Librarya
Pagpahiuli sa Pagkapari

“Pagpahiuli sa Pagkapari,” Mga Hilisgotan ug mga Pangutana (2023)

Imahe
pagpanalangin sa sakramento

Giya sa Pagtuon sa Ebanghelyo

Pagpahiuli sa Pagkapari

Gihatag sa Dios ang awtoridad sa pagbuhat diha sa Iyang ngalan

Hunahunaa kon unsa ka lahi ang imong kinabuhi kon wala pa gipahiuli sa Dios ang awtoridad sa pagkapari sa paghimo og mga pakigsaad, mga ordinansa, ug daghan pang balaanong mga gasa nga magamit nimo ug sa imong mga minahal. Usa ka importanteng bahin sa ebanghelyo ni Jesukristo mao ang mensahe nga tungod sa gugma sa Dios sa Iyang mga anak, gihatag Niya ang gahom ug awtoridad sa pagkapari sa Iyang mga sulugoon sa Simbahan. Ang pagkapari naglakip sa awtoridad nga isangyaw ang ebanghelyo ni Jesukristo ug paghimo sa buluhaton sa Dios sa kaluwasan ug kahimayaan. Minilyon karon ang napanalanginan sa sagradong mga pakigsaad, mga ordinansa, ug uban pang panalangin nga gihatag pinaagi sa awtoridad ug gahom sa pagkapari sa Dios.

Gipanalanginan sa pagkapari sa Dios ang Iyang mga anak sa tibuok kasaysayan sa kalibotan. Human mamatay ang mga Apostol ni Kristo sa panahon sa Bag-ong Tugon, ang awtoridad sa pagbuhat sa ngalan sa Dios nawala. Human ang daghang tuig, sa mga 1800, ang langitnong mga mensahero miabot ug mitugyan sa awtoridad ug sa mga yawe sa pagkapari ngadto kang Joseph Smith ug Oliver Cowdery. Kini nga pagpahiuli sa gahom sa Dios usa ka mahinungdanong bahin sa kinatibuk-ang Pagpahiuli sa ebanghelyo ni Jesukristo ug sa Iyang Simbahan. Ang awtoridad ug mga yawe sa pagkapari nagpabilin sa Simbahan karon.

Unsa Ang Pagpahiuli sa Pagkapari?

Ang pagkapari mao ang gahom ug awtoridad sa paglihok sa ngalan sa Dios. Kining balaang awtoridad nagtugot sa mga anak sa Dios nga modawat og mga ordinansa ug mga pakigsaad nga mahinungdanon alang sa kaluwasan ug kahimayaan. Ang maong pagkapari nawala human mamatay ang mga Apostol sa Ginoo sa panahon sa Bag-ong Tugon. Sa sayong bahin sa 1800, gipahiuli sa langitnong mga mensahero ang pagkapari dinhi sa yuta pinaagi sa pagtugyan niini kang Joseph Smith ug Oliver Cowdery.

Katibuk-ang pagpasabot sa hilisgotan: Pagpahiuli sa Pagkapari

May kalabotan nga mga giya sa pagtuon sa ebanghelyo: Pagpahiuli sa Ebanghelyo, Joseph Smith, Aaronic nga Pagkapari, Melchizedek nga Pagkapari, Mga Yawe sa Pagkapari, Mga Panalangin sa Pagkapari, Mga Pakigsaad ug mga Ordinansa

Seksiyon 1

Gipaambit sa Dios ang Gahom sa Iyang Pagkapari aron Panalanginan ang Iyang mga Anak

Imahe
mga tawo nga naglakaw padulong sa templo

Ang Dios mihatag og gahom sa pagkapari ngadto sa Iyang mga sulugoon sukad sa sinugdanan (tan-awa sa Moses 6:7). Ang karaang mga patriyarka nga sila si Adan, Noe, Abraham, Moises, ug dili maihap pa nga naghupot sa pagkapari alang sa katuyoan nga panalanginanan ang mga anak sa Dios. Pinaagi sa pagkapari, gitugotan sa Dios ang Iyang katawhan nga ipakigbahin ang mensahe sa ebanghelyo ug ipahigayon ang sagradong mga ordinansa isip kabahin sa ilang pagsimba. Sa matag higayon nga ang Dios magtawag og mga propeta, Siya mogiya kanila pinaagi sa balaan nga pagpadayag ug hatagan sila og gahom ug awtoridad sa pagkapari.

