Librarya
Aaronic nga Pagkapari

“Aaronic nga Pagkapari,” Mga Hilisgotan ug mga Pangutana (2023)

batan-ong lalaki nga nagpanalangin sa sakramento

Giya sa Pagtuon sa Ebanghelyo

Aaronic nga Pagkapari

Ang paghupot sa mga yawe sa ebanghelyo sa paghinulsol ug bunyag para sa kapasayloan sa mga sala

Sa Ang Simbahan ni Jesukristo sa mga Santos sa Ulahing mga Adlaw, ang mga sumusunod sa Dios naningkamot nga tabangan Siya sa buluhaton sa kaluwasan ug kahimayaan. Ang pagkapari, o ang walay kataposang gahom ug awtoridad sa Dios, gipahiuli sa yuta aron tabangan ang mga anak sa Dios nga makabalik ngadto Kaniya pinaagi sa paghimo ug pagtuman og sagrado nga mga pakigsaad uban Kaniya.

Giorganisar ang pagkapari sa duha ka bahin, ang kada usa dunay responsibilidad para sa importanteng mga bahin sa pagkinabuhi uyon sa ebanghelyo. Ang Aaronic nga Pagkapari mao ang “pagpangandam” o “mas ubos” nga pagkapari. Naghupot kini sa mga yawe sa pagpangalagad sa mga anghel, sa ebanghelyo sa paghinulsol, ug sa bunyag pinaagi sa pagtuslob para sa kapasayloan sa mga sala (tan-awa sa Doktrina ug mga Pakigsaad 13:1). Ang mga naghupot sa Aaronic nga Pagkapari nag-andam, nagpanalangin, ug nagpahigayon sa pan ug tubig sa sakramento. Nag-alagad usab sila sa temporal nga mga bahin sa Simbahan, sama sa pag-atiman sa mga miyembro niini ug pagpangolekta sa mga halad sa puasa.

Unsa Ang Aaronic nga Pagkapari?

Ang pagkapari mao ang walay kataposang gahom ug awtoridad sa Dios. Ang mga naghupot sa pagkapari nagtabang sa Dios sa pagpatuman sa kaluwasan ug kahimayaan sa Iyang mga anak pinaagi sa paghatag og balaanong mga pakigsaad ug mga ordinansa. Ang Aaronic nga Pagkapari mao ang sumpay sa mas taas nga Melchizedek nga Pagkapari (tan-awa sa Doktrina ug mga Pakigsaad 107:1, 6, 13–14). Sa Simbahan karon, ang takos nga mga miyembro nga mga lalaki mahimong modawat sa Aaronic nga Pagkapari pagsugod sa Enero sa tuig nga mag-12 anyos sila. Ang mga katungdanan sa Aaronic nga Pagkapari naglakip sa deacon, teacher, priest, ug bishop.

Katibuk-ang pagpasabot sa hilisgotan: Aaronic nga Pagkapari

May kalabotan nga mga giya sa pagtuon sa ebanghelyo: Pagpahiuli sa Pagkapari, Melchizedek nga Pagkapari, Mga Yawe sa Pagkapari

Seksiyon 1

Gipahiuli ni Juan Bautista ang Aaronic nga Pagkapari ngadto kang Joseph Smith ug Oliver Cowdery

Si Juan Bautista naghatag sa pagkapari kang Joseph Smith

Gikan sa panahon ni Adan ngadto kang Moises, ang mga propeta naghupot sa Melchizedek nga Pagkapari. Pero panahon sa pagpangalagad ni Moises, gibalibaran sa mga Israelinhon ang mga panalangin ni Jehovah ug kining mas taas nga pagkapari gibawi gikan sa kanatibuk-ang katawhan. Ang mga propeta padayong naghupot sa Melchizedek nga Pagkapari. Ang mga lalaki nga mga sakop sa tribo ni Levi, naglakip sa mga kaliwat ni Aaron, gihatagan og Aaronic nga Pagkapari. (Tan-awa sa Doktrina ug mga Pakigsaad 84:23–27).

Isip kaliwat ni Aaron ug kinamagulangang anak nga lalaki, gihuptan ni Juan Bautista ang Aaronic nga Pagkapari (tan-awa sa Doktrina ug mga Pakigsaad 68:16–18; 84:26–27). Human sa kamatayon ni Jesus ug sa Iyang mga Apostol, ang mga tawo naghimo og dili awtorisadong mga kausaban ngadto sa mga ordinansa sa pagkapari ug sa Simbahan. Tungod niini nga apostasya, ang Aaronic nga Pagkapari, apil ang mas taas nga pagkapari nga gihatag kang Pedro, Santiago, Juan, ug sa uban pang mga disipulo ni Kristo (Lucas 9:1–2), gikuha gikan sa yuta. Niadtong 1829, ang nabanhaw nga si Juan Bautista mipakita kang Joseph Smith ug Oliver Cowdery ug gihatag kanila ang Aaronic nga Pagkapari, gipahiuli pag-usab kini nga awtoridad sa yuta (tan-awa sa Doktrina ug mga Pakigsaad 13:1; 27:7–8; Joseph Smith—Kasaysayan 1:68–72).

