Ang Pag-ampo ni Kelly
Si Kelly ug ang iyang mama milakaw ngadto sa gambalay sa simbahan ug mitan-aw sa palibut. Nindot kaayo kini, nga adunay mga palm tree nga maglubay-lubay sa gawas. Ang timaan sa gambalay nag-ingon, “Ang Simbahan ni Jesukristo sa mga Santos sa Ulahing mga Adlaw.” Sa tulo ka lain-laing pinulongan–Malay, Chinese, ug English!
Si Kelly wala kaayoy nahibaloan mahitungod ni Jesukristo. Ug wala pa gayud siya makasulod sa simbahan sukad. Ang higala sa iyang mama, si Li Leen, magsimbahan dinhi. Gidapit niya si Kelly ug ang iyang mama sa pag-uban kaniya.
Sa ilang pagsulod, ang mga tawo mipahiyom ug miingon og hello. Ang tanan maayo kaayo. Si Kelly ug iyang Mama misunod ni Li Leen sa itaas ngadto sa dako nga lawak. Miingon si Li Leen nga gitawag kini og chapel.
Milingkod si Kelly tupad sa iyang Mama ug ni Li Leen sa usa ka laray sa lingkuranan, ug sa wala madugay misugod na ang simba. Naminaw siya sa musika. Ganahan siya sa paagi nga nakaapekto kini sa iyang pagbati, bisan tuod wala siya masayud sa mga pulong.
Sa pagtapos sa miting, usa ka babaye mibarug aron mag-ampo. Mitan-aw si Kelly sa palibut samtang ang tanan mikyugpos sa ilang mga bukton ug mipiyong sa ilang mga mata. Mibati gihapon siya og nindot kaayo sa sulod. Unsa man kadto? Lahi kini kay sa bisan unsa nga iyang nabati sukad!
Sa ilang pagbiya sa simbahan wala madugay, si Kelly misulti sa iyang Mama mahitungod sa pagbati nga iyang nasinati atol sa pag-ampo.
“Ah,” miingon iyang Mama, “Wala akoy bisan unsang gibati nga espesyal.”
Apan nagsige og hunahuna si Kelly mahitungod sa iyang gibati didto sa simbahan. Giganahan siya sa pag-ampo. Ug giganahan siya nga makadungog mahitungod ni Jesus.
“Pwede ko nga magpatudlo sa mga misyonaryo?” Mihangyo si Kelly sa iyang Mama. “Gusto pa ko nga makakat-on.”
“Kon mao kana ang imong gustong buhaton, okey ra,” miingon si Mama.
Ang mga misyonaryo mitudlo ni Kelly unsaon sa pag-ampo ug unsaon sa pagbasa sa mga kasulatan. Mitudlo sila kaniya mahitungod ni Jesus ug sa unsang paagi Siya nagmahal kanato. Giganahan si Kelly sa iyang nakat-unan.
Usa ka adlaw ang mga misyonaryo mihatag kaniya og espesyal nga hagit.
“Pwede ba nga mosulay ka sa pag-ampo karong semanaha?” nangutana si Elder Parker.
Hangtud niining puntoha, si Kelly nag-ampo lamang uban sa mga misyonaryo. Apan gusto niya nga sulayan kini nga siya ra. Nasayud siya nga ang Langitnong Amahan kanunayng maminaw, ug gusto Niya nga makadungog gikan kaniya.
“Ako kanang buhaton,” misaad siya.
Espesyal ang misunod nga adlaw sa eskwelahan. Si Kelly mokanta sa usa ka kompetisyon! Nakakat-on siya og nindot nga bag-ong kanta nga Inintsek. Ang pagkat-on sa tanang mga nota ug mga tono lisud nga trabaho! Pabalik-balik siya sa pagpraktis.
Karon nga panahon na sa pasundayag, gikulbaan si Kelly. Gikuha niya ang hulagway ni Jesus nga iyang gisulod sa bulsa sa iyang uniporme sa eskwelahan nianang buntaga. Nakahukom siya nga mag-ampo, sama sa gipakita sa mga misyonaryo kaniya. “Langitnong Amahan, palihug tabangi ko nga mawala ang akong kakulba,” nag-ampo siya. “Sa ngalan ni Jesukristo, amen.”
Dayon si Kelly mitikang ngadto sa entablado. Mitan-aw siya sa mga nanan-aw ug sa mga hurado. Gihunahuna niya ang hulagway ni Jesus diha sa iyang bulsa ug miarang-arang ang iyang gibati. Miginhawa siya og lawom ug misugod sa pagkanta.
Gikanta niya ang tanang pulong sama sa iyang gipraktisan. Sa iyang pagkanta sa katapusang nota ug miyukbo, nasayud si Kelly nga ang Langitnong Amahan nakadungog sa iyang pag-ampo ug mitabang kaniya.
Uban sa pahiyum, mibiya si Kelly sa entablado. Dili siya makahulat nga sultihan ang mga misyonaryo sa nahitabo! Nasayud siya nga gusto niya nga magpadayon sa pag-ampo matag adlaw. ●
Mga paghulagway pinaagi ni Tammie Lyon