Ang Importante nga Tahas sa Pagkapari diha sa Pagpahiuli

Ni Elder Gary E. Stevenson

Sa Korum sa Napulog Duha ka mga Apostoles

Kon wala mahibalik ang pagkapari dinhi sa yuta, ang Pagpahiuli dili unta mahitabo.

Pagka-Abril 1829, si Joseph Smith nagdawatan na og balaan nga mga pagbisita sa dul-an usa ka dekada. Ang Amahan ug Anak mipakita kaniya niadtong 1820 sa kakahoyan duol sa iyang panimalay sa dihang 14 anyos siya (tan-awa sa Joseph Smith–Kasaysayan 1:5–17).¹ Ang unang pagbisita ni anghel Moroni nahitabo niadtong 1823, nga gisundan og tinuig nga mga pagbisita diin gitudloan ug gigiyahan si Joseph hangtud niadtong 1827, sa dihang nadawat niya ang karaang rekord nga gisulat diha sa mga palid nga nahimong Basahon ni Mormon (tan-awa sa Joseph Smith–Kasaysayan 1:30–54).

Hinoon, sulod sa 18 ka bulan human makuha ang mga palid, naglisud si Joseph sa paghubad sa rekord tungod sa pagsamuk-samok sa mga lokal nga lumulupyo, pag-ilis og mga tigsulat, ug sa pagkawala sa usa ka bahin sa manuskrito. Usa kadto ka makapasagmuyo ug sakit nga panahon alang ni Joseph. (Tan-awa sa Joseph Smith—Kasaysayan 1:58–62; Doktrina ug mga Pakigsaad 3.)

Apan ang tanan nausab niadtong Abril 1829 sa pag-abut sa usa ka magtutudlo nga ginganlan og Oliver Cowdery, kinsa nahimong full-time nga tigsulat ni Joseph. Ang paghubad sa Basahon ni Mormon dali dayon nga mipaspas.

Human migahin og dakong bahin sa iyang panahon sa tinglarag sa 1828 sa pagtrabaho sa iyang umahan sa Harmony, Pennsylvania, aron makasangkap sa iyang pamilya, gibaling ni Joseph ang iyang hingpit nga pagtagad niadtong 1829 ngadto sa paghubad sa Basahon ni Mormon. Sulod sa mubo nga panahon, ang asawa ni Joseph, nga si Emma, ug ang iyang igsoong si Samuel mao ang nagsilbi nga mga tigsulat. Sa samang higayon, si Oliver Cowdery mipuyo sa panimalay sa mga ginikanan ni Joseph didto sa New York.

Pagkadungog mahitungod sa mga palid ug sa paghubad niini, si Oliver naintriga ug nagtinguha nga masayud kon mga butang ba kini sa Dios. “Usa ka gabii human siya miadto sa higdaanan nangamuyo siya sa Ginoo aron masayud kon tinuod ba kining mga butanga,” mirekord si Joseph, “ug ang Ginoo mipakita kaniya nga kini tinuod.”²

Si Oliver mibiyahe dayon sa 140 ka milya (225 km) ngadto sa Harmony aron makigkita kang Joseph. Si Oliver mao ang tubag sa mga pag-ampo ni Joseph. Duha ka adlaw human sila nagkita sa Abril, ang paghubad sa Basahon ni Mormon paspas nga mipadayon, nga hapit makompleto sa makahingangha nga 60 ngadto 65 ka gibana-bana nga mga adlaw sa pagtrabaho. Ang tibuok paghubad nakompleto pagka-Hunyo 30.

Si Propeta Joseph Smith naghunahuna tingali nga ang iyang tibuok buhat hapit na mahuman, kay nahimo na man niya ang iyang balaang sugo nga gihatag sa anghel nga mensahero sa paghubad ug pagmantala sa karaang rekord. Wala mahibalo ang Propeta nga wala siya nagkompleto apan hinoon nagsugod pa lang sa iyang mahinungdanong tahas diha sa Pagpahiuli sa ebanghelyo ni Jesukristo.

