Young Women: Pagsaulog sa 150 ka Tuig

Ni Amanda Dunn

Mga Magasin sa Simbahan

Ang Young Women nga organisasyon mag-150 anyos na karong tuiga, ug panahon na aron magsaulog! Susiha kini nga mga impormasyon kon sa unsang paagi ang organisasyon nausab gikan sa 1870 hangtud karon, unsa ang gibuhat sa kabatan-onan nga sama nimo aron sa pag-apil sa Young Women karon, ug sa unsang paagi ka mahimong madasig sa mga babaye sa kasaysayan kinsa mipakita og kaisug ug pagtuo.

1870–1920

Ngalan: Ang Young Ladies’ Department of the Ladies’ Cooperative Retrenchment Association opisyal nga giorganisar niadtong May 27, 1870, ubos sa direksyon ni Brigham Young.¹ Ang ngalan giusab ngadto sa Young Ladies’ Mutual Improvement Association niadtong 1877.²

Organisasyon ug mga Klase: Ang programa sa Bee-Hive Girls gimugna isip programa sa ting-init alang sa mga babaye nga nag-edad og 14 ug labaw pa.

Paglambo ug Pag-ila: Ang Bee-Hive Handbook [Tamdanan nga Basahon sa Bee-Hive] gimantala niadtong 1915, nga naglatid og walo ka “mga natad” sa personal nga kalamboan: Relihiyon, Panimalay, Kahimsog, Arteng Pangbalay, Kalihokang Panggawas, Negosyo, ug Serbisyo Publiko.³

Mga Magasin ug mga Journal: Ang unang isyu sa Young Woman’s Journal gimantala niadtong 1889.⁴ Daghang lokal nga mga Mutual Improvement Association (o mga MIA) ang nagmugna og ilang kaugalingong sinulat nga mga pamantalaan nga adunay usa o duha lamang ka kopya aron ipasa-pasa sa mga babaye.

1920–1970

Ngalan: Ang Young Ladies’ Mutual Improvement Association giusab ngadto sa Young Women’s Mutual Improvement Association niadtong 1934.⁵

Organisasyon ug mga Klase: Adunay duha ka klase, Bee-Hive Girls alang sa mas batan-ong mga babaye ug Gleaners alang sa mas magulang nga mga babaye. Ang edad sa pagsulod ngadto sa programa nausab gikan sa 14 ngadto sa 12 anyos. Niadtong 1950, ang klase nga Mia Maid gipaila.

Paglambo ug Pag-ila: Ang Golden Gleaner nga pag-ila nagtimaan sa labing taas nga kalampusan nga maangkon sa batan-ong mga babaye diha sa programa.

Mga Magasin ug mga Journal: Ang Young Woman’s Journal gitipon ngadto sa Improvement Era nga magasin alang sa tanang kabatan-onan niadtong 1929.⁶

1970–2019

Ngalan: Ang Young Women’s Mutual Improvement Association giusab ngadto sa Young Women nga organisasyon niadtong 1974.⁷

Organisasyon ug mga Klase: Pagka-1972, ang Young Women nga organisasyon adunay tulo ka klase: Beehive (mga edad 12–13), Mia Maid (mga edad 14–15), ug Laurel (mga edad 16–17). Sugod sa 2019, ang batan-ong mga babaye mosulod sa Beehives pagka-Enero sa tuig nga mag-12 anyos sila.

Paglambo ug Pag-ila: Ang programa sa Personal nga Kauswagan ug medalyon gipaila niadtong 1977. Ang mga mithi sa Young Women nga Hugot nga Pagtuo, Diosnong Kinaiya, Tagsa-tagsa nga Bili, Kahibalo, Pagpili ug Pagkamay-tulubagon, Maayong mga Buhat, ug Kaligdong gidugang niadtong 1987.⁸ Ang Hiyas gidugang ngadto sa mga mithi niadtong 2008.⁹

Mga Magasin ug mga Journal: Ang New Era nga magasin alang sa kabatan-onan nagsugod sa pagmantala sa Iningles niadtong 1971, ug ang Liahona naghatag og mga artikulo alang sa kabatan-onan sa daghang pinulongan.¹⁰

2020

Ngalan: Ang ngalan nagpabilin nga Young Women nga organisasyon.

Organisasyon ug mga Klase: Ang mga klase giorganisar diha sa matag ward o branch sumala sa panginahanglan niini ug giila pinaagi sa makapahiusa nga label “Young Women” (sama pananglit, “Young Women 12,” “Young Women 12–15,” o “Young Women” lamang kon magpundok silang tanan).

Paglambo ug Pag-ila: Ang Kabataan ug Kabatan-onan mipuli sa programa sa Personal nga Kauswagan. Ang bag-ong programa nag-awhag og personal nga mga oportunidad sa paglambo sa mga aspeto sa Personal nga Kalamboan, Pagkat-on sa Ebanghelyo, ug Pagserbisyo ug mga Kalihokan.¹¹

Mga Magasin ug mga Journal: Ang New Era nga magasin alang sa kabatan-onan hapit na moabut sa ika-50 nga kasumaran niini.

Makalingaw nga Impormasyon

Ang 1915 Bee-Hive nga tamdanan nga basahon nagtugot sa batan-ong mga babaye sa pagpili og mga proyekto gikan sa sobra 300 ka lain-laing kapilian. Pipila niadto nga mga proyekto naglakip sa pag-atiman og usa ka balay sa putyukan sulod sa usa ka panahon, pagpabiling walay langaw ang balay sulod sa duha ka semana, o paghawan sa sagebrush sa tunga sa acre [mga 1/5 sa ektarya] nga yuta.¹²
Ang unang mga Bee-Hive Girls misul-ob og uniporme nga gidesinyo sa matag lokal nga asosasyon, ug niadtong 1922, nahimong bulawan ug berde ang opisyal nga kolor sa Mutual Improvement Association.¹³
Ang ngalan nga Beehive naggikan sa mga pioneer, kinsa mitan-aw sa beehive [balay sa putyukan] isip simbolo sa trabaho ug panag-uyon. Ang Mia Maid gikan sa nag-unang mga letra sa Mutual Improvement Association, MIA. Ang ngalan nga Laurel nagpasabut sa lukong sa laurel, nga nangahulugan og dungog ug kalampusan.¹⁴
Sulod sa mga katuigang 1940 ngadto sa mga 1960, ang batan-ong mga babaye mahimong makaangkon og mga simbolo nga ilang gitahi sa usa ka delanang panapton nga gitawag og bandelo, nga ilang gisul-ob tabok sa ilang dughan. Usa ka kinahanglanon aron makaangkon og usa ka simbolo mao ang “pagpaningkamot nga makahimo og siyam ka oras nga makagwapa nga pagkatulog matag gabii karong bulana.”¹⁵
Ang kinatibuk-ang miyembro sa Simbahan misaka gikan sa mga 110,000 ka tawo niadtong 1870¹⁶ ngadto sa sobra 16 ka milyon ka tawo pagka-2020¹⁷— hunahunaa kon unsa ka daghan ang batan-ong mga babaye sa tibuok kalibutan karon!

Litrato sa batan-ong babaye nga nagsul-ob og medalyon sa Personal nga Kauswagan pinaagi ni Alicia Cerva

Dagway sa batan-ong babaye sa maayong kabubut-on sa Church History Library