“Grasya,” Mga Hilisgotan ug mga Pangutana (2023)
Giya sa Pagtuon sa Ebanghelyo
Grasya
Ang gasa sa Dios nga gugma, kaluoy, ug tabang
Ang Dios nahigugma ug nagpakabana nimo ug sa kada usa sa Iyang mga anak. Siya maluluy-on nga naghatag kanato og balaanong tabang, nga gitawag sa kasulatan og “grasya.” Ang grasya sa Dios nahimong posible tungod sa Pag-ula ni Jesukristo. Kitang tanan masayop gyod sa atong mga paningkamot nga tumanon ang mga sugo sa Dios, maong dili ta takos o makadawat sa gasa sa grasya. Hinuon, ang grasya libre nga gihatag sa Langitnong Amahan, nga nagpahimong posible nga madawat nato ang daghang mga panalangin. Kon maningkamot ka nga mapadako ang imong hugot nga pagtuo kang Jesukristo, maila nimo ang dili maihap nga mga ehemplo sa Iyang grasya ug maayong kabubut-on diha sa imong kinabuhi.
Unsa Ang Grasya?
Ang grasya mao ang gasa sa balaanong tabang ug kusog nga atong madawat gikan sa Langitnong Amahan pinaagi sa Pag-ula ni Jesukristo. Ang mga kasulatan kasagaran naghisgot sa grasya isip ang makaabag nga gahom ug ang espirituhanon nga pagkaayo nga gitanyag pinaagi sa Iyang kaluoy ug gugma. Ang tanang panalangin ug malumong kaluoy sa Dios modangat kanato pinaagi sa grasya ni Jesukristo.
Katibuk-ang pagpasabot sa hilisgotan: Grasya
May kalabotan nga mga giya sa pagtuon sa ebanghelyo: Jesukristo, Pag-ula ni Jesukristo, Kaluwasan, Hugot nga Pagtuo kang Jesukristo, Pagsunod sa Ebanghelyo ni Jesukristo
Seksiyon 1
Pangitaa ang Grasya sa Dios sa Imong Kinabuhi ug Mabati Nimo ang Iyang Abunda nga Gugma
Kon motuo ka sa Langitnong Amahan ug kang Jesukristo, makita nimo kon unsa ka dako ang Ilang gibuhat para nimo, tungod lang kay gihigugma ka Nila. Kita makadawat og daghang panalangin gikan sa Dios, ilhon man nato nga gikan kini sa balaanong tinubdan o dili. Ang ubang panalangin gitagana lamang niadtong nagtinguha sa pagsunod sa mga sugo sa Langitnong Amahan, naghinulsol sa mga sala, ug mapaubsanong moduol Kaniya diha sa pag-ampo nga mangayo sa unsay ilang gikinahanglan. Pero walay usa nato ang makadawat sa tabang ug giya sa Dios (tan-awa sa Mga Taga-Roma 3:23–24; Mosiah 2:20–21). Ang tanang balaang panalangin gihatag pinaagi sa grasya sa Dios.
Ang pagsabot sa balaanong grasya makahatag nimo og pagsalig nga tinguhaon ang tabang sa Dios kada adlaw kay Siya maluluy-on ug andam nga mogamit sa balaanong gahom para nimo (tan-awa sa Mga Hebreohanon 4:14–16; Moroni 8:3). Ang mortal nga kinabuhi ni Jesukristo usa ka ehemplo sa espirituhanong pag-uswag ug pagdawat sa kahingpitan sa mga panalangin pinaagi sa grasya sa Langitnong Amahan (tan-awa sa Doktrina ug mga Pakigsaad 93:12–13). Gidapit ka ni Jesukristo nga moduol ngadto Kaniya ug sa Dios nga Amahan ug dawaton ang Ilang grasya aron hingpit kang mapanalanginan ug mahimaya sama Nila (tan-awa sa Doktrina ug mga Pakigsaad 93:19–20).
Mga butang nga angayang hunahunaon
-
Si Nephi mipahayag, “Ang akong kalag nahimuot diha sa grasya [sa Ginoo],” (2 Nephi 11:5). Unsa ang kahulogan sa grasya sa Dios para nimo? Ngano kahang gigamit ni Nephi ang pulong nga nahimuot aron ihulagway ang iyang gibati bahin sa grasya sa Dios?
-
Si President Dieter F. Uchtdorf mitudlo, “[Usa ka] elemento sa grasya sa Dios mao ang pag-abli sa mga bintana sa langit, diin ang Dios mobu-bu og mga panalangin sa gahom ug kalig-on, naghimo kanato sa pagkab-ut sa mga butang nga unta lisod nato nga kab-oton.” Unsang mga lakang ang imong tingaling himoon aron madawat ang mga panalangin sa balaanong gahom ug kusog nga andam ipakigbahin kanimo sa Dios?
Kalihokan alang sa pagkat-on uban sa laing mga tawo
-
Dapita ang mga sakop sa imong grupo nga basahon ang Ether 12:27. Hisgoti ang mga pananglitan sa mga kahuyang nga kasagaran masinati sa mga anak sa Dios. Hisgoti ang kausaban nga posibleng moabot sa usa ka tawo pinaagi sa balaanong gahom sa grasya sa Dios. Dapita ang mga miapil nga hinumdoman ang mga panahon dihang ilang nabati ang gahom sa grasya sa Dios. Dapita sila nga ipakigbahin ang ilang mga kasinatian kon angay.
Pagkat-on pa og dugang
-
1 Mga Taga-Corinto 2:9; 2 Mga Taga-Corinto 12:9–10; Ether 12:41; Moroni 10:32–33
-
Dieter F. Uchtdorf, “Ang Gasa sa Grasya,” Liahona, Mayo 2015, 107–10.
