Espesyal nga mga Panginahanglan, Espesyal nga mga Leksyon
Mopaambit kami og pipila ka butang nga among nakat-unan gikan sa among kasinatian ni Dora, ang among anak nga babaye nga adunay espesyal nga mga panginahanglan, naglaum ug nag-ampo nga ang among mga hunahuna ug mga pulong mopanalangin og tawo kinsa nagsinati og susama nga mga pagsulay.
Mga litrato ni Dora gihatag sa pamilyang Pieper
Sa mga adlaw human sa gi-iskedyul nga pagkatawo sa among anak nga si Dora pinaagi sa Caesarean, nasayud kami nga adunay medyo lahi kaniya. Apan niadto lamang gidali siya pagdala sa ospital gikan sa check-up sa doktor paglabay sa tulo ka semana nga misugod kami sa pagsabut unsa ka makapausab sa kinabuhi nga panghitabo ang iyang pagkahimugso alang sa among pamilya.
Sa mga semana ug mga bulan nga misunod nagpuli-puli ang among gibati nga mga paglaum ug kahadlok samtang ang mapahinungurong mga propesyonal misulay sa paghiling sa kahimtang ni Dora. Ang matag bag-ong teyoriya nagdala og kaugalingon niining hugpong sa mga kabalaka.
“O palihug, dili kana. Dili namo kaya nga mawala siya,” mitubag kami sa usa ka posible nga diagnosis. “Kon mao kini, dili kami sigurado unsaon kini pag-atubang,” mitubag kami sa lain.
Ang diagnosis usa ka espada nga duhay suwab. Makahatag kini og kahupayan ug makatabang sa pagsabut kon sama sa unsa ang umaabut, apan makamugna usab kini og mga ekspektasyon o mohulagway og mga limitasyon nga tingali dili gani tinuod. Sa among sitwasyon, mapasalamaton kami nga human sa tanang teyoriya ug mga pagsusi, ang mga doktor wala gayud makahimo og piho nga diagnosis alang ni Dora.
“Normal ra siya og panglawas sa tanang aspeto,” misulti sila kanamo, “apan nag-antus siya og ubos nga kondisyon sa kaunoran ug mga pagkirig.”
Nagpuyo kami sa milabay nga 28 ka tuig uban niana nga pamahayag—ang mga kawalay kasiguroan niini, ang naglahi-lahi nga mga kahimtang niini, ang mga hagit niini, ug ang kalipay ug mga posibilidad niini. Wala kami masayud kon sama sa unsa ang umaabut, apan wala gayud kami mobati nga nalimitahan sa usa ka piho nga medikal nga diagnosis.
Paghulagway sa Tawo nga adunay Espesyal nga mga Panginahanglan
Ang pipila sa kanunay nga mga pangutana nga among nadawat paglabay sa katuigan kalabut ni Dora mao ang “Unsa ang iyang sakit?” ug “Unsa ang iyang kakulian?” Kasagaran motubag kami pinaagi sa pagsulti og sama sa, “Kanang, dili siya mosulti, molakaw nga walay tabang, o mokaon o mag-ilis nga siya ra, apan labaw pa kaayo siya kay niana.”
Nakakat-on kami nga dili siya ihulagway pinaagi sa mga dili niya mabuhat o sa iyang mga limitasyon. Hinoon, ganahan kaming mohulagway niya pinaagi sa iyang mga abilidad.
Sama pananglit, si Dora makapahiyom. Ang iyang pahiyom makahimo niadtong naglibut kaniya sa pagpahiyom. Ang hingpit nga mga estranghero mipahunong namo sa airport aron mohangyo kon mahimo ba silang magpalitrato uban ni Dora tungod kay nadani sila sa kahayag sa iyang malipayong pahiyom.
Makahatag siya og mga gakos. Kon swertehon ka nga makakuha og gakos gikan ni Dora, makapausab kini sa imong kinabuhi. Kausa, sa dihang nanggawas kami gikan sa usa ka kalihokan sa sport, si Dora nakaagi og tawo nga walay pinuy-anan sa daplin sa dalan ug diha-diha miduol ug migakos kaniya. Klaro sa iyang panagway nga ang gakos ni Dora maoy usa sa labing talagsaong butang nga iyang nasinati nianang adlawa.
Si Dora makatabang nimo nga mobati nga gimahal. Kon si Dora makatutok kanimo, bisan sa usa lang ka gutlo, mobati ka og gugma ug katam-is nga makapahimo sa mga luha nga molugmaw sa imong mga mata. Tungod niadtong talagsaon nga mga gasa, nganong mohulagway man kami niya isip “adunay kakulian” o “baldado”? Nakaimpluwensya siya og gatusan ka kinabuhi alang sa maayo pinaagi lamang sa pagkahimong siya ug sa pagbuhat sa unsay iyang gibuhat.
Anam-anam Matag Adlaw
Sayon ra sa mga ginikanan nga mobati nga mabug-atan sa dihang ilang maamguhan nga ang ilang anak magsalig kanila sa tibuok kinabuhi. Ang pagbati nga nabug-atan mas kusog kon ang bata nagkinahanglan og makanunayong suporta sa pisikal, emosyonal, ug tingali sa medikal. Ang posibilidad sa pagpakaon, pag-ilis og sinina, pagligo, pag-atiman, ug pagsuporta og usa ka bata matag adlaw mahimong makita isip bukid nga taas kaayo ug tungason kaayo nga katkaton.
