Usa ka Open House sa Templo Miabli sa Akong Kasingkasing

Ricardo Matamoros, Ahuachapán, El Salvador

Tungod sa pahibalo mahitungod sa open house sa templo, akong gibati nga daw ang Ginoo personal nga nagdapit kanako sa pagsulod sa Iyang balay.

Paghulagway pinaagi ni Bradley Clark

Nabunyagan ko sa dihang 15 anyos ko. Daghang tawo ang wala makasabut sa akong bag-ong tinuohan. Ang uban, lakip sa akong mga higala, nagbugal-bugal pa gani nako sa akong desisyon nga magpasakop sa Simbahan. Ang akong mga ginikanan dili miyembro sa Simbahan, mao nga wala akoy suporta gikan kanila.

Isip resulta, nahimong lisud alang kanako ang pagpadayon sa pagtambong sa simbahan ug pagpadayon sa pagsunod sa ebanghelyo. Sa dihang 19 anyos na ako, wala na ko mag-adtoan sa simbahan.

Paglabay sa napulo ka tuig, nakadungog ko nga usa ka templo ang pagatukuron diha sa El Salvador. Nasurprisa ko pagkadungog nga usa ka balay sa Ginoo ang pagatukuron diha sa akong nasud! Paglabay sa upat ka tuig, ang San Salvador El Salvador Temple nakompleto, ug ang open house sa templo gipahibalo. Sa dihang akong nahibaloan nga ang open house makahatag kanako og oportunidad nga makasulod sa templo, akong gibati nga daw ang Ginoo personal nga nagdapit kanako sa pagsulod sa Iyang balay.

Ang adlaw nga milibut ko sulod sa templo maoy usa sa labing nindot nga mga adlaw sa akong kinabuhi. Panahon sa open house, nakakat-on ko og dugang mahitungod sa unsay mahitabo sulod sa gipahinungod na nga mga templo. Nakakat-on pud ko mahitungod sa sagrado nga mga pakigsaad sa templo nga himoon sa mga indibidwal ngadto sa Dios.

Samtang milakaw ko sulod sa matag kwarto sa templo, akong gibati ang presensya sa Dios. Mibati ko og kamalinawon. Ang pagbisita sa templo mihatag kanako og tinguha nga mobalik sa Simbahan ug mosunod pag-usab sa ebanghelyo. Sa dihang nakaamgo ko nga makahimo ko sa pag-apil sa talagsaong buhat sa Dios, gusto nako nga makompleto ang buhat sa templo alang sa akong mga katigulangan ug makagamit sa pagkapari.

Ang akong kasinatian sa templo nianang adlawa nakapausab nako. Karon motabang ko sa mga sakop sa akong ward nga maandam alang sa templo ug motabang kanila sa family history aron makahimo sila sa buhat sa templo alang sa ilang mga katigulangan.

Dili pa gayud ulahi aron mobalik sa Simbahan. Dili pa gayud ulahi aron mobuhat og maayo. Ang Ginoo, uban sa Iyang walay kinutuban nga gugma, anaa kanunay kanato. Ang templo usa ka dapit nga naghiusa kanato ngadto Kaniya ug nagtugot kanato nga sa umaabut makabalik sa pagpuyo uban Kaniya.