Oposisyon sa Tanang mga Butang

Ni Elder Dallin H. Oaks

Sa Korum sa Napulog Duha ka mga Apostoles

Ang oposisyon magtugot kanato sa pagtubo sa unsay gusto sa atong Langitnong Amahan nga atong makab-ot.

Ang sentro sa ebanghelyo ni Jesukristo mao ang plano sa Amahan alang sa kaluwasan alang sa mahangturong paglambo sa Iyang mga anak. Kana nga plano, nga gipasabut diha sa modernong pagpadayag, makatabang sa atong pagsabut sa daghang butang nga atong sagubangon sa mortalidad. Ang akong mensahe magtutok sa mahinungdanong tahas sa oposisyon niana nga plano.

I.

Ang katuyoan sa mortal nga kinabuhi sa mga anak sa Dios mao ang paghatag og kasinatian nga gikinahanglan “sa paglambo ngadto sa kahingpitan ug sa katapusan makakab-ot sa ilang balaanong kapalaran ingon nga mga manununod sa kinabuhing dayon.” Sama sa gitudlo ni Presidente Thomas S. MonsonMolambo kanato kaganihang buntag, molambo kita pinaagi sa paghimo og mga pagpili, diin kita gisulayan aron makita nga kita mosunod ba sa mga sugo sa Dios (tan-awa sa Abraham 3:25). Aron masulayan kinahanglan nga duna kitay kagawasan nga mopili tali sa mga kapilian. Sa paghatag og mga kapilian diin atong magamit ang atong kabubut-on, kinahanglan nga kita dunay oposisyon.

Ang uban pa diha sa plano mahinungdanon usab. Kon makapili ta og sayop—kay dili kana kapugngan—mabulingan kita sa sala ug kinahanglang malimpyuhan aron makapadayon sa atong mahangturon nga destinasyon. Ang plano sa Amahan naghatag og paagi sa paghimo niini, sa pamaagi sa pagtagbaw sa mahangturong mga kinahanglanon sa hustisya: usa ka Manluluwas mibayad sa kantidad aron kita matubos gikan sa atong mga sala. Kana nga Manluluwas mao si Ginoong Jesukristo, ang Bugtong Anak sa Mahangturon nga Amahan, kansang maulaon nga sakripisyo—kansang pag-antus—mibayad sa kantidad sa atong mga sala kon kini atong hinulsulan.

Usa sa pinakamaayong pagpasabut sa planado na nga tahas sa oposisyon makita sa Basahon ni Mormon, sa mga pagtulun-an ni Lehi ngadto sa iyang anak si Jacob.

“Kay kini gikinahanglan gayud, nga adunay katugbang sa tanan nga mga butang. Kay kon wala, … ang pagkamatarung dili gayud mapahinabo, ni ang pagkadautan, ni ang pagkabalaan ni ang pagkauyamot, ni ang pagkamaayo ni ang pagkangil-ad” (2 Nephi 2:11; tan-awa usab sa bersikulo 15).

Agig sangputanan, miingon si Lehi, “ang Ginoong Dios mihatag ngadto sa tawo nga siya molihok alang sa iyang kaugalingon. Busa, ang tawo dili makalihok alang sa iyang kaugalingon gawas kini siya pagadanihon sa usa o sa lain” (bersikulo 16). Sa samang paagi, sa modernong pagpadayag miingon ang Ginoo, “Ug kinahanglan gayud nga ang yawa motintal sa mga katawhan, o sila dili mahimo nga molihok alang sa ilang mga kaugalingon” (D&P 29:39).

Ang oposisyon gikinahanglan sa Tanaman sa Eden. Kon si Adan ug si Eva wala mopili para mapaila ang pagka-mortal, gitudlo ni Lehi nga, “sila unta magpabilin diha sa usa ka kahimtang nga walay sala, … walay gihimo nga maayo, kay sila wala makasinati og sala” (2 Nephi 2:23).

