Motabang sa Pagluwas: Mahimo Nato Kini
Ni Elder Mervyn B. Arnold
Sa Seventy
Gihatag sa Ginoo ang tanang gikinahanglan nga mga himan aron makatabang kita sa pagluwas sa atong mga dili kaayo aktibo ug dili miyembro nga mga higala.
Klaro nga nasabtan sa Manluluwas ang Iyang misyon sa pagluwas sa mga anak sa atong Langitnong Amahan, kay namahayag Siya:
“Kay ang Anak sa tawo mianhi sa pagluwas sa nawala. …
“[Kay] dili kabubut-on sa [inyong] Amahan nga anaa sa langit, nga mawala bisan usa niining mga gagmay.”
Ang akong mahigugmaong inahan, si Jasmine Bennion Arnold, klaro nga nakasabut sa iyang tahas nga motabang sa pagluwas sa samdan o nawala nga karnero sa atong Amahan, lakip na ang kaugalingon niyang mga anak ug mga apo. Pagkatalagsaon sa tahas nga mabuhat sa mga apohan diha sa kinabuhi sa ilang mga apo.
Kasagaran i-assign si mama nga mag-visiting teaching niadtong nanlimbasug sa ilang pagtuo, sa mga dili kaayo aktibo ug part-member family; hinoon, ang grupo nga iyang giatiman naglakip sa pipila nga wala siya gi-assign nga bisitahan. Sa kasagaran ang iyang pagbisita dili lang kausa sa usa ka bulan, samtang hilum siya nga naminaw, nangalagad sa masakiton, ug mihatag og mahigugmaong pagdasig. Sa katapusang pipila ka bulan sa kinabuhi ni Mama, napundo siya sa balay, mao nga migahin siya og daghang oras sa pagsulat nila, pagpahayag sa iyang gugma, pagpakigbahin sa iyang pagpamatuod, ug pagbayaw niadtong miduaw niya.
Samtang kita motabang sa pagluwas, hatagan kita sa Dios og gahum, kadasig, ug mga panalangin. Sa dihang gimanduan niya si Moises nga luwason ang mga anak sa Israel, nahadlok si Moises, sama sa daghan nato nga nahadlok. Nangatarungan si Moises, nga nag-ingon, “Dili ako ang tawo nga madanihong mosulti, … kay ako mahinay nga mamulong, ug yongit sa dila.”
Gipasaligan sa Ginoo si Moises:
“Kinsa man diay ang nagbuhat sa ba-ba sa tawo? … dili ba ako man, ang Ginoo?
“Busa karon lumakaw ka, kay ako magauban sa imong ba-ba, ug magatudlo kanimo kong unsa ang imong igasulti.”
Sa ato pa, giingnan sa Ginoo si Moises, “Mahimo nimo kana!” Ug abi ninyo kon unsa, mahimo usab nato!
Ipakigbahin nako ang upat ka mga baruganan nga makatabang sa atong mga paningkamot sa pagluwas.
Baruganan 1: Kinahanglang Dili Kita Maglangay nga Motabang sa Pagluwas
Si Elder Alejandro Patanía, usa ka kanhi Area Seventy, misaysay sa istorya bahin sa iyang manghud nga lalaki nga si Daniel, nga milawig sa dagat aron mangisda kuyog sa iyang mga tripulante. Sa wala madugay, nakadawat si Daniel og dinalian nga pasidaan nga usa ka dakong unos ang paspas nga nagsingabut. Diha-diha dayon, gisugdan ni Daniel ug sa iyang mga tripulante ang pagpaingon sa pantalan.
Samtang nagkakusog ang unos, ang makina sa usa ka barko nga pangisdaan diha sa duol mihunong sa pag-andar. Gikab-itan kini og kable sa mga tripulante ni Daniel ug gisugdan ang pagguyod niini paingon sa luwas nga dapit. Nanawag sila sa radyo og tabang, kay nasayud nga, tungod sa nagkakusog nga unos, nagkinahanglan sila og dinalian nga abag.
Samtang ang mga minahal sa kinabuhi mabalak-on nga nagpaabut, ang mga representante gikan sa coast guard, sa asosasyon sa mga mangingisda, ug sa navy nagtagbo aron madesisyunan ang labing maayo nga estratehiya sa pagluwas. Ang uban gusto nga mobiya diha-diha dayon apan giingnan nga maghulat sa usa ka plano. Samtang kadtong anaa sa unos padayon nga nangayo og tabang, ang mga representante nagpadayon sa miting, naningkamot nga magkasabut bahin sa tukma nga protokol ug usa ka plano.
