Digital Lamang
Unsay Gitudlo Kanako sa Kakulian sa Panglawas sa Akong Anak nga Babaye mahitungod sa Grasya
Ang Langitnong Amahan nasayud unsa ang atong gisinati. Ug nasayud Siya kon kinsa kita nga mamahimo.
Gipahiangay gikan sa usa ka debosyonal sa Brigham Young University nga gihatag niadtong Hulyo 10, 2018. Alang sa kompletong mensahe, adto sa speeches.byu.edu.
Ang akong ikaduhang anak nga babaye, si Caroline, gipakatawo pinaagi sa emergency C-section. Ang grabe nga pagkawala sa dugo nagpasabut og kakulang sa oxygen sa iyang utok, nga miantus og grabeng kadaut.
Kinse ka tuig ang milabay, si Caroline nagpabilin gihapon sa ang-ang sa kalamboan sa tulo ka bulan nga bata. Dili siya makalakaw o makakamang o makaligid. Dili siya makasulti, ug dili kami sigurado kon unsay iyang nasabtan.
Ang maayong balita mao nga si Caroline madanihon. Mapahiyumon kaayo siya ug hingatawa kaayo. Ganahan siyang gakson ug hagkan, usa ka bugnaw nga hangin sa iyang nawong, ug mga rumble strip sa freeway. Mohimo siya og matahum, hinay nga “aah” nga mga tingog ug kusog gayud kaayo nga “AAH” nga mga tingog—kasagaran sa tungang gabii.
Sa dihang singko anyos pa si Caroline, nabatasan niya nga momata tali sa alas 2:00 ug 3:00 sa buntag sa pipila ka nagsunod nga mga gabii. Usa ka gabii human niini nga wala mauyuni nga tawag sa pagmata, ako misulat niini:
Samtang giilisan nako ang iyang diaper karon lang, nagkanta ko nga wala sa hunahuna og usa sa mga kanta sa [Primary] nga si Lizzy (among laing anak nga babaye) mideklarar nga kantahon na namo matag tingkatulog sa gabii… “Ang Dios mihatag kanato og pamilya sa pagtabang kanato nga mamahimo unsay Iyang gusto kanato.” Ug mitan-aw ko kang Caroline ug kalit lang ang mga pulong miabut sa atubangan sa akong panghunahuna.
Ang Dios mihatag kanako og usa ka pamilya—lakip niining batang babaye nga tigmata og alas 2:00 sa buntag—aron sa pagtabang kanako nga mahimong unsay Iyang gusto kanako… “Ingon niini ang Iyang pagpakita sa Iyang gugma,” nagpadayon ang koro, “kay ang pamilya iya sa Dios.”
Nianang gabhiona akong gibati ang usa ka mubo, bulahan nga pagkighinabi sa Dios, usa ka kumpirmasyon nga Siya, nianang higayuna, personal nga nakaila kanako ug ni Caroline ug sa among pamilya. Nahigugma Siya kanato. Ug Siya, ang akong Amahan mihatag kanako og pag-awhag pinaagi sa pagtudlo nako nganong nag-atubang kita og ingon niini nga mga hagit: “sa pagtabang kanato nga mamahimo unsay Iyang gusto kanato.”
Ang kusog nga “AAH” nga mga tingog ni Caroline kanunay usab nga gihimo sa simbahan. Kon siya guol kaayo ug saba, ang akong asawa ug ako modala kaniya ngadto sa pasilyo, diin itulod-tulod namo si Caroline sa iyang wheelchair, aron makalma siya sa paglihok.
Usa ka Dominggo, miadto ko sa simbahan nga nagtulod sa usa ka subo kaayo nga Caroline, naghunahuna nga motambong lang kami sa sakramento. Samtang naglakaw ko sa pasilyo ug si Caroline nagpabilin nga naguol, nagsugod ako sa paghunahuna kon makaabot pa ba kaha mi. Ang akong tanang mga paningkamot sa paghupay kaniya ingon og walay kapuslanan.
Apan misugod na dayon ang himno sa sakramento. Gipaduol nako ang akong nawong kang Caroline ug mikanta ngadto kaniya. Siya mihilom ug naminaw. Ang himno sa sakramento nianang adlawa mao ang “Pagmatinahuron Na” (Mga Himno, nu. 108), nga nahisulat ingon og ang Manluluwas ang nagkanta. Angkunon nako, nakapokus ko ni Caroline ug dili sa himno—hangtud nga miabut kami sa ikaupat nga bersikulo, sa dihang akong nabantayan ang akong kaugalingon nga nagkanta niini nga mga pulong ngadto sa akong anak nga babaye:
Pagmahal kos higala,
Way katapusang gugma.
Mitan-aw ako ngadto sa dakong asul nga mga mata ni Caroline ug mibati og maayo sa malumo, personal nga mga kamatuoran niadto nga mga pulong. Si Jesukristo, ang Manunubos sa kalibutan, nahigugma ni Caroline “[uban sa] way katapusang gugma.” Kon siya magul-anon o gisakitan, kon ang iyang mga ginikanan dili kahibalo ug dili makahimo sa paghupay kaniya, adunay Usa kinsa iyang Walay Katapusang Higala, kinsa nasayud sa unsay iyang gibati ug unsaon sa pagtabang kaniya.
Bag-ohay lang ang among pamilya adunay usa ka makalingaw nga diskusyon mahitungod sa usa ka importanting hilisgutan: ang akong buhok—o kaha ang kakulang niini tungod kay ako nagka-opaw. Ako mipahayag nga sa Pagkabanhaw, sila dili gani makaila kanako uban sa akong kulot nga buhok.
Diha diha dayon, si Lizzy miingon, “siguro kita mabalda usab ni Caroline nga nag-istorya.”
Kaming tanan nangatawa, apan natandog ko sa makahuluganon nga kamatuoran sa iyang mga pulong: Ang kaluwasan nga anaa pinaagi sa atong Bantugang Manunubos alang sa tanan, naglukop sa akong buhok ug sa kadaot sa utok ni Caroline ug sa tanan nga anaa sa tunga-tunga. Kahibulongan ang grasya ni Jesukristo; Ang Iyang gahum sa pag-ayo walay kinutuban.
Ang mahangturong ilhanan ni Caroline wala gihulagway pinaagi sa iyang mortal nga kakulian sa panglawas; usa ka maanindot ug mahimayaon nga umaabut ang nagahulat kaniya tungod ni Jesukristo.