Mga butang nga angayang hunahunaon

  • Ang kinabuhi ug pagpangalagad ni Juan Bautista mahimong usa ka tinubdan sa inspirasyon sa mga naghupot sa Aaronic nga Pagkapari karon. Basaha ang Mateo 11:7–13 (lakip ang Hubad ni Joseph Smith sa bersikulo 13, footnote a); Lucas 7:24–30; ug Juan 5:32–35. Unsay imong nakat-onan niini nga mga bersikulo bahin kon unsa ang gibati sa Manluluwas bahin kang Juan Bautista? Ngano kaha nga ingon niini nga paghulagway ni Jesus kang Juan? Unsaon pagsundog sa mga disipulo ni Jesukristo karon sa ehemplo ni Juan Bautista?

  • Sa iyang pakigpulong nga “The Aaronic Priesthood—a Gift from God,” mitudlo si Presidente Gordon B. Hinckley, “Responsibilidad kini [sa mga deacon, mga teacher, ug mga priest] nga bantayan ang Simbahan ug ang pagseguro nga walay pagpihigpihig ug dapiton ang tanan nga moduol kang Kristo.” Sa Simbahan karon, daghan sa mga naghupot sa Aaronic nga Pagkapari mga batan-ong mga lalaki. Sa unsang paagi kining kabatan-onan mituman sa makahuloganong paagi niining mga katungdanan diha sa ilang mga ward ug mga branch karon?

Kalihokan alang sa pagkat-on uban sa laing mga tawo

  • Ang asoy ni Oliver Cowdery sa pagpahiuli sa Aaronic nga Pagkapari nagdugang sa konteksto ug mga detalye sa atong pagsabot kon unsay nahitabo nianang adlawa. Basaha ang iyang asoy nga makit-an sa kataposan sa Joseph Smith—Kasaysayan. Dapita ang mga sakop sa grupo nga ipakigbahin kon hain sa mga detalye ang ilabihan ka makahuloganon para nila. Dayon dapita ang mga sakop sa grupo nga hunahunaon kon unsa kaha ang bation kon kauban nila ni Joseph ug Oliver niadtong adlawa. Ngano kaha nga importante kini nga panghitabo sa Pagpahiuli sa ebanghelyo?

Pagkat-on pa og dugang

Seksiyon 2

Ang Aaronic nga Pagkapari Naghatag og Importanteng mga Yawe ug Serbisyo

mga batan-ong lalaki nga nakig-istorya sa babaye

Ang Aaronic nga Pagkapari nailhan usahay og “mas ubos” nga pagkapari ug gipasabot sa kasulatan isip “usa ka sumpay sa” Melchizedek nga Pagkapari (Doktrina ug mga Pakigsaad 107:14). Pero ang Aaronic nga Pagkapari naghupot sa mahinungdanong gahom ug awtoridad sa paghatag og sagradong mga pakigsaad ug mga ordinansa nga gikinahanglan para sa kaluwasan ug kahimayaan.

Ang Aaronic nga Pagkapari naglakip sa mga yawe sa pagpangalagad sa mga anghel, sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala (tan-awa sa Doktrina ug mga Pakigsaad 13:1; 107:20).

Mga butang nga angayang hunahunaon

  • Giandam ni Juan Bautista ang dalan aron dawaton sa kalibotan si Jesukristo. Gitudlo niya ang ebanghelyo sa paghinulsol ug ang bunyag para sa kapasayloan sa mga sala, ug iya pa ganing gibunyagan ang Manluluwas (tan-awa sa Marcos 1:1–11; Juan 1:15–34). Ngano kaha nga kining mga baroganan ug mga ordinansa gikonsiderar nga importanteng pagpangandam alang sa pag-anhi ni Kristo? Sa unsang paagi ang paghinulsol ug bunyag nag-andam sa mga disipulo ni Kristo karon aron modawat og mga ordinansa sa templo ug aron mahimo ug matuman ang adunay kalambigitan nga mga pakigsaad?

  • Sa paghisgot sa mga naghupot sa Aaronic nga Pagkapari bahin sa Doktrina ug mga Pakigsaad 13, si Presidente Gordon B. Hinckley mitambag: “Awhagon ta mong ablihan ang Doktrina ug mga Pakigsaad … ug basahon kining mga pulonga ug sag-uloha kini. Kini ang patukoranan sa pagkapari. … Kini ang ebidensiya nga kini nga pagkapari maoy matuod ug bug-os sa tanang bahin.” Sa unsang paagi ang Doktrina ug mga Pakigsaad 13 motultol sa pagpokus ug mga aksyon sa batan-ong tighupot sa pagkapari? Sa unsang paagi ang pagsabot niini nga mga kamatuoran bahin sa Aaronic nga Pagkapari makatabang sa tanang miyembro sa Simbahan nga masabtan ang kaimportante sa mga ordinansa nga sama sa bunyag ug pag-ambit sa sakramento kada semana ug sa mga pakigsaad nga nalambigit niini?

