Atong mga Panimalay, Atong mga Pamilya
Usa ka Gasa sa Gugma
Ang tagsulat nagpuyo sa Utah, USA.
Samtang ang akong bana mipanalangin sa among anak nga babaye, misugod ko sa pagkaangkon og gamayng pagsabut sa gilawmon ug gilapdon sa gasa sa gugma sa Langitnong Amahan—ang pagkapari.
Paghulagway pinaagi ni ALE + ALE, Morgan Gaynin
Bag-o ako nga miyembro sa Simbahan, bag-o nga asawa, ug karon bag-o nga inahan. Dominggo kadto sa puasa, ug ang among gamayng anak nga babaye hapit na modawat sa ngalan ug panalangin. Wala pa gayud ako makakita og panalangin alang sa usa ka bata tungod kay nagpuyo kami sa usa ka ward nga adunay pipila lang ka batan-ong mga pamilya. Wala ko kahibalo unsay paabuton. Apan gibati nako pinaagi sa Espiritu nga espesyal kaayo kini ug makahuluganon.
Ang akong bana, giapilan sa ubang matinahuron nga mga naghupot sa pagkapari, mainampingong mikugos sa among bililhon nga gamayng anak. Ang nindot nga pagbati sa Espiritu mipuno kanako sa kalipay. Ang mga luha midagayday sa akong mga aping, ug daghan kaayo nga mga impresyon ang mipuno sa akong hunahuna. Nasayud ko nga nagsugod pa lang ko sa pagkaangkon og gamayng pagsabut sa gilawmon ug gilapdon sa talagsaong gasa sa gugma sa Langitnong Amahan ngari kanato—ang pagkapari.
Sa dihang gitudloan ko sa mga misyonaryo sa mga diskusyon, akong nabatyagan ang dakong dungog nga ilang gibati sa paghupot sa pagkapari. Ako kining nadunggan diha sa ilang mga pulong ug sa ilang mga pag-ampo, lakip na sa dihang mipanalangin sila kanako aron mabuntog ang usa ka hagit kalabut sa Pulong sa Kaalam. Akong gibati ang ilang mga kamot, hinay nga gipatong diha sa akong ulo, nga misugod sa pagkurog samtang gipamulong nila ang mga pulong nga nasayud ko nga gikan sa Ginoo—mga pulong sa gugma ug pagkaayo.
Wala madugay nabunyagan ako, ug ang mga kamot sa nanaghupot sa pagkapari gipatong na usab sa akong ulo. Gikumpirmahan ko isip miyembro sa Simbahan sa Ginoo, ug ang gasa sa Espiritu Santo gitugyan ngari kanako. Nalimpyohan ko ug natawo pag-usab. Akong gibati ang gahum sa pagkapari diha sa akong tibuok lawas, ug sa unang higayon sa akong kinabuhi, nahibaloan nako ang hingpit nga kalipay.
Wala madugay human sa akong bunyag, ang akong bana ug ako naminyo. Ang iyang mga ginikanan mga miyembro sa Simbahan ug ang iyang panimalay nakasentro sa ebanghelyo, apan nasayud ko nga ang iyang pagpamatuod dili pa kaayo lig-on. Hinoon, wala ako mabalaka. Ang akong bag-ong pagtuo mipuno kanako sa pagkamasaligon. Higugmaon lamang nako siya ug magmapailubon ug magmainampuon.
Sa mga bulan nga nagsabak ako sa among kinamagulangang anak, gibati nako ang sagad nga bation sa mga inahan—suod kaayo sa akong gamayng bata, puno sa katingala niining bag-ong kinabuhi sulod kanako. Sa dihang natawo ang among anak nga babaye, ang akong relasyon kaniya nahimong kusog nga pagbati sa gugma, lig-on ug tam-is.
Apan nabalaka ako sa akong bana. Wala niya maangkon kini nga panalangin sa hilabihan nga kasuod ngadto sa among anak nga babaye nga akong natagamtam. Siyempre gimahal niya siya, apan naghunahuna ko ug nabalaka kon molambo ba ang lig-on nga relasyon tali kaniya ug sa among anak. Nabalaka ko samtang migahin ko og panahon sa pag-atiman sa among anak nga babaye, sa pagligo kaniya, ug sa pagkugos kaniya, samtang ang dakong panahon sa akong bana gigahin sa pagtrabaho aron makasuporta sa among pamilya.
Karon, pipila ka semana human sa iyang pagkatawo, anaa kami sa among chapel. Usa ka milagro ang nahitabo diha sa akong atubangan ug diha sa akong kasingkasing. Ang nag-ukon-ukon nakong bana mapaubsanong mipahiyom sa iyang kaigsoonan diha sa sirkulo, ang iyang panagway daw kahilakon sa kalipay. Agi og balos, ang gugma ug suporta midagayday gikan niadto nga kaigsoonan padulong kaniya samtang mibutang sila sa mga kamot diha sa mga abaga ug mitabang sa pagkugos sa among anak, miporma og gamay nga sirkulo nga napuno sa putli ug sagradong gugma. Samtang gisugdan sa akong bana ang panalangin, nadungog nako ang pagkurog sa iyang tingog ug nasayud ko nga iyang gibati ang gahum sa Ginoo ug ang dungog sa paghupot sa Iyang pagkapari.
Gibati nako ang dakong gugma nga mitubo diha kaniya alang sa among gamay nga batang babaye, ug nasayud ko nga naningkamot siya pag-ayo sa pag-andam sa iyang kaugalingon aron sa paghatag sa among anak sa panalangin nga giandam sa Langitnong Amahan alang kaniya. Hingpit ang akong kalipay samtang akong naamguhan nga gibati na niya karon nga konektado kaayo ngadto sa among anak nga babaye. Usa kini ka koneksyon nga dili gayud mahuyang.
Milabay na ang katuigan sukad niadto nga kasinatian. Sa dili maihap nga higayon akong nasaksihan ug nabati ang gahum ug katahum sa pagkapari nga gigamit sa daghan kaayong paagi, sa daghan kaayong dapit, ug alang sa daghan kaayong mga anak sa Langitnong Amahan. Nakita nako ang matahum nga makaluwas nga mga ordinansa nga gihatag ug mga kasingkasing nga napuno. Nakaobserbar ko sa paglimpyo, pag-ayo, paghupay, ug pagtudlo. Nakita ug nabati nako ang mga palas-anon nga gitangtang.
Nasayud ko nga wala pa ko makasabut sa hingpit nga kahalangdon sa pagkapari, apan ang matag panalangin alang sa masuso nga akong nakita mipuno kanako sa samang pagdayeg nga akong gibati atol sa panalangin sa akong unang anak. Nakadayeg ko sa gugma nga gipakita sa Langitnong Amahan pinaagi sa pagpaambit sa Iyang gahum ngari kanato, ug napuno ako sa pasalamat nga dili ikapadayag sa mga pulong sa akong pagpamatuod mahitungod Kaniya, sa Iyang Pinalanggang Anak, ug sa atong matahum nga gipahiuli nga ebanghelyo.