Ang Pag-angkon og Pagpamatuod libut sa Kalibutan
Ang tagsulat nagpuyo sa Utah, USA
Kini ang istorya kon giunsa nako pagpasakop sa Simbahan ug ang akong pamilya nahimong aktibo sa ebanghelyo.
Paghulagway pinaagi ni Pauline Grayson
Natawo ako sa Spain ug mipuyo didto sulod sa walo ka tuig. Panagsa ra kami mosimba, mao nga wala ako mabunyagi sa dihang nag-otso anyos ko, apan gusto gayud nako. Usa ka adlaw nangutana ko sa akong mga ginikanan nganong wala na kami mosimba ug nganong wala pa ko mabunyagi.
Samtang gipasabut nako nila ang akong tinguha nga magpabunyag, mitandog kini sa ilang kasingkasing, ug misugod na usab kami sa pagsimba. Nindot kadto bation. Ang akong mama maayo kaayo nga ehemplo ug usa ka inspirasyon kanako. Aduna siyay lig-on nga pagpamatuod ug kanunay nga mobasa sa mga kasulatan.
Wala madugay, mibalhin kami sa Venezuela, diin gikan didto ang akong papa. Mipuyo kami didto sulod sa duha ka tuig, ug tungod sa kalisud sa ekonomiya, misagubang kami og daghang kalisdanan. Apan adunay maayo usab nga mga butang. Ganahan ko sa pagkaon, ug duna koy paryente didto nga matinguhaong makigkita kanako. Mapainubsanon sila nga mga tawo, ug magkuyog kaming tanan sa pagsimba ug mibati sa Espiritu.
Bisan tuod og magsimbahan kami ug mabati nako ang Espiritu, nasayud ko nga ang akong pamilya ug ako adunay kulang. Gibati gayud nako nga kinahanglan kami nga masilyo isip mahangturong pamilya. Usa ka Dominggo sa buntag, ang bishop midapit sa tanan sa kongregasyon sa pagbasa sa Basahon ni Mormon sa dili pa matapos ang tuig. Nasayud ko nga makatabang kini sa akong pamilya ug kanako nga mas hingpit nga mosunod sa ebanghelyo sa Ginoo. Sa hinay-hinay, samtang nagbasa kami sa Basahon ni Mormon, ang Manluluwas misugod sa paghatag kanamo og dugang nga kahibalo ug mga panalangin, ug mipadayon kami sa pagbasa sa mga kasulatan kanunay.
Wala madugay nabunyagan ko. Nabati gayud nako ang Espiritu sa akong kinabuhi, ug mao usab ang akong mga ginikanan. Misugod sa pagtubo ang akong pagpamatuod. Mibalhin kami ngadto sa Florida, USA, ug kinahanglan namong mohimo pag-usab og daghang mga kausaban ug mga sakripisyo, sama sa dihang mibiya kami sa Spain. Apan ang among mga pagpamatuod nagkalig-on. Manimba kami matag semana ug mipadayon sa pagbasa sa mga kasulatan.
Human sa daghang mga paningkamot ug daghang pagbasa sa mga kasulatan, pag-ampo, ug pagpili sa matarung, gusto namong masilyo isip mahangturong pamilya. Nakigsulti kami sa among bishop, ug bisan tuod milungtad og dugay, sa katapusan miabut gayud ang adlaw. Naghinam-hinam kaayo mi nga mosulod sa templo.
Nakahimo ko og mga bunyag samtang naghulat ko sa akong mga ginikanan nga makompleto ang buhat sa templo alang sa ilang kaugalingon. Gibati nako nga daw gibunyagan na usab ako. Nalipay gayud ako nga makatabang sa mga tawo sa pikas tabil. Karon ang akong pamilya ug ako moadto sa templo matag semana. Kanunay ko nga mohimo og mga bunyag tungod kay ganahan ko nga motabang didto. Nalipay kaayo ko nga nasilyo ako sa templo ngadto sa akong mga ginikanan alang sa kahangturan ug adunay oportunidad nga magpuyo sa kahangturan uban kanila.