Mag-uban sa Pagserbisyo uban sa Gahum sa Pagkapari

Ni Presidente M. Russell Ballard

Akting nga Presidente sa Korum sa Napulog Duha ka mga Apostoles

Gikan sa pakigpulong sa Abril 2013 nga kinatibuk-ang komperensya.

Pipila ka tuig ang milabay, ang akong asawa, si Barbara, ug ako madayegon nga mitan-aw sa kalangitan sa kagabhion. Ang minilyon ka bitoon daw talagsaon ang kahayag ug katahum. Gipakli dayon nako ang Perlas nga Labing Bililhon ug mibasa sa gisulti sa Ginoong Dios ngadto ni Moises: “Ug mga kalibutan nga dili maihap Ako milalang; ug Ako usab milalang alang sa akong kaugalingon nga katuyoan; ug pinaagi sa Anak Ako milalang kanila, kinsa mao ang akong Bugtong Anak” (Moises 1:33).

Ang gahum nga milalang sa langit ug yuta mao ang pagkapari. Ang tinubdan niini nga gahum sa pagkapari mao ang Dios nga Labawng Makagagahum ug ang Iyang Anak, si Jesukristo. Mao kini ang gahum nga gigamit sa Manluluwas sa paghimo og mga milagro, sa paghatag og walay kinutuban nga Pag-ula, ug sa pagbuntog sa pisikal nga kamatayon pinaagi sa Pagkabanhaw.

Sa plano sa atong Langitnong Amahan, ang kalalakin-an dunay talagsaong responsibilidad sa pagpangalagad sa pagkapari, apan dili sila ang pagkapari. Mahinungdanon kaayo nga kita makasabut nga ang Langitnong Amahan naghatag og paagi sa tanan Niyang mga anak nga makaangkon sa mga panalangin ug malig-on sa gahum sa pagkapari.

Ang samang gahum sa pagkapari nga milalang sa mga kalibutan, mga galaxy, ug sa uniberso pwede ug kinahanglang mahimong kabahin sa atong kinabuhi sa paghupay, paglig-on, ug pagpanalangin sa atong pamilya, mga higala, ug mga silingan—sa ato pa, sa pagbuhat sa butang nga buhaton sa Manluluwas kon nangalagad pa Siya taliwala kanato karon (tan-awa sa Doktrina ug mga Pakigsaad 81:5).

Ang nag-unang katuyoan niini nga gahum sa pagkapari mao ang pagpanalangin, pagbalaan, ug pagputli kanato aron makapuyo kita kauban ang atong mga pamilya diha sa presensya sa atong langitnong mga ginikanan hangtud sa kahangturan. Niini nga paagi, ang tanang lalaki, babaye, ug mga bata—bisan unsa pa ang atong mga kahimtang—makaapil sa kahibulongan nga buhat sa Dios ug ni Jesukristo (tan-awa sa Moises 1:39) ug makatagamtam sa mga panalangin sa pagkapari.

Unta magmaalamon kita ug magtinguha sa paglig-on sa atong kaugalingong kinabuhi, sa kinabuhi sa atong mga pamilya, ug sa Ang Simbahan ni Jesukristo sa mga Santos sa Ulahing mga Adlaw pinaagi sa gahum sa pagkapari sa Dios.