Pipila lang ka panghitabo sa kasaysayan ang matandi sa kaimportante sa unsay nahitabo sa tingpamulak sa 1829. Gihulagway ni Oliver kining talagsaong hugna sa Pagpahiuli isip “mga adlaw nga dili gayud makalimtan” (Joseph Smith—Kasaysayan 1:71, mubong sulat). Gawas sa milagro sa paghubad sa Basahon ni Mormon, ang mga anghel dayon mipakita ug mitugyan sa awtoridad sa pagkapari diha ni Joseph ug Oliver. Kining mapadayagong panahon sa paghubad ug pagpahiuli mipausab ug mipalapad sa panglantaw ni Joseph ug miandam alang sa pormal nga pag-organisar sa Simbahan paglabay sa usa ka tuig.

Pagpahiuli sa Aaronic nga Pagkapari

Samtang naghubad sa Basahon ni Mormon, si Joseph ug Oliver nakasugat og daghang mga tudling kalabut sa bunyag ug sa awtoridad. Gisultihan na si Joseph kaniadto nga “ang Ginoo [mo]hatag sa balaan nga pagkapari ngadto sa pipila ka tawo.”³ Pagka-Mayo 15, 1829, si Joseph ug Oliver miadto sa usa ka hilit nga lugar duol sa kakahoyan nga mga sugar maple “aron sa pagpangutana sa Ginoo, pinaagi sa pag-ampo, [sa] Iyang kabubut-on mahitungod kanako.”4

Samtang nag-ampo sila, ang tingog sa Manunubos namulong og kalinaw diha kanila “samtang ang tabil gibukas ug ang anghel sa Dios mikunsad nga gisul-uban uban sa himaya, ug gihatud ang gipaabut nga mensahe, ug ang mga yawe sa Ebanghelyo sa paghinulsol” (Joseph Smith—Kasaysayan 1:71, mubong sulat). Ang anghel mipaila sa iyang kaugalingon nga si Juan, “kadto gihapon nga gitawag og Juan Bautista sa Bag-ong Tugon, ug nga siya nagbuhat ubos sa panudlo ni Pedro, Santiago ug Juan” (Joseph Smith—Kasaysayan 1:72).

Si Joseph ug Oliver miluhod samtang ang nabanhaw nga si Juan mibutang sa iyang mga kamot diha sa ilang mga ulo ug mitugyan kanila sa Aaronic nga Pagkapari, “nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Joseph Smith—Kasaysayan 1:69; tan-awa usab sa Doktrina ug mga Pakigsaad 13:1). Gisaaran sila nga ang dugang nga awtoridad sa pagkapari itugyan diha kanila “sa angay nga panahon.” Si Joseph gitawag nga “unang Anciano sa Simbahan, ug siya (Oliver Cowdery) ang ikaduha” (Joseph Smith—Kasaysayan 1:72). Gisugo usab sila sa pagbunyag sa usag usa—si Joseph mouna sa pagbunyag ni Oliver ug dayon si Oliver mobunyag ni Joseph.

Atol nianang adlawa, ang duha “miadto sa tubig” sa daplin sa Suba sa Susquehanna aron magpabunyag. Sila “napugos sa pagtago sa mga hitabo nga may kalabutan sa pagdawat sa Pagkapari ug sa [ilang] pagbunyag, tungod sa espiritu sa pagpanggukod diin mipakita na diha sa mga kasilinganan” (Joseph Smith—Kasaysayan 1:74). Ang suba maoy nagsilbing nag-una nga agianan alang sa komersyo ug transportasyon atol sa mga baha sa tingpamulak, kanunay nga adunay lumalabay nga mga sakyanang pangtubig. Posible nga si Joseph ug Oliver mihulat sa pagsalop sa adlaw o mipahimulos sa taas nga tubig ug nakakita og mas hilit nga dapit diha sa bahaanan nga yuta.⁵

Human mobunyag sa usag usa, si Joseph mi-orden ni Oliver ngadto sa Aaronic nga Pagkapari. Si Oliver dayon mi-orden ni Joseph sama sa gisugo sa anghel kanila. Si Presidente Joseph Fielding Smith mitudlo nga gikinahanglan nga makumpirma pag-usab ang unang ordinasyon nga nadawat ubos sa mga kamot ni Juan Bautista human sa ilang mga bunyag aron “masilyo pag-usab kadto nga mga panalangin sa husto nga han-ay.”⁶

