Hello gikan sa Germany!
Hi, kami si Margo ug Paolo.
Kuyugi kami samtang bisitahon namo ang Germany!
Ang Germany, o Deutschland, usa ka nasud nga anaa sa tungang bahin sa Europe. Kini adunay mga lasang ug mga suba, mga bukid ug mga baybayon, ug mga baranggay ug dagkong mga siyudad. Mga 13 ka milyon ka mga bata ang nagpuyo sa Germany.
Ang Germany adunay mga 20,000 ka kastilyo. Daghan niini gatusan ka tuig na ang gidugayon. Kini maoy usa ka inila nga kastilyo nga gitawag og Neuschwanstein.
Ang sauerkraut, sausage, ug Spätzle (noodles) maoy kinaham nga mga pagkaon sa Germany.
Adunay duha ka templo sa Germany. Ang usa anaa sa Freiberg, ug ang lain anaa sa Frankfurt, diin nagpuyo kining bata nga lalaki. Ang timaan nag-ingon, “Tempel der Kirche Jesu Christi der Heiligen der Letzten Tage” (Templo sa Ang Simbahan ni Jesukristo sa mga Santos sa Ulahing mga Adlaw).
Ang mga batang babaye ug lalaki malingaw nga moapil sa Primary.
Ang Germany naila sa mga merkado niini sa Pasko. Ang mga pamilya ganahang motan-aw sa maanindot nga mga suga ug mokaon sa lamian nga mga pagkaon!
Ingon niini tan-awon ang Giya nga Basahon sa Kabataan sa German. Ang mga bata sa Germany naggamit niini aron makat-on ug molambo. Giunsa man ninyo paggamit ang inyong giya nga basahon sa inyong dapit?
Sa unang adlaw sa primary nga eskwelahan, ang matag bata makadawat og satchel (backpack), usa ka pencil case, ug “school cone” (Schultüte o Zuckertüte) nga puno sa mga kendi ug gagmay nga mga gasa.
Himamata ang pipila sa among mga higala gikan sa Germany!
Ang akong paborito nga istorya sa Basahon ni Mormon mao ang pagbisita ug pagtudlo ni Kristo sa katawhan. Gusto nakong sundon ang sugo ni Kristo nga dili maghukom. Kon mas mobasa ako mahitungod sa mga pagtulun-an sa Manluluwas, mas mobati ako sa Iyang gugma ug kalinaw.
Lelia A., edad 10, Franconia, Germany
Nasayud ko nga kon mosunod ko sa mga sugo, maangkon nako ang kasiguroan ug seguridad sa pagpabilin diha sa dalan nga mopadulong ngadto sa Dios. Kanunay nakong masayran nga nagbuhat ako sa matarung kon akong bation ang Espiritu Santo.
Kaleb A., edad 12, Franconia, Germany
Taga-Germany ka ba? Sulati kami! Ganahan kaming makadungog gikan kanimo.
Salamat sa pagsuhid sa Germany uban namo. Magkita kita sa sunod higayon!
Mga paghulagway pinaagi ni Katie McDee; litrato sa batang lalaki sa atubangan sa timaan sa Frankfurt Germany Temple pinaagi ni Fernanda Rudloff; stock photography pinaagi sa AdobeStock ug Getty Images