Digital Lamang: Mga Young Adult
Pagsalig sa Ikaduha nga mga Impresyon ug sa Giya sa Espiritu
Sa dihang una nakong nahimamat si Kurt, dili siya usa ka tawo nga makadala nako ngadto sa templo. Sa unsang paagi kami mouswag sa among relasyon?
Niadtong Pebrero 2013, akong nahimamat ang usa ka batan-ong lalaki nga ginganlan og Kurt sa usa ka salo-salo sa panihapon. Siya lago, walay pamarbas ug wala pa huwasi sa kahubog. Wala kaayo nako siya hatagi og pagtagad. Upat ka bulan ang milabay, nakakita ko og usa ka guwapo nga batan-ong lalaki nga diha-diha dayon nakagusto kaayo ko. Ang among mga dalan nag-abut alang sa tanang lima ka minuto, apan nianang higayona, nakaamgo ko nga siya diay si Kurt—ang samang lago nga lalaki nga akong nahimamat kaniadto. Naghunahuna ko mahitungod sa kausaban sa iyang panagway.
Duha ka semana ang milabay, nasurprisa ko nga nakadawat og mensahe sa text gikan ni Kurt sa pag-apil sa iyang mga higala sa pagpanan-aw og sine. Nagkasumpaki ang akong hunahuna kon moadto ba ko. Giunsa kaha niya pagkuha sa akong numero? Wala pa kaayo ko makaila niini nga lalaki, ang akong unang mga impresyon kaniya dili ang labing mahinungdanon, ug ingon og wala kami kaayoy komon. Nagduhaduha ko nga midesisyon nga moadto gihapon.
Human sa sine, si Kurt midapit kanako nga manihapon, ug niingon lang ko og oo tungod kay gigutom na ko, apan kana nga panihapon ang nakapausab sa tanan. Ang akong unang impresyon kaniya nausab sa dihang akong nahibaloan nga siya usa ka tawo kinsa tinud-anay nga makapahiyom ug makapakatawa kanako. Sayon ra kaayo siya nga ika-istorya, ug diha-diha dayon nagkahigalaay kami.
“Unsay Ginabuhat Nato?”
Paglabay sa panahon, ang among panaghigalaay milambo ug mao usab ang among mga pagbati. Sa wala pa molambo ang usa ka romantiko nga relasyon, aduna akoy pakigbisug sa akong kahiladman; siya dili miyembro sa Simbahan. Nasayud ko nga gusto kong maminyo sa templo ug magpadako sa akong mga anak diha sa ebanghelyo. Gusto ko og mahangturong pamilya. Busa unsa may akong ginabuhat nga nagpalambo og usa ka relasyon uban kaniya?
Nasayud ko nga kinahanglan naa koy buhaton. Usa ka gabii nagdrayb kami pabalik ngadto sa akong balay, ug nangutana ko, “Unsay ginabuhat nato?” Giingnan nako siya nga kinahanglan namo mohunong usa ug dili tugutan ang among panaghigalaay nga molambo og mas labaw pa. Miingon ko nga dili nako gusto nga masakitan ang akong kasingkasing o ang iyang kasingkasing kon kami mosulod sa usa ka relasyon unya magbulag lang tungod kay gusto ko og usa ka kaminyoon sa templo. Giingnan nako siya nga ang kinabuhi dili lang mahitungod kanako, o kanamo, apan mahitungod sa among mga kaugmaon ug umaabut nga mga anak. Miangkon ko nga ako nasayud nga kini binuang ug nga ako nag-una-una ra apan naningkamot ra ko nga magpakatinuod ug moluwas kanamo sa umaabut nga kasakit.
Naminaw siya ug dayon, sa akong kasurprisa, mitubag, “Dad-on tika sa templo.” Nagduha-duha ko kaniya—nganong nakasaad siya niana? Mipasalig siya nako pinaagi sa pagsaad nga modala nako ug naghangyo nako na mosalig kaniya.
Wala gayud ko kahibalo unsay buhaton, apan tingali mao kini ang unang higayon sa akong kinabuhi nga nag-ampo ako uban gayud sa tinuod nga katuyoan. Samtang ako nagpuasa ug nag-ampo sa tibuok nga panaw, kanunay ako nga adunay usa ka mapasaligon nga pagbati nga kini mao ang husto ug sa pagpadayon subay niini nga dalan. Maayo ang akong pagbati sa akong miaging mga relasyon, apan ang pagpakig-uban ni Kurt, sa unang higayon sa akong kinabuhi, husto ang pagbati sa mga butang—dili lang maayo apan husto, ug komportable ang akong gibati.
Uban niana nga pasalig gikan sa Espiritu, miuyon ko nga mosalig ni Kurt ug ipadayon ang among relasyon. Nasayud ko nga tingali ang mga butang dili gihapon molampos, apan nasayud usab ko nga sundon gayud nako ang akong pasalig sa kaminyoon sa templo.
Pagsalig sa Ginoo ug Pagpadayon sa Unahan
Misugod si Kurt og pakigkita sa mga misyonaryo. Atol sa mga leksyon, akong nahibaloan nga siya nag-imbestigar sa Simbahan usa na ka tuig kapin sa wala pa mi nagkita. Nadiskobrehan usab nako nga gituyo niya nga wala mangutana nako og bisan unsang relihiyosong pangutana tungod kay gusto siya makahibalo sa kamatuoran sa iyang kaugalingon ug dili itugot ang iyang mga pagbati nga moimpluwensya kaniya.
Nabunyagan siya, ug naminyo ug nasilyohan kami sa Templo sa Hamilton New Zealand usa ka tuig ang milabay. Mituman siya sa iyang saad ngari kanako nga dad-on ako sa templo, ug gihuptan gihapon niya ang iyang mga pakigsaad duol sa iyang kasingkasing. Unom ug tunga ka tuig sa kaminyoon ang milabay, ug kami gihapon adunay usa ka talagsaon nga butang nga nagpadayon. Kami adunay anak nga lalaki kinsa among gipangga, ug naningkamot kami matag adlaw sa pagtudlo kaniya sa ebanghelyo ni Jesukristo.
Nalipay ko nga wala nako gitugot ang akong unang mga impresyon ni Kurt nga mahimong akong katapusan. Dili na siya ang samang tawo nga una nakong nahimamat. Nalipay ko nga misalig ako kaniya ug sa giya sa Espiritu sa among relasyon. Ug mapasalamaton ko nga akong gibarugan ang unsay akong gituohan, alang sa akong kaugalingon ug sa akong umaabut nga pamilya. Nasayud ko nga gusto nakong masilyo sa templo, dili lang kay kini mao ang “husto nga butang nga buhaton,” apan tungod kay ang mga pakigsaad nga atong himoon, ilabi na sa templo, nagbutang kanato sa dalan nga motugot sa atong pamilya nga motubo, molambo, ug mahimong mahangturon. Sama sa larino kaayong gipahayag ni Presidente Russell M. Nelson, “Ang kaluwasan usa ka butang nga may kalabutan sa indibidwal; ang kahimayaan usa ka butang nga may kalabutan sa pamilya” (“Kaluwasan ug Kahimayaan,” Liahona, Mayo 2008, 10).