Digital Lamang: Mga Young Adult
Ang Pagka-Single Nagpahinumdom Kanako nga Mosalig sa Tibuok Plano sa Dios alang Kanako
Nakaplagan nako ang hingpit nga kalipay dihang sa katapusan mibuhi ako ug misalig sa tibuok plano sa Langitnong Amahan.
Sa dihang 30 anyos ko, ang akong higala adunay mga gipangutana nako nga nakapausab sa akong kinabuhi. Nangutana siya, “Kon anaa nimo ang tanang kwarta sa kalibutan, unsay imong buhaton?” Mihatag ako og yano nga mga tubag, sama sa pagpalit og balay, pag-atiman sa akong pamilya, mahimong mobarug sa akong kaugalingon, ug uban pa.
Dayon nangutana siya og mas lawom, “Unsa kaha kon anaa nimo kadtong tanan nga mga butang ug tanang kwarta sa kalibutan, dayon unsa man ang imong buhaton?” Diha nako naamgohan nga bisan unsa pa ang akong kahimtang sa kaminyoon, ako adunay daghang mahatag ngadto sa kalibutan. Naghunahuna ko mahitungod sa mga butang nga akong makat-unan ug mapaambit ug sa kalainan ug impluwensya nga mahimo nako.
Pag-usab sa Akong Pokus
Ang akong damgo isip usa ka young adult mao ang pagpangita og kapikas ug magminyo sa templo ug magsugod og pamilya. Naghunahuna ko nga kini ra ang akong katuyoan. Mao nga sa dihang wala kini mahitabo, ako naghunahuna, “Kon ang magminyo mao ang labing importanting butang sa kinabuhi, nan nganong wala man ko niana nga oportunidad?”
Human akong higala nangutana nako niadto nga mga pangutana, sa katapusan akong nasabtan kon unsa ang tinuod nga katuyoan sa kinabuhi. Nagtuo gihapon ko nga ang magminyo ug magbaton og mga anak mao ang sentro sa mahangturong plano sa Langitnong Amahan alang sa matag usa kanato, apan akong naamgohan nga kini dili mao ang tibuok nga plano.
Anaa kita dinhi sa yuta aron motubo, mopaambit sa kamatuoran, mosunod ni Jesukristo, ug sa katapusan mobalik sa Langitnong Amahan (tan-awa sa Alma 34: 32).
Busa, uban niana sa hunahuna, nagsugod ko nga mag-ampo ug mangutana sa Dios aron sa pagtabang kanako nga makakita sa akong katuyoan ug sa akong mga kalig-on. Ang pag-ampo ug ang akong kaugalingong mga paningkamot sa pagsulay og bag-ong mga kalingawan ug pagpalambo sa akong pagtuo mipadayag sa hinay-hinay sa akong katuyoan. Nakaamgo ko nga ako adunay hugot nga pagtuo kang Jesukristo. Ug kabahin sa akong katuyoan ug plano dinhi sa yuta mao ang pagtabang sa uban nga mapalambo ug mapalig-on usab ang ilang hugot nga pagtuo diha Kaniya. Kini nga kamatuoran nakahatag kanako og talagsaong direksyon sa akong kinabuhi ug nakatabang nako sa pagpokus nga mamahimo kon unsay gusto Niya nga ako mamahimo.
Pagka-amgo sa Akong Katuyoan
Sa dihang mga 20 anyos ko, daghan sa akong mga pagpakig-istorya nagtuyok sa pagka-single. Nagpokus lang ko sa akong “masulub-on” nga mga kahimtang. Karon akong nakat-unan nga maayong magtinguha og kaminyoon, apan ako makadungan og tinguha sa ubang mga katuyoan ug mga oportunidad.
Kon dili kamo sigurado kon unsay angay buhaton karon, si Presidente Russell M. Nelson mitanyag og pipila ka tambag kon asa magsugod:
“Pangutan-a ang inyong Langitnong Amahan sa pangalan ni Jesukristo unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga mga kamatuoran diha kaninyo. …
“Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilauman nga inyong buhaton alang Kaniya, mausab gayud ang inyong kinabuhi!” (“Barug isip Tinuod nga mga Milenyal,” Liahona, Okt. 2016, 49).
Kadto nga mga pulong makahuluganon kaayo.
Samtang aduna koy mga ideya sa unsay akong gusto sa kinabuhi (nga mga nindot kaayo, sa akong opinyon!) Ang Dios mas nasayud pa kay sa kanako. Ug ang Iyang plano modala kanako sa mga dalan nga mas mahinungdanon pa kay sa akong gihanduraw sa akong kaugalingon.
Pagkabukas sa Bag-ong mga Paglaum
Ang pagpahiangay sa akong kaugalingon sa plano sa Langitnong Amahan alang kanako lisud sa sinugdanan. Ako kinahanglan nga bukas sa bag-ong mga ideya, bag-ong mga panglantaw, ug sa bag-ong mga paglaum. Usahay sakit kon ang kinabuhi wala nahitabo sa paagi nga akong giplano. Ang akong patriyarkal nga panalangin mihimo og piho nga mga saad nga wala natuman. Apan mihunong ko sa pagkabalaka sa dihang sa katapusan mibuhi ko sa akong kaugalingon nga mga ideya ug mihukom nga mosalig nga ang tanan nga gisaad nga mga panalangin sa akoa mahimong matuman—tungod kay ako nasayud nga sila matuman sa Iyang panahon.
Kon kita mosalig ug mopokus sa tibuok plano sa Langitnong Amahan alang kanato, kita makabaton sa walay katapusan nga kalipay nga Iyang gisaad kanato (tan-awa sa 2 Nephi 2:25). Makaplagan nato ang atong personal nga mga misyon. Mamahimo kita kinsa Siya gusto nga kita mamahimo. Ug sa samang higayon, kita mangandam sa atong mga kaugalingon alang sa tanan natong mahangturong mga panalangin—lakip na ang kaminyoon.
Tungod niini nga kausaban sa panglantaw, nakaplagan nako ang tinuod nga kalipay sa akong kinabuhi. Wala ko masayud sa tanan nga mga tubag, apan Siya nagpadayon sa paghatag og katin-awan sa akong kinabuhi sa hinay-hinay.