Kalihokan alang sa pagkat-on uban sa laing mga tawo

  • Importanteng masabtan sa tanang miyembro sa Ang Simbahan ni Jesukristo sa mga Santos sa Ulahing mga Adlaw ang mga katungdanan ug mga panalangin sa Aaronic nga Pagkapari, pero daghang miyembro sa Simbahan ang wala makaamgo kon unsa ka importante ang mga ordinansa ug mga responsibilidad sa Aaronic nga Pagkapari. Pwedeng tun-an sa imong grupo ang `mga katungod ug mga responsibilidad sa Aaronic nga Pagkapari pinaagi sa pagtuon sa mosunod nga mga kapanguhaan, tagsa-tagsa man o sa ginagmayng grupo:

Sa dihang mabasa na sa mga sakop sa grupo ang mga pakisayran sa ibabaw, dapita sila nga ipakigbahin sa grupo kon unsay ilang nakat-onan.

Pagkat-on pa og dugang

Seksiyon 3

Ang Aaronic nga Pagkapari mao ang Pagpangandam sa Pagkapari

mga batan-ong lalaki diha sa klase

Sulod sa daghang henerasyon, giandam sa Aaronic nga Pagkapari ang mga anak sa Israel para sa mas taas nga balaod nga sa kataposan gihatag ni Jesukristo. Ang misyon ni Juan Bautista mao ang pag-andam sa kalibotan sa pag-anhi ni Kristo. Busa, ang Aaronic nga Pagkapari nailhan isip “ang pagpangandam nga pagkapari.” Gitudlo usab sa kasulatan nga ang Aaronic nga Pagkapari naghupot sa mga yawe sa pagpangandam nga ebanghelyo, nga naglakip sa paghinulsol ug bunyag para sa kapasayloan sa mga sala (tan-awa sa Doktrina ug mga Pakigsaad 84:26–27).

Karon, ang mga naghupot sa Aaronic nga Pagkapari motabang sa pag-andam sa kalibotan para sa Ikaduhang Pag-anhi ni Jesukristo. Tabangan nila ang katawhan nga maandam sa paghimo ug pagtuman sa mga pakigsaad ug sa pagdawat og mga ordinansa diha sa balay sa Ginoo pinaagi sa paghinulsol sa sala ug pagpabunyag. Ug ang paghupot sa Aaronic nga Pagkapari mag-andam usab sa mga sumusunod ni Jesukristo para sa tibuok kinabuhi nga pagserbisyo diha sa Melchizedek nga Pagkapari.

Mga butang nga angayang hunahunaon

  • Ang tema sa korum sa Aaronic nga Pagkapari makatabang sa matag batan-ong lalaki nga makasabot sa iyang balaan nga pagkatawo ug sa iyang katuyoan isip usa ka naghupot sa pagkapari. Basaha ang tema, nga naa sa Kinatibuk-ang Tamdanan nga Basahon, 10.1.2. Sa unsang paagi kini nga tema makapadasig sa mga batan-ong lalaki nga mohimo og hustong kapilian? Unsang mga bahin sa tema sa kurom sa Aaronic nga Pagkapari ang imong mas malangkit sa kaugalingon nimong pagkadisipulo?

  • Ang nadawat nga mga ordinansa ug mga pakigsaad pinaagi sa Aaronic nga Pagkapari nag-andam kanato para niadtong adunay kalambigitan sa Melchizedek nga Pagkapari. Sa unsang paagi ang paghinulsol, bunyag pinaagi sa pagpaunlod alang sa kapasayloan sa mga sala, sakramento, ug pagkinabuhi uyon sa may kalabotan nga mga pakigsaad nag-andam nimo para sa paghimo ug pagtuman sa mga pakigsaad ug pagdawat sa mga ordinansa sa balay sa Ginoo?

Kalihokan alang sa pagkat-on uban sa laing mga tawo

  • Ang Aaronic nga Pagkapari sa katibuk-an maoy importanteng bahin sa Ang Simbahan ni Jesukristo sa mga Santos sa Ulahing mga Adlaw, pero gipanalanginan usab niini ang kada indibidwal nga naghupot sa pagkapari. Tan-awa ang bidyo nga “Let Every Man Learn His Duty: Aaronic Priesthood” (3:34). Sa unsang paagi kaha ang paghupot sa pagkapari nakaimpluwensya sa mga desisyon niining mga batan-ong lalaki? Samtang naminaw ang imong grupo sa lainlaing batan-ong lalaki nga mipakigbahin kon unsay ipasabot sa gahom ug awtoridad sa pagkapari para nila, dapita ang mga sakop sa grupo nga ipakigbahin ang ilang mga impresyon ug mga ideya.

Pagkat-on pa og dugang

Mubo nga mga Sulat

  1. Gordon B. Hinckley, “The Aaronic Priesthood—a Gift from God,” Ensign, May 1988, 46.

  2. Gordon B. Hinckley, “The Priesthood of Aaron,” Ensign, Nov. 1982, 44.