Ang Desisyon sa Bunyag
Bag-ohay lang, ang akong bana ug ako naningkamot sa paghukom kon ang among siyete anyos nga anak nga lalaki andam na ba nga magpabunyag. Aduna siyay autism, busa dili kami sigurado kon igo ang iyang pagsabut aron adunay tulubagon alang niini nga desisyon. Sa pahina 18, mahimo ka nga mobasa mahitungod sa daghang butang nga among gikonsiderar samtang naningkamot kami sa paghimo sa husto nga desisyon.
Isip usa ka disabilities specialist sa Simbahan, nasayud ko nga daghang talagsaong mga tawo nga adunay kakulian nagtinguha nga mobati nga nalakip diha sa simbahan. Sa tanan natong kaigsoonan kinsa adunay mga kakulian sa managlahing matang ug ngadto sa ilang mga pamilya, moingon kami: Gimahal namo kamo, nagkinahanglan kami kaninyo, ug gusto namo nga makat-on unsaon nga mas maayong makapangalagad kaninyo.
Pipila ka mga artikulo niini nga isyu makatabang kanato nga makasabut sa mga kakulian ug kon sa unsang paagi kita mas maayong makaugmad og pag-apil diha sa atong mga ward ug mga komunidad:
-
Pahina 28: Si Elder Paul B. Pieper sa Seventy ug ang iyang asawa, si Melissa, kinsa adunay anak nga may mga kakulian, mihatag og paglaum ug pag-awhag sa mga ginikanan.
-
Pahina 21: Sa katapusan sa akong artikulo, makakita kamo og mga ideya kon unsaon nga mas matagad ang mga miyembro nga adunay kakulian diha sa mga leksyon ug mga calling sa Simbahan.
-
Pahina H16: Ang mga ginikanan makagamit niini nga istorya diha sa Higala sa pagtabang sa ilang mga anak nga makakita og usa ka ehemplo sa pagkahimong higala ngadto sa tawo nga adunay kakulian.
Samtang imong basahon kini nga isyu, hinumdumi nga “ang bili sa kalag mahinungdanon sa panan-aw sa Dios” (Doktrina ug mga Pakigsaad 18:10). Makatabang kita sa pag-ugmad og mahigugmaon, malakipon nga mga kahimtang sa panimalay ug sa Simbahan aron ang tanan nga gusto nga moduol ug mahimong sama kang Jesus aduna niana nga oportunidad.
Uban sa gugma,
Katie Edna Steed
Disabilities Specialist, Departamento sa Pagkapari ug Pamilya