Karon, ang matag miyembro sa Ang Simbahan ni Jesukristo sa mga Santos sa Ulahing mga Adlaw adunay pribilehiyo sa pagdawat sa mga panalangin nga may kalabotan sa pagkapari sa Dios. Pinaagi sa pagkapari, makadawat kita og bunyag, kompirmasyon ug ang gasa sa Espiritu Santo, ang mga ordinansa sa templo, ug daghan pa. Pinaagi sa mga ordinansa sa pagkapari, “ang gahom sa pagka-diosnon gipakita” (Doktrina ug mga Pakigsaad 84:20), nga nag-andam nato nga mas mahisama sa atong Langitnong Amahan ug sa Iyang Anak, si Jesukristo.

Mga butang nga angayang hunahunaon

  • Ang paghimo ug pagtuman sa mga pakigsaad nga may kalabotan sa mga ordinansa sa pagkapari makamugna og importanteng espirituhanon nga koneksyon tali nimo ug sa Dios. Si Elder Dale G. Renlund mitudlo: “Ang pagtuman sa mga pakigsaad nga gihimo diha sa mga bunyaganan ug sa mga templo … makahatag usab kanato og kalig-on aron makasagubang sa mga pagsulay ug mga kasakit sa mortalidad. Ang doktrina nga may kalambigitan niining mga pakigsaad makapasayon sa atong dalan ug makahatag og paglaom, kahupay, ug kalinaw.” Unsay imong buhaton aron makahimo ug makatuman sa mga pakigsaad nga anaa nimo pinaagi sa pagkapari? Unsaon nimo pagsuporta sa uban ug pagtabang kanila nga makahimo og mga pakigsaad ngadto sa Dios?

Kalihokan alang sa pagkat-on uban sa laing mga tawo

  • Dapita ang mga sakop sa imong grupo sa pagbasa sa mosunod nga pahayag ni Presidente Russell M. Nelson:

    “Tungod kay ang Melchizedek nga Pagkapari gipahiuli, ang mga babaye ug mga lalaki nga nagtuman sa pakigsaad adunay kahigayonan sa ‘tanan nga espirituhanon nga mga panalangin sa simbahan’ [Doktrina ug mga Pakigsaad 107:18] o, ingnon ta, sa tanang espirituwal nga bahandi sa Ginoo alang sa Iyang mga anak.

    “Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios. Kadtong natugahan sa balay sa Ginoo nakadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon sa paggamit niana nga gahom.”

    Unsa ang pipila sa “espirituhanon nga mga bahandi” o mga panalangin ang imong nadawat pinaagi sa pagdawat sa mga oridnansa o paghimo ug pagtuman sa mga pakigsaad?

Pagkat-on pa og dugang

Seksiyon 2

Ang Nabanhaw nga si Juan Bautista Mipahiuli sa Aaronic nga Pagkapari ngadto nila ni Joseph Smith ug Oliver Cowdery

Imahe
Si Juan Bautista naghatag sa Aaronic nga pagkapari ngadto nila ni Joseph Smith ug Oliver Cowdery

Giandam sa Ginoo ang usa ka hapsay nga paagi sa pag-apud-apod sa awtoridad sa Iyang pagkapari. Dili makuha sa mga tawo kini nga awtoridad nga silasila ra (tan-awa sa Mga Hebreohanon 5:4). Kadto lamang naghupot sa pagkapari ang maka-orden sa uban, ug mahimo lang kini nila kon awtorisado sila niadtong naghupot sa mga yawe para sa maong ordinasyon (tan-awa sa Mga Artikulo sa Hugot nga Pagtuo 1:5).

Samtang naghubad sa Basahon ni Mormon, nakita ni Joseph Smith ug Oliver Cowdery ang mga tudling bahin sa bunyag. Adunay mga pangutana si Joseph ug Oliver bahin niini (tan-awa sa Joseph Smith—Kasaysayan 1:68) ug midesisyon nga pangutan-on ang Ginoo. Miadto sila sa kakahoyan aron mag-ampo, ug isip tubag sa ilang pag-ampo, mipakita kanila si Juan Bautista ug mihatag kanila og awtoridad sa pagkapari pinaagi sa pagpandong sa mga kamot (tan-awa sa Doktrina ug mga Pakigsaad 13). Gisugo niya sila nga bunyagan ang usag usa ug ordinahan ang usag usa sa pagkapari (tan-awa sa Joseph Smith—Kasaysayan 1:68–72).

Mga butang nga angayang hunahunaon

  • Ang batan-ong Joseph Smith adunay pangutana bahin sa relihiyosong mga pagtulun-an sa iyang panahon. Aron mangita og giya, midangop siya sa Dios sa pag-ampo ug gibisitahan siya sa Langitnong Amahan ug ni Jesukristo. Basaha ang Joseph Smith—Kasaysayan 1:17–20. Sa unsang paagi kini nga tudling nakatabang nimo nga mas masabtan kon nganong gikinahanglan ang pagpahiuli sa pagkapari?