Sa dihang ang pundok nga moluwas naorganisar na sa katapusan, miabut ang katapusang panawagan. Ang naghaguros nga unos miputol sa kable tali sa duha ka barko, ug ang mga tripulante ni Daniel mibalik aron tan-awon kon maluwas pa ba nila ang ilang mga kaubang mangingisda. Sa katapusan, ang duha ka barko nalunod, ug ang mga tripulante niini, lakip na sa igsoon ni Elder Patanía nga si Daniel, nangamatay.
Gitandi ni Elder Patanía kini nga trahedya ngadto sa tambag sa Ginoo sa dihang Siya miingon,“Wala ninyo palig-una, … [o] pabalikon ninyo pag-usab kadtong ginapatlaag sa halayo, … [o] pangitaon ninyo kadtong nawala; … ug akong panilngon ang akong mga karnero diha sa [inyong] kamot.”
Gipasabut ni Elder Patanía nga, samtang kinahanglan gayud nga organisado kita diha sa atong mga council, korum, auxiliary, ug bisan isip indibidwal, kinahanglang dili kita maglangay nga motabang sa pagluwas. Usahay daghang semana ang molabay samtang maghisgot kita kon unsaon pagtabang ang mga pamilya o mga indibidwal nga anaa sa espesyal nga panginahanglan. Atong sabutan kon si kinsa ang mobisita nila ug ang pamaagi nga buhaton. Sa samang higayon, ang nawala natong mga kaigsoonan padayon nga nanginahanglan ug usahay nanawag pa gani ug nangamuyo alang sa tabang. Kinahanglan nga dili gayud kita maglangay.
Baruganan 2: Kinahanglang Dili Gayud Kita Mohunong
Si Presidente Thomas S. Monson, nga klarong nanawagan nga motabang sa pagluwas, miingon, “Ang atong mga miyembro kinahanglang mapahinumduman nga dili pa gyud ulahi kon bahin na sa atong … dili kaayo aktibo nga mga miyembro … kinsa gikonsiderar nga wala nay paglaum.”
Sama sa daghan ninyo, akong napakigbahin ang ebanghelyo ngadto sa pipila kinsa nabunyagan sa wala madugay o napaaktibo, ug ang uban—sama sa akong dili miyembro nga higala nga si Tim ug sa iyang dili kaayo aktibo nga asawa, si Charlene—milungtad pa og dugay nga panahon.
Sobra sa 25 ka tuig nga giistoryahan nako si Tim bahin sa ebanghelyo ug gidala sila si Tim ug Charlene sa mga open house sa templo. Ang uban miapil sa pagluwas; pero mibalibad si Tim sa matag imbitasyon nga makigkita sa mga misyonaryo.
Usa ka tapus sa semana gisangunan ko nga modumala sa usa ka komperensya sa stake. Gihangyo namo ang stake president nga magpuasa ug mag-ampo kon kinsay among bisitahan. Nakuratan ko sa dihang gihatag niya nako ang pangalan sa akong higala nga si Tim. Sa dihang ang bishop ni Tim, ang stake president, ug ako nanuktok sa pultahan, giablihan kini ni Tim, mitan-aw nako, mitan-aw sa bishop, ug dayon miingon, “Bishop, abi nako nga miingon ka nga magdala ka og espesyal nga tawo!”
Dayon mikatawa si Tim ug miingon, “Dali sulod, Merv.” Usa ka milagro ang nahitabo nianang adlawa. Nabunyagan na si Tim karon, ug siya ug si Charlene na-sealed na sa templo. Kinahanglang dili gayud kita mohunong.
Baruganan 3: Unsa Kadako ang Inyong Kalipay Kon Kamo Makadala Bisan Usa ka Kalag ngadto kang Kristo
Daghang katuigan na ang milabay sa usa ka kinatibuk-ang komperensya, naghisgot ko kon giunsa ni José de Souza Marques pagsabut ang mga pulong sa Manluluwas nga “kon adunay tawo uban kaninyo nga lig-on diha sa Espiritu, himoa nga siya modala kaniya nga nagluya, nga siya unta … mahimo nga malig-on usab.”
