Nagkinahanglan Kami og Ikaduhang Milagro

Daniel Payne, New Mexico, USA

Kami aduna nay usa ka milagro sa pagmabdos sa akong asawa. Karon nagkinahanglan kami og usa pa.

Ang akong asawa, si Sarah, 24 ka semana na nga mabdos sa dihang misugod siya sa pagbati og grabeng kasakit. Mihatag ko kaniya og panalangin ug dayon mibiya padulong sa trabaho. Didto pa ako sa trabaho sa dihang nanawag siya nako nga mouli aron ako siyang dad-on sa ospital.

“Hapit na mogawas ang inyong bata,” gisultihan kami sa among pag-abut. Tungod kay si Sarah 24 ka semana pa nga nagmabdos, ang labing maayong tsansa nga mabuhi ang bata mao ang dinalian nga cesarian nga pag-opera.

“Ang imong asawa dili na kinahanglang moagi pa og bisan unsang dugang nga kasakit,” misulti ang doktor kanako. “Mawala man gihapon niya ang bata.”

Si Sarah ug ako naghisgot ug nag-ampo mahitungod sa unsay gisulti sa doktor. Gibati namo nga kon aduna pay tsansa nga mabuhi ang among anak, kinahanglan namong sulayan kana nga tsansa. Nakasinati kami og kalisud sa pagbaton og mga anak. Ang among kinamagulangang anak, si Taylor, sinagop. Sa dihang namabdos si Sarah duha ka tuig human sa among pagsagop kang Taylor, gibati namo nga usa kadto ka milagro. Karon nagkinahanglan kami og ikaduha nga milagro.

Wala madugay, usa ka espesyalista miduol kanamo ug miingon, “Morag duna pa ta’y oras aron dad-on ang imong asawa ngadto sa ospital sa mga bata sa El Paso, Texas, nga adunay kasangkapan sa pag-atiman og ahat nga pagkatawo [premature] ug masakiton kaayo nga mga bag-ong natawo. Adunay purohan ang bata didto!”

Usa ka ambulansya mibiya sa among lokal nga ospital uban ni Sarah ug paspas nga mipadulong sa ospital sa mga bata nga 45 minutos ang gilay-on. Nagsunod ako sa luyo, nangamuyo sa Ginoo diha sa pag-ampo nga hatagan kami og milagro. Misaad ko Kaniya nga magpabilin ko sa dalan sa ebanghelyo ug maningkamot nga mahimong mas maayo.

Sa ospital, giingnan nako ang doktor sa neonatal intensive care unit: “Nahibalo mi nga aduna na kamiy usa ka milagro sa pagmabdos sa akong asawa. Karon naglaum kami og laing milagro.”

Ang pagpanganak maayo ra, ug naluwas ang among anak. Human siya migahin og upat ug tunga ka bulan sa neonatal intensive care unit, gidala namo si Shanna sa balay. Nakadawat kami og ikaduhang milagro. Paglabay sa dili kaayo taas nga katuigan, nakadawat na usab kami og laing milagro—ang Ginoo mipanalangin kanamo og kaluha.

Si Shanna medyo ubos gamay og IQ, ug anaa siya sa wheelchair, apan puno siya sa kalipay, kanunay nga positibo, ug higala sa tanan. Ganahan siyang mosulti nimo mahitungod sa iyang adlaw, ug mahinamon siya sa kinabuhi. Makapahimo siya namo kanunay sa pagpahiyom ug nagtudlo kanamo nga magmalipayon. Gimahal namo siya ug mapasalamaton alang kaniya. Si Shanna usa gayud ka panalangin.