Joseph receiving the Melchizedek Priesthood

Pagpahiuli sa Melchizedek nga Pagkapari

Gamay ra ang atong detalye kalabut sa pagbisita ni Pedro, Santiago, ug Juan ngadto ni Joseph ug Oliver aron sa pagpahiuli sa Melchizedek nga Pagkapari. Ang lain-laing interpretasyon nga gibase sa mga istorya sa mga tawo human milabay ang katuigan mibutang sa panghitabo gikan sa tingpamulak sa 1829, tingali sa ulahing bahin sa Mayo o Hunyo, ngadto sa mas ulahi pa nga mga bulan.⁷ Wala gayud mabutangi og petsa ni Joseph ug Oliver ang pagpakita ni Pedro, Santiago, ug Juan, sama sa ilang gibuhat kang Juan Bautista ug sa pagpahiuli sa Aaronic nga Pagkapari. Wala pa tingali sila hingpit nga makasabut sa kinaiya sa pagkapari o sa mga dibisyon niini sa sinugdanan. Ang panabut ni Joseph sa pagkapari miabut sa anam-anam nga paagi.

Gikan sa 1830 hangtud sa 1835, giklaro ang mga katungdanan sa pagkapari, ug ang mga korum, mga konseho, mga kapangulohan, ug mga bishopric giporma. Bisan ang termino nga Melchizedek nga Pagkapari wala gamita isip ngalan alang sa “Halangdon nga Pagkapari” o “labaw nga pagkapari” (Doktrina ug mga Pakigsaad 107:9; 84:19) hangtud 1835 (tan-awa sa Doktrina ug mga Pakigsaad 107:2–4).

Mihatag si Joseph og yano nga mga detalye mahitungod sa dapit. Niadtong 1842, nahinumdom siya nga nakadungog sa “tingog ni Pedro, Santiago, ug Juan diha sa kamingawan taliwala sa Harmony … ug sa lungsod sa Colesville … sa suba sa Susquehanna, nagpahayag sa ilang kaugalingon ingon nga naghupot sa mga yawe sa gingharian” (Doktrina ug mga Pakigsaad 128:20).

Nagsugyot kini nga ang pagpahiuli sa Melchizedek nga Pagkapari nahitabo sa usa ka dapit subay sa 28 ka milya (45 km) nga seksyon sa dalan tali sa balay nga Smith sa Harmony, Pennsylvania, ug sa lungsod sa Colesville, New York, diin nagpuyo ang pamilya ni Joseph Knight. Ang pamilyang Knight mga unang miyembro sa Simbahan ug maunungong mga higala ni Joseph Smith. Mihatag sila og papel ug mga suplay atol sa paghubad sa Basahon ni Mormon ug sa wala madugay nagsilbing mahinungdanong parte sa Colesville Branch sa Simbahan.

Agig dugang sa pagdawat sa Melchizedek nga Pagkapari gikan ni Pedro, Santiago, ug Juan, si Joseph ug Oliver gi-orden nga “mahimo nga mga apostoles, ug talagsaon nga mga saksi” sa Ginoo (Doktrina ug mga Pakigsaad 27:12) ug nakadawat sa mga yawe nga gikinahanglan sa pagpahinabo sa dispensasyon sa kahingpitan sa panahon. Karon aduna na silay awtoridad sa pagpahigayon sa tanang mga ordinansa sa pagkapari, lakip sa pagtugyan sa gasa sa Espiritu Santo.

Nadawat usab nila ang “mga yawe sa tanan nga espirituhanon nga mga panalangin sa simbahan” (Doktrina ug mga Pakigsaad 107:18) nga importante sa pag-organisar sa Simbahan niadtong Abril 1830 ug nakadawat og pagpadayag nga ipahiuli ang tanang butang sa tukma nga pagkahan-ay niini. Ang espirituhanong mga panalangin gipakita pinaagi sa mga milagro, mga pagpang-ayo, ug mga ordinansa nga gipahigayon pinaagi sa awtoridad sa pagkapari. Niadtong 1836, ang dugang nga mga mensaherong anghel mitugyan sa mga yawe nga may kalabutan sa pagpundok sa Israel ug sa buhat sa templo (tan-awa sa Doktrina ug mga Pakigsaad 110).

