7 ka mga Sugyot para Magpabiling Konektado sa Linagyo nga Relasyon

Ni Alaina Wangsgaard

Mga Magasin sa Simbahan

Kon ang inyong potensyal nga mahangturong kompanyon layo, aniay mga paagi sa paghimo sa mga butang nga mas sayon.

Ang pagpangita og usa ka mabination, maayo nga tawo nga gusto ninyong ikauban sa inyong kinabuhi mahimong mahagiton. Idugang ang hagit sa pagtinguha og usa ka tawo nga takus sa templo ug anaay mga sumbanan ug gituohan nga susama sa inyo ug duol ra nga nagpuyo aron makauban ug magahinan og panahon, ug mabati kini nga daw imposible kaayo. Apan uban sa imbensyon sa internet, mga video chat, online nga pagpakig-date, ug pagpakig-date nga mga app, ang linagyo nga mga relasyon mas sagad na kay sa kaniadto, mao nga maayong balita alang sa daghang mga Santos sa Ulahing mga Adlaw kinsa nagpuyo sa mga dapit sa tibuok kalibutan nga Simbahan diin ang mga miyembro pipila lang ug lagyo tali sa usag usa.

Maayo gani, gihatagan kita og daghang maayo nga tambag gikan sa atong mga lider sa Simbahan kabahin sa mga relasyon sa pagpakig-date, bisan unsa pa ang gilay-on. Si Elder Jeffrey R. Holland sa Korum sa Napulog Duha Ka mga Apostoles miingon nga kon “gusto [nato] og kasarang, sa kahilwasan, ug seguridad sa pagpakig-date ug paghigugmaay, sa kinabuhi nga minyo ug sa kahangturan,” nan kinahanglan kita “mahimong tinuod nga disipulo ni Jesus” (“How Do I Love Thee?” New Era, Okt. 2003, 8). Gawas niana, aniay pito ka mga sugyot kon unsaon nga magpabiling konektado sa linagyo nga mga relasyon:

Himoa kini nga makanunayon. Pangita og iskedyul nga maayo alang kaninyong duha. Daghang mga magtiayon kinsa miagi sa linagyo nga kasinatian ang miingon nga ang pag-istorya matag adlaw sa telepono o sa video chat mao ang nakahimo sa labing mahinungdanon sa ilang relasyon. Tingali kamo walay panahon nga makig-istorya matag adlaw, apan kamo kinahanglan mo-iskedyul og panahon nga alang lang sa kini nga tawo.
Ihatag kanunay ang 100 porsyento. Ang linagyo nga mga relasyon kasagaran dili molampos kon ang usa o ang duha ka mga tawo dili hingpit nga mopasalig aron molampos kini. Kon kamo mapasaligon sa pagpakita ug pagsulti sa kini nga tawo nga kamo tinud-anay nga nagpakabana kanila, bisan kon kamo lagyo sa usag usa, mas magpabilin kamong konektado ngadto kanila.
Mahinungdanon ang komunikasyon. Kon nagpahigayon sa gi-iskedyul ninyo nga one-on-one nga panahon, pagpokus sa pakig-istorya nga bukas. Ayaw pagpanagana sa pagpaambit sa inyong mga gibati, kon malisud ug negatibo man kini o mapasaligon ug makapahupay. Ang bukas nga pagpahayag niini nga mga butang ang makapalig-on sa inyong relasyon, ug kamo mobati nga suod bisan sa pisikal nga gilay-on.
Mahimong romantiko! Tungod kay ang gilay-on nakapalisud sa inyong duha nga mahimong mabination sa pisikal nga paagi, kinahanglan mangita kamo og laing mga paagi sa pagpakita nga kamo nagpakabana. Kamo makasurpresa kanila uban sa gagmay nga mga mensahe sa tibuok adlaw. Kamo makapahatud og pagkaon o mga bulak ngadto kanila. Ug ang usa ka maayong pagkasulat, sinsero nga sulat nga gipadala pinaagi sa koreyo kanunay gayud makadaog!
Pagmugna og espirituhanong koneksyon. Sulayi paghimo og usa ka sinemana nga home evening o debosyonal nga magkauban. Tan-aw og usa ka pakigpulong sa kinatibuk-ang komperensya ug hisguti unsay inyong nakat-unan, o ribyuha ang leksyon sa Dali, Sunod Kanako alang niana nga semana. Ang pagpalig-on sa inyong espirituhanong koneksyon makapalig-on usab sa inyong romantikong koneksyon!
Paggahin og panahon nga makigkita sa personal. Ang makita ang usag usa diha sa screen sa dili piho nga panahon dili gayud kanunay igo. Kutob sa mahimo kanunay, sulayi paghimo og mga plano nga makigkita sa personal. Ayaw gastoha ang tanan ninyong kwarta aron magkita sa usag usa kanunay, apan sulayi sa pagbisita ang usag usa labing minos kausa matag pipila ka bulan kon ang panagbulag dugay.
Kanunay nga magmatinuoron. Ang labing importante nga bahin sa komunikasyon mao ang pagkamatinuoron. Pahibaloa kana nga tawo unsa ang inyong gibati ug unsa ang inyong mga gidahum sa inyong relasyon. Kinahanglan kamong duha nakapokus sa samang mga kalihokan o mga resulta para ang inyong relasyon molampos, ug ang paagi lang nga mahitabo kini mao nga kamong duha mopili nga magmatinuoron sa usag usa. Kon buhaton ninyo kana, ang inyong relasyon molambo ug mahimong usa ka butang nga mopanalangin kaninyo sa kahangturan.

Labaw sa tanan, hinumdumi nga ang mga relasyon sa pagpakig-date—duol man o layo—kinahanglan nga nakabase sa panaghigalaay. Sama sa gisulti ni Sister Susan W. Tanner, kanhi Kinatibuk-ang Presidente sa Young Women, “Ang panaghigalaay mao ang pundasyon diin ang pagpangulitawo ug kaminyoon kinahanglan nga pagatukuron ug mahimong molambo” (“Making Dating Smooth Sailing,” New Era, Okt. 2004, 28).