Sukad sa sinugdanan, ang kabubut-on ug oposisyon maoy sentro sa plano sa Amahan ug sa pagsupak ni Satanas batok niini. Sigun sa gipadayag sa Ginoo kang Moises, didto sa konseho sa langit si Satanas “nagtinguha sa paglaglag sa kabubut-on sa tawo” (Moises 4:3). Kana nga paglaglag maoy resulta sa mga kondisyon nga gitanyag ni Satanas. Miadto siya sa atubangan sa Amahan ug miingon, “Tan-awa, ania ako, ipadala ako, ako mahimo nga imong anak, ug ako motubos sa tanan nga mga katawhan, nga walay usa ka kalag nga mawala, ug sa pagkatinuod ako mobuhat niini; busa ihatag kanako ang imong dungog” (Moses 4:1).

Sa ingon, si Satanas misugyot nga buhaton ang plano sa Amahan sa paagi nga mapugngan ang katumanan sa katuyoan sa Amahan ug ihatag kang Satanas ang Iyang himaya.

Ang sugyot ni Satanas magsiguro sa hingpit nga pagkapatas: kini “motubos sa tanang katawhan,” nga walay usa ka kalag nga mawala. Walay kabubut-on o walay bisan usa nga makapili ug, mao nga wala kinahanglana ang oposisyon. Walay pagsulay, walay kapakyasan, ug walay kalampusan. Walay kalamboan aron makab-ot ang katuyoan nga gitunguha sa Amahan para sa Iyang mga anak. Nakarekord sa mga kasulatan nga ang oposisyon ni Satanas misangput sa “gubat didto sa langit” (Pinadayag 12:7), diin tanan gawas sa one third sa mga anak sa Dios nakaangkon og katungod nga makasinati og mortal nga kinabuhi pinaagi sa pagpili sa plano sa Amahan ug pagsalikway sa pagsukol ni Satanas.

Ang tuyo ni Satanas mao nga ihatag sa Amahan ngadto kaniya ang dungog ug gahum (tan-awa sa Isaias 14:12–15; Moises 4:1, 3). “Busa,” miingon ang Amahan, “tungod kay si Satanas misukol batok kanako, … Ako nagsugo nga siya isalikway” (Moises 4:3) uban sa tanang espiritu nga migamit sa ilang kabubut-on nga mosunod kaniya (tan-awa sa Judas 1:6; Pinadayag 12:8–9; D&P 29:36–37). Gisalikway nga walay mga lawas dinhi sa mortalidad, si Satanas ug ang iyang mga sumusunod motintal ug molingla ug moulipon sa mga anak sa Dios (tan-awa sa Moises 4:4). Busa ang panulay, kinsa misupak ug nagtinguha sa pagguba sa plano sa Amahan, sa pagkatinuod ang nangunay niini, tungod kay ang oposisyon ang hinungdan nga dunay pagpili ug ang oportunidad nga makapili sa husto maoy modala ngadto sa kalamboan nga maoy tuyo sa plano sa Amahan.

II.

Mahinungdanon usab, nga ang tintasyon sa pagpakasala dili lamang mao ang matang sa oposisyon sa mortalidad. Gitudlo ni Amahang Lehi nga kon ang Pagkapukan wala mahitabo, si Adan ug si Eva “magpabilin diha sa usa ka kahimtang nga walay sala,walay hingpit nga kalipay, kay sila wala makasinati sa pagkauyamot” (2 Nephi 2:23). Kon walay masinati nga oposisyon sa mortalidad, “ang tanan nga mga butang kinahanglan nga malangkob ngadto sa usa” diin walay kalipay o pagkauyamot (bersikulo 11). Busa, miingon si Amahang Lehi, human gihimo sa Dios ang tanang butang “sa pagpahigayon sa iyang walay katapusan nga mga katuyoan sa sangputanan sa tawo, … gikinahanglan gayud nga dunay usa ka katugbang; gani ang gidili nga bunga kaatbang sa kahoy sa kinabuhi; ang usa tam-is ug ang lain pait” (bersikulo 15). Ang iyang pagtulun-an niining bahina sa plano sa kaluwasan gitapos niining mga pulonga:

“Apan tan-awa, ang tanan nga mga butang nahimo diha sa kaalam kaniya kinsa nasayud sa tanan nga mga butang.

“Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (verses 24–25).

Ang oposisyon sa lisud natong mga kahimtang sa mortalidad kabahin usab sa plano nga makadugang sa atong kalamboan sa mortalidad.

III.