Mga Implikasyon sa Pagpahiuli sa Pagkapari

Si Presidente David O. McKay (1873–1970) mitudlo nga ang labing talagsaong hiyas sa gipahiuli nga Simbahan sa Manluluwas mao ang “balaan nga awtoridad pinaagi sa direkta nga pagpadayag.”⁸ Kon wala mahibalik ang pagkapari dinhi sa yuta, ang Pagpahiuli dili unta mahitabo. Ang pagkapari nagtugot sa pagpahigayon sa mga ordinansa ug naghatag og estraktura sa pagdumala sa Simbahan sa Ginoo dinhi sa yuta.

Pormal nga giorganisar ni Joseph ang Simbahan niadtong Abril 6, 1830. Sa misunod nga pipila ka tuig, ang Unang Kapangulohan ug ang Korum sa Napulog Duha ka mga Apostoles naorganisar. Ubos sa direksyon sa Presidente sa Simbahan, ang mga yawe sa pagkapari gidelegar ngadto sa lokal nga mga lider sa tibuok kalibutan, nagtugot sa ebanghelyo nga “mokaylap ngadto sa mga kinatumyan sa yuta” (Doktrina ug mga Pakigsaad 65:2).

Ang pagpahiuli sa pagkapari usa ka mahinungdanon nga bahin sa balaang tawag ni Joseph Smith isip ang unang propeta niining dispensasyon. Sa pasiuna sa Doktrina ug mga Pakigsaad, ang Ginoo mipasabut, “Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17).

Sa wala pa ang pagbisita ni Juan Bautista sa Mayo 1829, gitutukan ni Joseph ang paghubad sa Basahon ni Mormon. Tungod sa pagpahiuli sa Aaronic ug Melchizedek nga Pagkapari, nakaamgo siya nga ang iyang tawag naglakip og mas daghan pa. Ang pagdawat og awtoridad gikan sa langit dugang nga miandam ni Joseph sa pagpas-an sa iyang mga responsibilidad isip “manalagna, maghuhubad, propeta, [ug] apostol ni Jesukristo” (Doktrina ug mga Pakigsaad 21:1).

Si Elder Robert D. Hales (1932–2017) sa Korum sa Napulog Duha ka mga Apostoles mihulagway kon sama sa unsa ang atong kinabuhi kon wala ang pagkapari: “Kon ang gahum sa pagkapari wala sa yuta, ang kaaway adunay kagawasan sa pagsuroy ug paghari nga walay pagpugong. Walay gasa sa Espiritu Santo nga mogiya ug molamdag kanato; walay mga propeta nga mamulong sa ngalan sa Ginoo; walay mga templo diin kita mohimo og sagrado, mahangturong mga pakigsaad; walay awtoridad sa pagpanalangin o pagbunyag, sa pag-ayo o paghupay. Kon wala ang gahum sa pagkapari, ‘ang tibuok yuta sa hingpit pagalaglagon’ (tan-awa sa Doktrina ug mga Pakigsaad 2:1–3). Walay kahayag, walay paglaum—kangitngit lang.”⁹

Ang pagdawat og mga ordinansa sa pagkapari mahinungdanon sa buhat sa Ginoo sa “pagpahinabo sa pagka-imortal ug sa kinabuhi nga dayon sa tawo” (Moises 1:39). Ang bunyag ug kumpirmasyon, ang tuga sa templo, ug ang pagsilyo alang sa karon ug sa kahangturan mahinungdanon sa atong kaluwasan. Ang abilidad sa pagbugkos ug pagsilyo og mga pamilya sa mga templo alang niadtong anaa sa duha ka habig sa tabil mahimo lamang pinaagi sa awtoridad ug mga yawe sa pagkapari sumala sa pagdumala sa Presidente sa Simbahan.

