Ang Matinabangong Kamot ni Haven

Si Haven, usa ka 14 anyos gikan sa Utah, USA, nakahukom nga magsaulog isip usa ka batan-ong babaye sa Simbahan pinaagi sa pagserbisyo sa uban.

“Nagsugod kini isip gamay nga ideya,” miingon siya. “Ang akong tiyo miadto sa Bangladesh sa usa ka makitawhanong biyahe [humanitarian trip] ug nakakat-on mahitungod sa kalisdanan nga nasinati sa mga tawo didto. Gusto nakong motabang nila—mao nga mitan-aw ko sa JustServe nga app ug nakakuha sa ideya nga mohimo sa balay og mga kit alang sa mga refugee didto.”

Si Haven nangolekta og mga donasyon didto sa iyang eskwelahan, mihimo og GoFundMe page ug gani nanghipos og mga basurahan sa mga silingan aron makakwarta para sa mga kit. “Manghipos ko og 22 ka basurahan ug 11 ka recycle can kada Lunes ug Martes,” miingon siya. “Kasagaran akong gamiton ang kwarta nga akong kinitaan alang sa akong choir program ug sa pagtigum alang sa misyon, apan nakahukom ko nga gamiton hinoon ang akong kwarta nianang bulana sa pagtabang og palit og mga suplay.”

Si Haven dayon migawas ug mipalit sa tanang materyal nga gikinahanglan niya alang sa mga kit, lakip sa mga medyas, mga gwantis, mga scarf, ug mga kalo. Iyang gitapo ang matag kit ug mikontak usab sa direktor sa Lifting Hands International aron masabutan ang paghatod sa mga kit sa Bangladesh.

“Ang pagtapo sa mga kit maoy nakakuha og dakong oras sa akong proyekto. Apan sa matag higayon nga duna akoy ibutang sulod sa kit, nasayud ko nga moadto kini sa tawo nga nanginahanglan ug nga sila mapanalanginan og dugay tungod niini.”

Sa katapusan sa iyang proyekto, gibati ni Haven nga midako ang iyang pagsalig sa iyang abilidad nga moserbisyo. “Akong nakat-unan gikan niini unsa ka dakong tabang ang akong mahimo kon maningkamot ko og maayo. Mibati usab ako og kalooy alang sa mga tawo nga akong gitabangan, nga nakatabang nako nga mas mapaduol sa Manluluwas ug mobati og gamay sa unsay Iyang gibati alang kanato.”

Samtang atong saulugon ang kasumaran sa Young Women nga organisasyon, ang matag usa kanato makahinumdom nga kita mga ehemplo ni Kristo. Sama ni Haven, mahimo kitang usa ka dakong tabang ngadto sa uban kon maningkamot kita og maayo sa pagserbisyo sama sa Iyang gihimo.