Tanan kita makasinati og mga oposisyon aron kita masulayan. Ang uban niini mao ang mga tintasyon sa pagpakasala. Ang uban mga mortal nga hagit gikan sa personal nga sala. Ang uban bug-at kaayo. Ang uban gaan ra. Ang uban walay hunong, ug ang uban mga yugto lang. Walay usa nato nga makalikay. Ang oposisyon magtugot kanato sa pagtubo sa unsay gusto sa atong Langitnong Amahan nga atong makab-ot.

Human nakompleto ni Joseph Smith ang paghubad sa Basahon ni Mormon, kinahanglan pa niyang mangita og tigmantala. Dili kadto sayon. Ang kakomplikado niining taas kaayong manuskrito ug ang gasto sa pagprinta ug paghimo sa liboan ka mga kopya sa basahon makalisang. Unang giduol ni Joseph si E. B. Grandin, tag-iya sa printer sa Palmyra, kinsa mibalibad. Giadto usab niya ang laing printer sa Palmyra, ug gibalibaran usab siya. Mibiyahe siya sa Rochester, 25 miles (40 km) ang gilay-on, ug giadto ang ilado kaayo nga tigmantala sa western New York, kinsa mibalibad usab kaniya. Laing tigmantala sa Rochester ang miuyon, apan ang mga kahimtang naghimo niini nga dili madawat.

Mga semanang milabay, si Joseph tingali naglibug na tungod sa oposisyon sa pagtuman sa balaan nga gisangon kaniya. Wala kadto buhata sa Ginoo nga sayon, apan gihimo niya nga kadto posible. Ikalimang paningkamot ni Joseph, ang ikaduha niyang pagduol sa tigmantala nga taga-Palmyra nga si Grandin, nagmalampuson.

Mga tuig ang milabay, labihan kapait ang pagkapriso ni Joseph sa Liberty Jail sulod sa daghang bulan. Dihang nag-ampo siya og kahupayan, giingnan siya sa Ginoo nga “kining tanan nga mga butang makahatag kanimo og kasinatian, ug alang sa imong kaayohan” (D&P 122:7).

Tanan kita nakaila na sa ubang matang sa mortal nga oposisyon nga dili gumikan sa personal natong mga sala, lakip ang mga sakit, pagkaangol, ug kamatayon. Gipasabut ni Presidente Thomas S. Monson:

“Pipila kaninyo dunay mga panahon nga maghilak mo sa pag-antus, naghunahuna nganong ang atong Langitnong Amahan motugot nga mag-antus mo niana nga mga pagsulay. …

“Ang atong mortal nga kinabuhi, hinoon, wala himoa nga sayon o padayong makahimuot. Ang atong Langitnong Amahan … nasayud nga makakat-on kita og molambo ug mamahimong hanas pinaagi sa lisud nga mga hagit, labihang kasubo, ug lisud nga mga pagpili. Matag usa kanato makasinati og sakit nga panahon kon mamatyan kita og minahal, kasakit kon mawagtangan kita sa kahimsog, pagbati nga biniyaan kon ingon og napasagdan na kita sa atong mga gimahal. Kini ug ubang mga pagsulay naghatag kanato og tinuoray nga pagsulay sa atong abilidad sa paglahutay.”

Ang atong paningkamot nga molambo sa pagbalaan sa adlawng Igpapahulay nagpakita og dili kaayo makaluya nga ehemplo sa oposisyon. Anaa ang sugo sa Ginoo nga tahuron ang Igpapahulay. Ang uban natong mga pagpili mahimong supak niana nga sugo, apan ang ubang pagpili kon unsaon sa paggamit ang oras sa Igpapahulay mag-agad lamang kon buhaton ba nato ang maayo o mas maayo o labing maayo.

Sa paghulagway sa oposisyon sa pagpanintal, ang Basahon ni Mormon naghulagway og tulo ka pamaagi kon unsaon kita sa paggamit sa panulay sa katapusang mga adlaw. Una, siya “mohimo og kayugot sa mga kasingkasing sa mga katawhan, ug mokutaw kanila ngadto sa kasuko batok niana nga maayo” (2 Nephi 28:20). Ikaduha, siya “mohupay, ug mopakatulog kanila ngadto sa kalibutanon nga kasiguroan, nga sila moingon: Ang tanan maayo sa Zion; oo, ang Zion mouswag, ang tanan maayo” (bersikulo 21). Ikatulo, moingon siya nato nga “walay impyerno; ug … ako dili yawa, kay walay yawa” (bersikulo 22), ug busa walay husto ug sayop. Tungod niini nga oposisyon, gipasidan-an kita nga dili “magpakahamugaway sa Zion!” (bersikulo 24).

