Ang mga Pulong sa Propeta alang sa Tanan
Katherine Furgeson, Pennsylvania, USA
Wala ko magdahum nga makakita og kinutlo nga mga pulong gikan sa usa ka propeta sa Dios diha sa mga bungbong sa eskwelahan.
Paghulagway pinaagi ni Merrilee Liddiard
Sayo ko nga mimata usa ka buntag aron mangandam sa pagtrabaho. Samtang kasagaran ganahan ko sa akong trabaho isip magtutudlo, medyo gisapot ko ug gusto lang nga mobalik og higda ug magpakaaron-ingnon nga tingkatulog na usab.
Sa dihang miabut ko sa high school, naningkamot ko nga maandam ang akong hunahuna alang sa trabaho. Nasayud ko nga kinahanglan kong motudlo og klase sa math sa dili madugay, apan ang akong pagbati ug panghunahuna parehong gilaay ug magul-anon. Negatibo tanan ang akong mga emosyon.
Nakahukom ko nga moadto sa kasilyas sa dili pa magklase. Matag karon ug unya, adunay mopapilit og mga flier [pahibalo] diha sa mga kasilyas nga adunay impormasyon alang sa mga estudyante ug mga kawani. Sa kilid sa akong mga mata, usa ka flier ang mikuha sa akong pagtagad. Kini adunay nindot nga kinutlo nga mga pulong nga mabasa, “Kon gusto ka nga mohatag og kahayag sa uban, kinahanglan ka mismo nga magdan-ag.”1 Nasurprisa ko nga makakita nga kini nga kinutlo nagagikan kang Presidente Thomas S. Monson (1927–2018).
Wala ko magdahum nga makakita og kinutlo nga mga pulong gikan sa usa ka propeta sa Dios diha sa mga bungbong sa eskwelahan. Nagpuyo ko sa usa ka gamay nga lungsod sa Pennsylvania, USA, ug sigurado ko nga ako usa sa pipila lang, o posible ang bugtong, nga miyembro sa Ang Simbahan ni Jesukristo sa mga Santos sa Ulahing mga Adlaw diha sa eskwelahan. Nasayud ko nga ako usa sa pipila kinsa makasabut sa kaimportante sa mga pulong ni Presidente Monson—usa ka tawo nga akong gipaluyohan sulod sa daghang katuigan isip propeta. Akong gibati nga kini nga mensahe alang gayud kanako. Mipalukmay kini sa akong kasingkasing ug mipagaan sa akong buot. Ang kamapasalamaton alang sa akong pagpamatuod mipuno sa akong kasingkasing, ug ang gugma sa Langitnong Amahan milukop kanako.
Gusto nakong kuhaon ang flier gikan sa bungbong ug isulod kini sa akong bulsa sa tibuok adlaw aron sa pagdasig kanako, apan duna akoy dali nga naamgohan. Si Presidente Monson dili lamang propeta alang kanako ug sa ubang mga miyembro sa Simbahan—siya ang propeta sa kalibutan. Ang iyang mga pulong, sama sa mga pulong ni Presidente Russell M. Nelson karon, alang sa tanan. Ang mga pulong sa propeta makatabang ug makabayaw sa tanan kinsa maminaw niini. Akong gilitratohan ang kinutlo nga mga pulong gamit ang akong phone ug gipasagdan ang flier alang ni bisan kinsa nga tingali magkinahanglan niini.
Mapasalamaton ko nga ang Langitnong Amahan midasig og tawo aron mobutang niini nga mensahe sa dapit nga akong makit-an. Gusto ko nga mohatag og kahayag ngadto sa uban. Pinaagi sa pagkamasulundon ug pagkasuod ngadto sa atong Manluluwas, makahimo ako sa pagdan-ag bisan sa mga adlaw nga ang kangitngit gusto nga ako mahisalaag.