10 Ka Butang nga Ipangutana sa Imong Umaabut nga Kapikas

Naghunahuna ka ba nga magminyo? Pagkanindot. Congratulations! Sa dili pa nimo buhaton, adunay pipila ka mga butang nga kinahanglan gayud nimong mahibaloan mahitungod sa tawo nga gusto nimong minyoan (ug mahitungod sa imong kaugalingon ug unsay imong gusto).

Si Elder Robert D. Hales (1932–2017) sa Korum sa Napulog Duha ka mga Apostoles miingon: “Ang pakig-date mao ang oportunidad alang sa taas nga pag-istoryahanay. Kon mag-date mo, pagkat-on sa tanan kutob sa inyong mahimo mahitungod sa usag usa. Ilha ang mga pamilya sa usag usa kon mahimo. Ang inyong mga tumong magkauyon ba? Pareho ba mo og pagbati bahin sa mga sugo, sa Manluluwas, sa pagkapari, sa templo, pagkaginikanan, mga calling sa Simbahan, ug sa pagserbisyo sa uban? Inyo bang naobserbahan ang usag usa kon ma-stress, sa ilang reaksyon sa kalampusan ug kapakyasan, pagbuntog sa kasuko, ug sa pag-atubang sa mga problema? Ang tawo ba nga inyong gika-date modaut sa uban o modasig kanila? Ang iya bang kinaiya, sinultihan, ug gawi mao ang ganahan nimo sa tawo nga ikauban kada adlaw?”¹

Sa ato pa, kinahanglan ninyong maila-ila og maayo ang tawo nga inyong minyoan. Uban niana sa hunahana, naghan-ay kami og lista sa mga ipangutana sa inyong umaabut nga kapikas. Kini dili usa ka kompleto nga lista, apan kini hinoon makatabang ninyo nga makasugod ug mohisgot og pipila ka mga problema nga piho sa ebanghelyo. Kon ang pipila niini nga mga hilisgutan salikwaot hisgutan, mao kana ang maayo kaayo nga pagbansay alang sa kaminyoon, diin kamo kinahanglang mohimo og daghang lisud nga mga panagsultihanay mahitungod niini ug sa ubang sensitibo nga mga hilisgutan.

Sa paghisgot niining sensitibo nga mga hilisgutan, mahimong makulbaan mo mahitungod sa ideya sa kaminyoon, o tingali mahadlok. Apan hinumdumi nga adunay kalainan tali sa kahadlok ug kabalaka. Balido ang bation og kahadlok—ang paghunahuna nga magminyo mahimong makahadlok! Apan ang Ginoo nagsulti kanato nga dili mahadlok,² busa kon ang imong pagbati maayo mahitungod sa tawo, mahimo ka nga mopadayon bisan unsa pa ang imong mga kahadlok. Hinoon, kon aduna moy aktwal nga kabalaka sa tawo nga gihunahuna ninyong minyoan, gikan sa usa ka pangutana niini nga lista o sa lain nga pangutana ninyo, tingali usa kana ka timailhan nga magmatngon sa pagpadayon.

Hinumdumi lang, kini dili usa ka pasulit; kini usa ka oportunidad sa pagkat-on sa pagpakigsulti mahitungod sa maayo, malisud, ug sa lahi nga mga butang nga moabut sa kaminyoon.

Unsa ang ilang pagbati mahitungod kang Jesukristo ug sa ebanghelyo? Mahitungod sa templo? Sa unsang paagi nila igahin ang ilang Adlaw nga Igpapahulay?
Unsa nga mga kinaiya ug mga gasa ang gibati nila nga gikinahanglan alang sa malipayong kaminyoon ug pamilya? Hain niadto nga mga kinaiya o mga gasa ang gibati nila nga mga kalig-on alang kanila, ug unsaon ninyo pagtabang sa usag usa sa pagpalambo sa uban?
Gusto ba sila og mga anak? Pila ka buok? Kanus-a dayon? Unsa kaha ang ilang pamaagi sa pagdisiplina sa mga bata?
Unsa kaha ang hitsura sa usa ka adlaw sa kinabuhi sa inyong kaminyoon? Unsay inyong gusto nga pamaagi nga kamong duha mag-ampo, magtuon sa kasulatan, ug uban pa? Unsa ang inyong plano nga buhaton aron magpabiling lig-on ang inyong relasyon?
Mas madaginoton ba sila o gastador kabahin sa kwarta? Unsa ang ilang pagbati mahitungod sa utang—ug aduna ba silay utang? Unsa ang ilang mga gituohan mahitungod sa ikapulo?
Kumusta man ang pagsinabtanay sa ilang pamilya? Unsa kadugay ang ilang plano nga igahin uban sa ilang pamilya human kamo maminyo? Unsa kadugay ang ilang plano nga igahin uban sa imong pamilya?
Unsa ang ilang mga panglantaw, mga gilauman, o mga kasinatian sa pisikal nga kasuod?
Nanlimbasug ba sila og bisan unsa nga matang sa adiksyon o sa kanunayng paggamit sa mga butang sama sa giresita nga mga tambal o ubang drugas, pornograpiya, alkohol, o gani video/virtual-reyalidad nga mga dula? Kon mao, unsay ilang gihimo sa pagbuntog niini?
Sa unsang paagi kamong duha mosulbad og mga panagsumpaki kon kini mahitabo?
Aduna bay bisan unsa sa ilang kaagi nga kinahanglan kamong masayud? Kon aduna, kini mao ang maayo nga higayon nga magkat-on kon unsa gayud ang inyong pagtuo sa paghinulsol. Kini mao usab ang maayo gayud nga panahon alang sa pagkamatinuoron. Dili ikaw gusto makahibalo og mga butang sa kaulahian ug mibiya og luna alang ni bisan kinsa kaninyo nga maghunahuna kon kamo maminyo ba kaha kon nahibaloan pa unta ninyo kadto nga impormasyon.

Si Elder Hales usab mipahinumdom kanato nga “walay usa kanato ang makaminyo og perpekto; makaminyo kita og dunay potensyal.”³ Timan-i kana sa tibuok ninyong mga panag-istorya sa pagpakig-date. Walay usa nga perpekto, ug ang kaminyoon mao ang pagkat-on ug pagtubo ug pagpaduol og dungan sa Manluluwas.