Ang Matinabangong mga Kamot ni Eli
Ang tagsulat nagpuyo sa Utah, USA.
“Duha ko ka kamot daghang buhatunon” (Songbook sa mga Bata, 126).
Sabado sa buntag kadto, ug si Eli naghupo diha sa goal box, andam nga mobabag sa bola. Milukso siya ug mihasmag, mibuhat sa iyang labing maayo aron dili makasulod ang football sa net. Apan lisud kadto! Dayon sa hapit na matapos ang dula, ang bola nakalusot sa iyang mga kamot. Naka-iskor ang pikas team! Napildi ang team ni Eli. Guol kaayo siya.
Pagkasunod adlaw sa simbahan, hinay nga milakaw si Eli padulong sa iyang klase sa Primary, magul-anon gihapon ang gibati.
Nakita ni Eli ang iyang higala nga si Kate sa gawas sa klasehanan. Giduso sa mama ni Kate ang pink nga wheelchair ni Kate pasulod. Gigakos niya si Kate sa wala pa mobiya aron moadto sa iyang kaugalingong klase.
“Hi, Kate,” miingon si Eli.
Dili makatubag o makawara-wara si Kate, apan kanunay siyang moderetso og tan-aw ngadto sa mga mata ni Eli mao nga nasayud si Eli nga nakadungog siya kaniya.
Kasagaran nga mopahiyom si Kate kon moingon si Eli og hello, apan wala karon. Naguol ba si Kate? Naghunahuna si Eli. Ako nasayud kon sama sa unsa kana nga pagbati. Naguol gihapon siya nga wala niya mapugngi ang pikas team sa pag-iskor sa nakapadaog nga goal.
Si Eli mitupad og lingkod kang Juan ug Makell samtang gisugdan ni Sister Young ang klase. Dayon miagulo si Kate. Usahay lisud alang kang Kate ang magpundo sa paglingkod tungod kay sakit ang iyang lawas.
“Kate, gisakitan ka karon?” Nangutana si Sister Young.
Misugod sa paghilak si Kate.
“Tingali makatabang ang usa ka kanta sa Primary,” miingon si Sister Young.
Misugod sa pagkanta ang klase. Ganahan si Kate og musika. Kasagaran moapil siya sa pagkanta pinaagi sa paghimo og malipayon nga mga tingog. Apan karon, mihilak lang si Kate.
Unsaon namo pagtabang ni Kate nga mas maayo ang bation? Naghunahuna si Eli.
Dayon aduna siyay nahunahunaan nga ideya. “Nakahibalo na ko!” Gisultihan ni Eli si Sister Young. “Akong iduso-duso ang wheelchair ni Kate.”
Nakakita si Eli kon giunsa sa mama ni Kate sa pagduso og hinay sa iyang lingkuranan kon gikinahanglan ni Kate nga mas maayo ang bation. Dali siyang miduol kang Kate ug misugod sa pagtuya-tuya og hinay sa iyang wheelchair.
Mihunong si Kate sa paghilak.
“Pwede nga ako na sab?” Mihangyo si Juan.
“Ako sab.” Miingon si Makell.
Samtang mitudlo si Sister Young sa leksyon, si Eli ug ang iyang mga higala nagpuli-puli sa pagduso sa wheelchair ni Kate. Mipahiyom si Kate. Daw mas mihayag ang tibuok kwarto.
Sa pagtapos sa klase, ang tanan nagpahiyom.
“Ang pagtabang kang Kate nakapalipay kanako,” miingon si Eli.
“Nalipay ko,” miingon si Sister Young. “Nakapalipay usab kini sa Langitnong Amahan. Gimahal Niya si Kate ug gusto nga mas maayo ang iyang bation. Usahay kita ang mahimong Iyang mga katabang.”
Mitan-aw si Eli kang Kate. “Mitabang ka usab kanako,” misulti siya kaniya. “Matag higayon nga mopahiyom ka.”
Mingisi si Kate.
Samtang padulong nga mopauli si Eli gikan sa simbahan, mibati siya nga sama kainit sa dulaanan og football sa usa ka adlaw sa panahon sa ting-init. Tingali dili nako masalo ang tanang bola sa football, naghunahuna siya. Apan makagamit gihapon ko sa akong mga kamot sa pagtabang sa mga tawo. ●
Mga paghulagway pinaagi ni Melissa Manwill