Niadto nga mga higayon, importante nga mohunong kadali ug moingon, “Kinahanglan lamang nga buhaton ko kini karong adlawa.” Among nakaplagan nga pinaagi sa pagtutok lamang sa mga panginahanglan ug mga oportunidad sa matag adlaw, ang buluhaton daw mas daling madumala. Magpakabuhi kita usa lang ka adlaw matag higayon, ug mahimo kitang mangita sa kalipay ug kalamboan nga moabut uban nianang adlawa.
Makahimo sa Paglambo
Ang matag espiritu nga gipadala sa yuta makahimo sa “[pag]lambo.”1 Kitang tanan gilauman nga mogamit sa atong kabubut-on kutob sa atong mahimo. Kita nga mga tig-atiman maoy responsable sa pagtabang niadtong atong giatiman nga motubo ug molambo sa pisikal, emosyonal, ug espiritwal nga paagi kutob sa ilang mahimo. Mahimong nagpasabut kana sa pagtabang kanila nga makaangkon og mga oportunidad sa pagserbisyo—sama ni Dora nga nanghatag og mga gakos o mga pahiyom. Mahimong nagpasabut usab kana sa pagtabang nila sa paggamit ug, kon mahimo, pagpalambo sa ilang pisikal ug mental nga mga kapasidad pinaagi sa pagpatambal ug kalihokan.
Sa pagbuhat niini, kinahanglan kita nga nakabase sa reyalidad. Kon kanunay kita nga nasagmuyo, tingali paspas ug sobra ra ang atong gibuhat. Ang Ginoo makatabang nato ug mogiya nato pinaagi sa Iyang Espiritu sa pagbuhat niadto nga mga butang nga posible ug tukma. Sa ubang sitwasyon, mohatag Siya kanato og mga milagro, bisan kon daw gagmay ra.
Kanunay namong mahinumduman nga gisultihan sa usa ka nag-una nga orthopedic specialist nga si Dora dili gayud makalakaw. Apan human sa pipila ka tuig sa hilabihang pag-ampo ug pagkugi og maayo, si Dora karon makalakaw na uban sa tabang. Ang iyang kinatibuk-ang kahimtang wala mausab, apan ang Ginoo mihatag kanamo og gamay nga milagro aron sa pagtabang kaniya nga molambo ug makakaplag og dugang kalipay sa kinabuhi.
Pagtuo nga Dili Mamaayo
Natural lamang nga mangutana og ngano? kon ang usa ka bililhon, naglisud nga anak sa Dios ipadala ngadto sa atong panimalay. Ang atong pagtuo natural lang nga moduso kanato sa paghangyo sa Dios kon mahimo ba nga maayo o matangtang ang kahimtang sa bata. Aduna kami pihong pagtuo nga ang Dios makahimo sa pag-ayo sa among anak, apan giklaro usab Niya nga dili Iyang kabubut-on ang pagbuhat niini karon.
Ang Langitnong Amahan adunay Iyang kaugalingong katuyoan sa pagpadala ni Dora kanamo, ug Siya moayo kaniya—kon ug sa dihang buot Niya nga mohimo niini. Kanang adlawa tingali dili moabut hangtud sa panahon sa hingpit nga pagkaayo—sa Pagkabanhaw. Nagkinahanglan og samang pagtuo ang pagdawat sa kabubut-on sa Dios nga kining bililhon nga mga bata dili mamaayo karon ingon man sa pagtuo nga Siya makaayo kanila karon. Si Dora gipadala kanamo nga adunay katuyoan, ug mibati kami nga napahimangnoan nga dili magtinguha sa ngano apan mangutana sa Langitnong Amahan unsa ang gusto Niya nga among makat-unan.
“Ang pagpangutana, Nganong kinahanglan nga mahitabo kini kanako? Nganong kinahanglang mag-antus ako niini, karon? Unsay akong nabuhat nga nakaingon niini? mosangput sa imong dili pagkasabut,” miingon si Elder Richard G. Scott (1928–2015) sa Korum sa Napulog Duha ka mga Apostoles. Hinoon, miingon siya, “Pangutana, Unsa man ang akong buhaton? Unsa ang angay nakong makat-unan gikan niini nga kasinatian? … Kon mag-ampo kamo uban sa tinuod nga konbiksyon nga, ‘Palihug ipahibalo kanako ang Imong kabubut-on’ ug ‘Unta ang Imong kabubut-on maoy matuman,’ anaa kamo sa kinalig-unang dapit aron makadawat sa kinadak-ang tabang gikan sa inyong mapinanggaon nga Amahan.”2
Usahay maghunahuna kita sa mga ginikanan niadtong mga bata nga giayo sa Manluluwas panahon sa Iyang mortal nga pangalagad. Tingali, sama kanato, kadto nga mga ginikanan naghunahuna kon unsa ang katuyoan nga ang ilang mga anak gipadala nganha kanila. Human ang Manluluwas miayo kanila, ang mga ginikanan makasabut nga imposible unta alang Kaniya ang pagpakita sa Iyang makaayo nga gahum ug pagkabalaan kon walay tawo nga ayuhon. Aduna kami pagtuo nga ang usa ka panahon sa pagkaayo moabut sa tanang anak sa Dios.3
Naghandum kami ngadto niana nga adlaw.