-
Brad Wilcox, “His Grace Is Sufficient,” Ensign, Sep. 2013, 35–37.
-
“His Grace: Change Is Possible through Christ” (video), ChurchofJesusChrist.org.
Seksiyon 2
Naluwas Ka pinaagi sa Grasya ni Jesukristo
Si propeta Lehi mipasabot nga “walay tawo nga makapuyo sa atubangan sa Dios, gawas pinaagi sa mga maayo nga buhat, kaluoy, ug grasya sa Balaang Mesiyas,” (2 Nephi 2:8). Ang labing dako nga pagpakita sa gugma sa Dios mao ang Pag-ula ni Jesukristo, lakip ang Iyang Pagkabanhaw. Tungod niana nga sakripisyo, nga gitanyag pinaagi sa grasya ni Jesukristo, Iya kitang giluwas gikan sa permanenteng pagkaulipon sa kamatayon ug nagbukas sa kahigayonan nga makahinulsol ta sa atong mga sala ug makapangayo og kapasayloan.
Ang Dios dili mopugos ni bisan kinsa nga dawaton ang Iyang grasya ug mobalik sa Iyang presensya. Busa, mihangyo Siya nato nga “ipakig-uli ang [atong] kaugalingon ngadto sa kabubut-on sa Dios, ug dili sa kabubut-on sa yawa ug sa unod; … pinaagi lamang sa grasya sa Dios nga [kita] maluwas” (2 Nephi 10:24). Isip mapaubsanong mga sumusunod, moduol kita kang Jesukristo pinaagi sa hugot nga pagtuo, paghinulsol, bunyag, pagdawat sa Espiritu Santo, ug pagpaningkamot sa pagtuman sa Iyang mga sugo. Sa pagbuhat niini, atong gipakita ang atong tinguha nga himoon ang kutob sa atong makaya samtang giila nga ang Iyang grasya ang miluwas kanato (tan-awa sa 2 Nephi 25:23).
Mga butang nga angayang hunahunaon
-
Basaha ang 2 Nephi 25:23 ug ikonsiderar ang mosunod nga panabot gikan ni Presidente Dieter F. Uchtdorf:
“Kita wala maluwas ‘tungod’ sa tanan nga atong mabuhat. Aduna bay usa kanato nga nakabuhat sa tanan nga atong mabuhat? …
“Ako nakasiguro nga si Nephi nahibalo nga ang grasya sa Manluluwas nagtugot ug naghimo kanato sa pagbuntog sa sala. Maoy hinungdan nga si Nephi naghago nga makugihon aron sa pagdasig sa iyang mga anak ug mga kaigsoonan ‘sa pagtuo kang Kristo, ug aron makig-uli sa Dios’ [2 Nephi 25:23].
“Total, mao kana ang unsay atong mahimo! Ug kana ang atong tahas dinhi sa mortalidad!”
Nganong importante nga lantawon ang grasya isip gasa imbes usa ka butang nga maangkon?
Kalihokan alang sa pagkat-on uban sa laing mga tawo
Pagkat-on pa og dugang
-
Dallin H. Oaks, “Have You Been Saved?,” Ensign, May 1998, 55–57
Seksiyon 3
Ang Grasya Naghatag Nimo og Kalig-on nga Higugmaon ug Alagaran ang Dios ug ang Uban
Ang Bible Dictionary namahayag, “Kini … pinaagi grasya sa Ginoo nga ang mga indibidwal, pinaagi sa hugot nga pagtuo sa Pag-ula ni Jesukristo ug paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi” (“Grasya”).
Isip sumusunod ni Jesukristo, makadawat ka og balaanong tabang sa pag-alagad sa Dios ug sa uban sama kang Apostol Pablo, nga nakaobserbar, “Mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13). Kon kita gitawag aron moalagad sa gingharian sa Dios, himoon kita Niyang kwalipikado pinaagi sa paghatag nato og grasya aron matuman ang Iyang buluhaton (tan-awa sa Alma 26:11–13). Ang gasa sa grasya naghatag usab sa mga indibidwal ug dugang kusog aron maatubang ang mga hagit sa kinabuhi (tan-awa sa Mosiah 24:14–15; Alma 31:30–35, 38).
Mga butang nga angayang hunahunaon
-
Hunahunaa ang pagbali og gamayng sanga sa usa ka kahoy o sagbot. Ikonsiderar kon unsay mahitabo sa sanga human mabulag gikan sa tinubdan. Basaha ang Juan 15:1–11. Unsay gusto ni Jesus nga masabtan sa Iyang mga disipulo bahin sa gahom nga Iyang ginatanyag sa mga anak sa Dios? Sa unsang paagi makatabang kini nga baroganan aron mas masabtan nimo kon sa unsang paagi ang grasya makapalig-on nimo sa imong pagpaningkamot sa pagpangalagad sa uban?
Kalihokan alang sa pagkat-on uban sa laing mga tawo
-
Tan-awa ang bidyo nga “The Atonement Enables Us” (2:18). Hisgoti ang epekto sa grasya sa Dios sa atong mga paningkamot nga himoon ang maayong mga buhat. Nganong importante nga mag-ampo para sa grasya sa Ginoo dihang nagtinguha kitang moserbisyo ug mangalagad sa uban?
Pagkat-on pa og dugang
-
2 Mga Taga-Corinto 9:8; Jacob 4:7; Doktrina ug mga Pakigsaad 50:40–44
-
David A. Bednar, “The Atonement and the Journey of Mortality,” Ensign, Apr. 2012, 40–47.