Kalihokan alang sa pagkat-on uban sa laing mga tawo

  • Uban sa mga sakop sa imong grupo, tan-awa ang bidyo nga “Restoration of the Priesthood” (2:00), nga maminaw sa mga panalangin nga moabot sa atong mga kinabuhi tungod sa pagpahiuli sa Aaronic nga Pagkapari. Sa unsang paagi mas bug-os natong maangkon ang mga panalangin sa Aaronic nga Pagkapari sa atong mga kinabuhi?

Pagkat-on pa og dugang

Seksiyon 3

Ang Melchizedek nga Pagkapari Gipahiuli ngadto kang Joseph Smith ug Oliver Cowdery pinaagi sa Langitnong mga Mensahero nga sila si Pedro, Santiago, ug Juan

Imahe
Sila si Pedro, Santiago, ug Juan naghatag sa Melchizedek nga pagkapari ngadto ni Joseph Smith

Sulod sa usa ka bulan gikamn sa pagbisita ni Juan Bautista, mas daghan pang mga langitnong mensahero ang mipakita kang Joseph Smith ug Oliver Cowdery. Niining panahona, ang mga Apostol sa Bag-ong Tugon nga sila si Pedro, Santiago, ug Juan mitugyan kang Joseph ug Oliver sa Melchizedek nga Pagkapari ug sa mga yawe sa gingharian sa Dios (tan-awa sa Doktrina ug mga Pakigsaad 27:12–13; 128:20). Samtang ang Aaronic nga Pagkapari mihatag kang Joseph ug Oliver og awtoridad sa pagbunyag, ang Melchizedek nga Pagkapari mihatag nila og awtoridad sa pagdumala sa Simbahan ug sa pagpahigayon sa tanang gikinahanglan nga ordinansa aron makadawat og kaluwasan ug kahimayaan.

Sa wala madugay, si Joseph Smith ug ang ubang mga lider sa Simbahan gihatagan og dugang mga yawe sa pagkapari, o awtoridad sa pagdumala sa piho nga mga bahin sa Simbahan ug sa misyon niini. Sa Templo sa Kirtland, lain pang langitnong mga mensahero—Moises, Elias, ug Elijah—ang mitugyan sa mga yawe sa pagpundok sa Israel, ang dispensasyon sa ebanghelyo ni Abraham (nga naglakip sa pagpahiuli sa Abrahamic nga pakigsaad), ug ang mga yawe sa gahom sa pagselyo (tan-awa sa Doktrina ug mga Pakigsaad 110:11–16).

Mga butang nga angayang hunahunaon

  • Ang matag naghupot sa pagkapari makasubay sa iyang awtoridad balik ngadto sa sagradong panghitabo sa pagpahiuli sa pagkapari. Si Elder Jeffrey R. Holland mipasabot: “Kita dinhi sa gipahiuli nga Simbahan ni Jesukristo makasubay sa linya sa katungod sa priesthood [priesthood line of authority] nga gihuptan sa pinakabag-o nga deacon sa ward, sa bishop nga nangulo kaniya, ug sa propeta nga nangulo kanatong tanan. Kana nga linya masubay sa walay pagkaputol nga kadena ngadto sa mga anghel nga mianhi gikan sa Anak sa Dios Mismo, nga nagdala niining dili hitupngang gasa gikan sa langit.” Mahimong hangyoon ang linya sa awtoridad sa pagkapari sa usa ka tawo gikan sa punoang buhatan sa Simbahan.

Kalihokan alang sa pagkat-on uban sa laing mga tawo

  • Sa unsang paagi nabati nimo nga nausab ang imong kinabuhi human madawat ang ordinansa sa pagkapari? Samtang ikaw ug ang uban pa sa grupo magkonsiderar niini nga pangutana, basaha kini nga pahayag gikan sa Joseph Smith—Kasaysayan 1:74: “Ang among mga hunahuna nga karon nadan-agan, kami misugod sa pag-angkon sa salabutan sa mga kasulatan, ug ang tinuod nga kahulugan ug katuyoan sa ilang labaw nga kahibulongan nga mga pulong nga gipadayag ngari kanamo sa usa ka paagi nga kami dili gayod unta makakat-on, ni sukad makahunahuna.”

Pagkat-on pa og dugang

Uban pang mga Kapanguhaan bahin sa Pagpahiuli sa Pagkapari

Iprinta