Mga Hulagway sa Pagtuo
Lini Uilaau
Savai’i, Samoa
Si Lini kaniadto nanlimbasug sa mga pagbati sa kasuko ug pagkawalay pailub. Apan sa dihang siya ug ang iyang bana mipasakop sa Ang Simbahan ni Jesukristo sa mga Santos sa Ulahing mga Adlaw, gibati ni Lini nga kadto nga mga pagbati nawala samtang nagsunod siya sa ebanghelyo.
Leslie Nilsson, litratista
Misugod ako sa pagtuon sa ebanghelyo ug nakakat-on pinaagi sa mga pagtulun-an sa Simbahan kon sa unsang paagi si Jesus nahigugma sa mga bata. Kanunay Siya nga mabination kaayo ngadto kanila.
Misugod ko sa pagpaningkamot nga mas mahisama kang Jesus. Karon naningkamot kong mas higugmaon ang tanang sakop sa akong pamilya. Naggahin ko og mas dakong panahon uban kanila ug mas dakong panahon sa pag-ila sa ilang mga panginahanglan. Nagbasa kami sa mga kasulatan isip pamilya ug dungan nga mag-ampo matag gabii.
Mas humok na karon ang akong kasingkasing. Mibati ako og dugang gugma ug kalinaw ug kalipay sa among panimalay samtang misunod kami sa mga pagtulun-an ni Jesukristo. Mapasalamaton ko sa paagi nga ang ebanghelyo nakatabang nako nga makat-on unsaon sa pagkahimong mas maayong asawa, inahan, ug apohan nga babaye.
Pipila sa among mas magulang nga mga anak nahisakop sa lain-laing relihiyon, apan naglaum gihapon kami nga moapil silang tanan sa tinuod nga Simbahan sa umaabut. Ang akong bana ug ako adunay tumong nga modawat sa among tuga sa templo sa sunod tuig. Apan mao lamang kana ang among sinugdanan nga tumong. Gusto namo nga ang among tibuok pamilya makaadto sa templo ug mahiusa sa pagsilyo.
Ang ebanghelyo makausab sa among kinabuhi. Agig dugang sa pagkadali nga masuko, nanlimbasug ako kaniadto sa pipila ka bahin sa Pulong sa Kaalam. Apan karon dili na kana problema alang kanako. Kon ang ebanghelyo nakatabang nako nga mahimong mas maayo nga tawo, nasayud ko nga makahimo kini niini ngadto sa akong tibuok pamilya.
Si Lini ug ang iyang bana, si Ioane, parehong nakatagamtam sa mga panalangin sa mas suod nga panaghiusa sa pamilya sa dihang gidawat nila ang ebanghelyo ni Jesukristo.
Sa matag oportunidad, gakson ni Lini ang iyang mga apo. Si Lini ug ang iyang bana naghimo og tumong nga makita ang ilang tibuok pamilya nga masilyo sa templo sa umaabut.
Ang mas dakong gugma ug kalinaw sa panimalay usa lamang sa mga panalangin nga nabantayan ni Lini sukad mipasakop sa Simbahan ug misunod sa mga baruganan nga iyang nakat-unan.