Sa balaan nga misyon sa Simbahan ug kita sa personal natong kinabuhi ingon og nag-atubang og nagkadakong oposisyon. Tingali samtang magkalig-on ang Simbahan ug kitang mga miyembro magtubo sa atong pagtuo ug kamasulundon, gipalig-on usab ni Santanas ang iyang oposisyon aron padayon kita nga adunay “katugbang sa tanan nga mga butang.”

Ang uban niini nga mga oposisyon gani maggikan sa mga miyembro sa Simbahan. Ang uban nga mogamit og personal nga pangatarungan o kaalam sa pagbatok sa propetikanhong direksyon magbutang-butang og label nga hinulaman gikan sa mga pinili sa katawhan—“maunungon nga oposisyon.” Bisan og tukma kini sa demokrasya, walay kaangayan ang ingon niining konsepto sa gingharian sa Dios, diin tahuron ang mga pangutana apan dili ang oposisyon (tan-awa sa Mateo 26:24).

Isip laing sanglitanan, dunay daghang butang sa atong nag-una nga kasaysayan sa Simbahan, sama sa gihimo o wala buhata ni Joseph Smith sa matag sitwasyon, nga gigamit sa uban nga basihan sa ilang pagka-oposisyon. Sa tanan moingon ko, gamita ang hugot nga pagtuo ug salig sa mga pagtulun-an sa Manluluwas nga kinahanglan natong “maila pinaagi sa ilang mga bunga” (Mateo 7:16). Ang Simbahan naghimo og dakong paningkamot nga mahimong dayag nga anaa sa atong mga rekord, apan human nato kini mamantala, usahay ang atong mga miyembro dunay importanting mga pangutana nga dili masulbad pinaagi sa pagtuon. Mao kana ang bersyon sa kasaysayan sa Simbahan sa “oposisyon sa tanan nga mga butang.” Ang ubang butang makat-unan lamang pinaagi sa hugot nga pagtuo (tan-awa sa D&P 88:118). Ang saligan gyud nato sa tanan mao ang atong hugot nga pagtuo sa saksi nga atong nadawat gikan sa Espiritu Santo.

Ang Dios tagsa rang mopugong sa kabubut-on sa Iyang mga anak pinaagi sa pagsagang batok sa uban alang sa kaayohan sa uban. Apan mopagaan gayud siya sa gibug-aton sa atong mga kasakit ug molig-on kanato aron mapas-an kini, sama sa iyang gihimo sa mga katawhan ni Alma sa yuta sa Helam (tan-awa sa Mosiah 24:13–15). Dili Siya makapugong sa tanang katlgman, apan makatubag Siya sa atong mga pag-ampo sa pagpadaplin niini, sama sa Iyang gihimo sa talagsaong unos nga mihulga nga mapugngan ang pagpahinungod sa templo sa Fiji; o dili Niya pugngan ang mga epekto niini, sama sa Iyang gihimo sa pamumba sa terorista nga mikalas og daghang mga kinabuhi didto sa Brussels airport apan nakadaot lamang sa atong upat ka mga misyonaryo.

Pinaagi sa tanang mortal nga oposisyon, anaa kanato ang kasiguroan sa Dios nga Siya “nagpahinungod sa [atong] mga kasakit alang sa [atong] kaugalingon” (2 Nephi 2:2). Natudloan usab kita nga sabton ang atong mortal nga mga kasinatian ug Iyang mga sugo sa kinatibuk-ang kahulugan sa Iyang talagsaong plano sa kaluwasan, nga nagsulti kanato sa katuyoan sa kinabuhi ug naghatag kanato og kasiguroan sa usa ka Manluluwas, kansang pangalan ako mopamatuod sa kamatuoran niining mga butanga. Sa pangalan ni Jesukristo, amen.