Nahibalo si Brother Marques sa pangalan sa matag sakop sa iyang priests quorum ug nakaamgo nga nawala si Fernando. Gipangita niya si Fernando sa iyang balay, dayon gipangita siya sa balay sa iyang higala, ug miadto pa gani sa baybayon.
Nakit-an ra niya si Fernando sa katapusan nga nag-surf sa dagat. Wala siya magduha-duha hangtud nalunod ang barko, sama diha sa istorya ni Daniel. Dali siyang miubog sa tubig aron luwason ang nawala niyang karnero, midala niya sa pagpauli nga nagmaya.
Gisiguro dayon niya pinaagi sa padayon nga pangalagad nga dili na gayud mobiya sa pundok si Fernando.
Tuguti ko nga i-update mo kon unsay nahitabo sukad nga naluwas si Fernando ug ipakigbahin ang kalipay nga moabut tungod sa pagluwas sa usa lang ka nawala nga karnero. Naminyo si Fernando sa iyang hinigugma, nga si Maria, didto sa templo. Karon duna na silay 5 ka anak ug 13 ka apo, nga ang tanan aktibo sa Simbahan. Daghan pang mga paryente ug ilang mga pamilya ang mipasakop usab sa Simbahan. Sa kinatibuk-an misumiter sila og liboan ka mga pangalan sa ilang katigulangan aron makadawat og mga ordinansa sa templo, ug padayon nga miabut ang mga panalangin.
Nagserbisyo karon si Fernando isip bishop sa ikatulong higayon, ug nagpadayon siya sa pagluwas, sama nga siya giluwas. Mipakigbahin siya bag-o lang, “Sa among ward, duna mi 32 ka aktibong mga batan-ong lalaki sa Aaronic Priesthood, 21 nila naluwas sulod sa miaging 18 ka bulan.” Isip mga indibidwal, pamilya, korum, auxiliary, klase, ug mga home ug visiting teacher, mahimo nato kana!
Baruganan 4: Bisan Unsa Pa ang Atong Edad, Gitawag Kita Aron Motabang sa Pagluwas
Si Presidente Henry B. Eyring namahayag, “Bisan pilay atong edad, kapasidad, calling sa Simbahan, o dapit, kita usa ra nga gitawag sa buhat sa pagtabang [sa Manluluwas] alang sa Iyang pag-ani og mga kalag hangtud sa Iyang pagbalik.”
Matag adlaw nagkadaghan sa atong mga anak, mga kabatan-onan, mga young single adult, ug hamtong nga mga miyembro sa lain-laing pangidaron ang mipatalinghug sa klaro nga panawagan sa Manluluwas nga motabang sa pagluwas. Salamat sa inyong mga paningkamot! Tuguti ko nga mopakigbahin og pipila ka mga ehemplo:
Si Amy, 7 anyos, miimbitar sa iyang amiga nga si Arianna ug sa iyang pamilya ngadto sa iyang tinuig nga programa sa Primary sa sakrament miting. Paglabay sa pipila ka bulan, si Arianna ug ang iyang pamilya nabunyagan.
Si Allan, usa ka young single adult, nadasig nga mopakigbahin sa mga video sa Simbahan, sa Mormon Messages, ug mga bersikulo sa kasulatan ngadto sa tanan niyang higala gamit ang social media.
Si Sister Reeves nagsugod sa pagpakigbahin sa ebanghelyo sa matag telemarketer nga manawag.
Giimbitar ni James ang iyang dili miyembro nga higala nga si Shane ngadto sa bunyag sa iyang anak nga babaye.
Gipadad-an ni Spencer og link ang iyang dili kaayo aktibo nga igsoong babaye sa pakigpulong ni Presidente Russell M. Nelson sa komperensya ug mireport, “Gibasa niya ang pakigpulong, ug duna nay paglaum.”
Gihatag sa Ginoo ang tanang gikinahanglan nga mga himan aron makatabang kita sa pagluwas sa atong mga dili kaayo aktibo ug dili miyembro nga mga higala. Kitang tanan makahimo niini!
Gidapit nako ang matag usa ninyo nga mopatalinghug sa panawagan sa Manluluwas nga motabang sa pagluwas. Mahimo nato kini!
Matinud-anon kong mopamatuod nga ako nasayud nga si Jesus mao ang Maayong Magbalantay, nga Siya nahigugma kanato, ug nga Siya mopanalangin kanato samtang motabang kita sa pagluwas. Nasayud ko nga Siya buhi; nasayud ko niini. Sa pangalan ni Jesukristo, amen.