Ang Nagpadayon nga Pagpahiuli

Sa unsang paagi kaha nga ang awtoridad sa pagkapari makadasig sa imong pag-apil sa nagpadayon nga Pagpahiuli sa Simbahan? Tingali wala kita masayud kon unsay umaabut, apan klaro nga ang Pagpahiuli nagpadayon. Ang Ginoo wala mopadayag sa matag doktrina o ordinansa, o mohatag sa tanang instruksyon ngadto ni Joseph sa Sagradong Kakahoyan, pinaagi ni Moroni sa Cumorah, o sa miting sa pag-organisar sa Simbahan. Ang Pagpahiuli wala mapahigayon isip usa lang ka panghitabo. Hinoon, ang Ginoo mipadayag sa mga butang “pagtulun-an human sa usa ka pagtulun-an” (2 Nephi 28:30) ngadto ni Joseph sama nga Siya nagpadayon sa pagpadayag og mga butang ngadto sa Iyang mga propeta karon sumala sa Iyang mga katuyoan ug panahon.

Ang wala maputol nga linya sa mga propeta sukad sa panahon ni Joseph Smith namulong alang sa Ginoo ug padayon nga nagpahibalo sa Iyang kabubut-on. Ang mga propeta makakita sa mas lapad nga panglantaw ug makadawat og piho nga direksyon alang sa mga hagit sa ilang panahon. Si Presidente Russell M. Nelson namahayag nga kitang tanan “mga saksi sa proseso sa pagpahiuli. Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita. Daghan pa kaayo ang moabut.”¹⁰

Ang Pagpahiuli ug Ikaw

Hinaut nga ang matag usa kanato mahimong andam nga mga partisipante sa nagpadayon nga Pagpahiuli sa ebanghelyo pinaagi sa madasigong paghangup ug pagbuhat sa unsay gipadayag ngadto sa modernong mga propeta. Ang mga ehemplo naglakip sa pagsunod sa mas taas ug mas balaan nga balaod sa pagpangalagad sa atong kaigsoonan.¹¹ Ug hinaut nga ang matag usa kanato makakaplag og malungtarong kalipay sa ebanghelyo pinaagi sa nakasentro sa panimalay, gisuportahan sa Simbahan nga plano sa pagkat-on sa doktrina, paglig-on sa pagtuo, pagsunod sa mga sugo, ug pagpalambo og mas dakong personal nga pagsimba, lakip ang home evening nga makatubag sa mga panginahanglan sa indibidwal ug pamilya.¹²

Makaandam kita alang sa Ikaduhang Pag-anhi sa Manluluwas pinaagi sa pagpadali sa pagpundok sa Israel sa duha ka habig sa tabil.¹³ Pwede kitang mahimong mas maayo sa paghimo sa adlawng Igpapahulay nga kahimut-an diha sa atong mga tulumanon sa pagsimba sa Dominggo ug sa panimalay.¹⁴ Pwede kitang magpabiling mas napahiuyon ngadto sa Espiritu Santo pinaagi sa pagbuhat sa espirituhanong buhat nga gikinahanglan aron makadawat og personal nga pagpadayag kada adlaw.¹⁵

Mopamatuod ko nga ang kalangitan nagpabiling bukas ug adunay daghan pa kaayong moabut samtang ang Ginoo nag-andam kanato alang sa makahinam nga mga adlaw nga moabut. Ang pagpahiuli sa pagkapari nagtugot sa mga anak sa Dios sa pagpahigayon ug pagdawat sa makaluwas nga mga ordinansa, ug nagtugot kini sa modernong mga propeta, mga manalagna, ug mga tigpadayag sa paggiya sa gingharian sa Ginoo.

Ang dili maihap nga mga panalangin moabut sa Simbahan ug sa mga miyembro niini matag adlaw tungod sa pagkadaling magamit sa pagkapari sa Ginoo. Hinaut nga mopahayag kita sa atong pasalamat matag adlaw alang sa pagpakita ni Juan Bautista ug ni Pedro, Santiago, ug Juan ug alang sa pagbalik sa Aaronic ug Melchizedek nga Pagkapari niining katapusang dispensasyon agig pagpangandam sa pagbalik sa atong Ginoo ug Manluluwas, gani si Jesukristo.

MGA BACKGROUND GIKAN SA GETTY IMAGES