Kabataan ug Kabatan-onan
Ang Akong Tumong sa Pagluto
Ang imong Giya nga Basahon sa Kabataan makatabang nimo sa paghimo og mga tumong nga mas mapaduol kang Jesus.
Gusto nakong mahimong mas maayo sa pagluto. Busa sa dihang nakadawat ko sa akong Giya nga Basahon sa Kabataan, mihimo ko og tumong nga magluto uban sa akong papa. Matag higayon nga magluto ang akong papa mitan-aw ko niya ug nakita nako kon unsa kini kanindot. Gusto nakong makat-on sa pagluto sama kaniya.
Ang akong papa ug ako miadto sa tindahan aron mamalit sa mga sagol. Dayon gitudloan ko niya sa matag lakang kon unsaon sa paghimo sa harina ngadto sa maanindot nga cake. Wala madugay gitudloan usab ko niya unsaon sa paghimo og ubang butang.
Ang pagbuhat niini nga tumong nakatabang nako nga mas masuod sa akong papa. Ganahan ko nga mogahin og panahon uban kaniya! Maayo kaayo siya nga magtutudlo. Usa ka butang nga iyang gitudlo kanako mao nga kon magluto kami, dili ako angay nga malinga sa akong cell phone!
Karon kon maghunahuna ko sa pagluto, mobati ko og dakong kalipay, tungod kay ganahan ko nga magluto! Kini nga tumong nakatabang nako dili lang sa pagbuhat og butang nga akong ganahan apan sa paglambo usab sa espirituhanong paagi. Ganahan ko nga makapili ko sa akong kaugalingon nga mga tumong. Ang Langitnong Amahan gustong motabang kanako niini nga tumong tungod kay gusto Niya nga akong mapalambo ang akong mga talento. Gusto Siyang motabang kanako tungod kay nasayud Siya nga makapalipay kini kanako. ●
Mga litrato pinaagi ni Jonas Rebicki