot nga tabangan ang uban nga mobati nga nahisakop mopalambo sa imong pagbati sa pagsimba sa adlawng Igpapahulay?

Pagkat-on pa og dugang

Iprinta