Unsa, Ngano, ug Giunsa: Usa ka Detalyado nga Paghulagway sa Pagpahiuli
Aron makatudlo sa ebanghelyo, kinahanglang makahimo ka sa pagpasabut unsa ang apostasiya, mga dispensasyon, ug ang Pagpahiuli. Kini nga tsart makatabang.
Ingnon ta nga anaa ka sa usa ka semana nga paglaag-laag sa baybayon uban sa pamilya sa imong higala. Daghan kaayo mo og kalingawan, apan misugod ang imong kamingaw sa imong kaugalingong pamilya. Unya ang imong papa mipadala nimo og text message aron mangumusta—mao gayud kini ang imong gikinahanglan aron mobati nga gimahal ug gihinumduman.
Ang kinabuhi sa yuta morag ingon niana. Ang Dios dili mopadala kanato og mga text, apan layo kita sa atong langitnong panimalay, busa usa ka paagi nga ang Langitnong Amahan makapadayag sa Iyang gugma alang kanato mao ang pagpadala og mga propeta.
Dispensasyon
Mga paghulagway pinaagi ni Ben Simonsen
Ang mga propeta mangulo sa unsay gitawag nga mga dispensasyon, mga yugto sa panahon diin (1) ang Dios adunay labing minos usa ka awtorisado nga lider sa priesthood dinhi sa yuta ug (2) kini nga lider, usa ka propeta, direktang nakakat-on sa plano sa kaluwasan gikan sa Dios. Ang propeta dayon motudlo, o modispensar, sa ebanghelyo ngadto sa katawhan.
Tungod sa mga kasulatan, nahibalo kita mahitungod sa daghang mga dispensasyon. Ang pipila sa mga importante mao kadtong sa kang Adan, Enoch, Noe, Abraham, Moises, Jesukristo, ug Joseph Smith. Ang Ginoo misugod og dispensasyon pinaagi sa matag usa niini nga mga propeta.
Apostasiya
Apostasiya=pagkadautan. Kon ang usa ka indibidwal o grupo mopalayo sa mga kamatuoran sa ebanghelyo ni Jesukristo, mosalikway sa mga propeta, ug magpakasala, sila anaa sa apostasiya.
Unsaon Pagkahitabo sa Apostasiya
Ang Dios motawag og propeta, kinsa motudlo sa tinuod nga ebanghelyo ni Jesukristo.
Bulahan ang mga tawo nga mosunod sa mga pagtulun-an sa propeta.
Pipila sa mga tawo mahimong mapasigarbuhon ug mosalikway sa propeta.
Ang Ginoo kasagaran mokuha sa Iyang propeta gikan sa mga tawo nga mosalikway sa mga baruganan sa ebanghelyo.
Kon sakto na ang panahon, ang Dios motawag og bag-ong propeta aron sa pagpahiuli sa kamatuoran, sa priesthood, ug sa Simbahan.
Pagpahiuli
Ang usa ka pagpahiuli mao ang buhat sa pagbalik sa usa ka butang ngadto sa orihinal nga kondisyon niini. Dili kini repormasyon, nga mousab sa usa ka butang nga anaa na aron mohimo og bag-o. Sama pananglit, kon gusto nimong ipahiuli ang usa ka karaan nga balay, tukuron nimo kini og balik nga sama sa orihinal nga desinyo niini. Tingali gusto nimong modugang og bag-ong fireplace, apan niana giusab na nimo ang balay, wala na mopahiuli niini.
Ang ebanghelyo ni Jesukristo kinahanglan nga ipahiuli tungod kay nawala kini panahon sa Dakong Apostasiya. Ang mga tawo nagpuyo sulod sa daghang mga siglo nga walay tinuod nga Simbahan. Busa ang Ginoo mipahiuli sa Iyang Simbahan ug sa ebanghelyo pinaagi ni Joseph Smith, sama sa gipanagna sa karaang mga propeta (tan-awa sa Isaias 2:1–3; 29:13–14; Mga Buhat 3:19–21; Pinadayag 14:6–7; 2 Nephi 3:3–15).
Ang tinuod nga ebanghelyo ni Jesukristo kanunay nga maanaa dinhi—busa padayon ka ba nga magmatinud-anon niini? Bisan kon ang kalibutan mag-anam sa pagkahimong dautan, ang Simbahan ni Jesukristo magpabilin hangtud sa katapusan.
Ikaw adunay himoong pagpili—ang samang pagpili nga giatubang sa mga tawo sukad sa sinugdanan sa panahon: imo bang sundon ang propeta? Kon imong buhaton, mapanalanginan ka ug magiyahan sa Espiritu.
Adan
Si Adan usa ka tinuod nga pioneer: siya ang unang tawo dinhi sa yuta ug ang unang propeta! Gitudloan niya ang iyang pamilya sa ebanghelyo, apan bisan sa sinugdanan, daghan ang “nangita sa ilang kaugalingon nga mga kaalam diha sa kangitngit” ug misalikway sa kamatuoran (Moises 6:28).
Enoch
Nakadungog ka na ba og tibuok siyudad nga gidala ngadto sa langit? Nan, ang siyudad sa Zion—nga gi-establisar ni Enoch—hilabihan ka matarung nga ang mga tawo mipuyo uban sa Dios (tan-awa sa Moises 7:23).
Noe
Nahibalo na ka sa arka ni Noe. Walo lamang ka tawo—ang pamilya ni Noe—ang naluwas gikan sa Lunop tungod kay naminaw sila sa mga pasidaan ni Noe (tan-awa sa Genesis 7; Moises 8). Apan nasayud ba kamo nga nakadawat siya sa priesthood sa dihang siya 10 anyos pa (tan-awa sa D&P 107:52) ug nga ang “mga higante … nagtinguha sa paghunos sa kinabuhi ni Noe”? (Moises 8:18).
Abraham
Si Abraham hapit gisakripisyo sa dautan nga mga pari, apan usa ka anghel miluwas kaniya (tan-awa sa Abraham 1). Aduna siyay pipila ka talagsaon nga mga pagpadayag, lakip ang usa ka panan-awon mahitungod sa pre-mortal nga kinabuhi. Ang mga miyembro sa Simbahan iyang mga kaliwatan, ug ang pakigsaad ni Abraham gipangalan kaniya. (Tan-awa sa Abraham 2–5.)
Moises
Si Moises nangulo sa mga Israelite gikan sa Ehipto ug mitabang kanila nga makaangkon og kagawasan. Siya “nagtinguha nga makugihon sa pagbalaan sa iyang mga katawhan nga unta sila makakita sa nawong sa Dios; apan sila nagpatig-a sa ilang mga kasingkasing ug dili makalahutay sa iyang atubangan” (D&P 84:23–24). Gani, tungod sa ilang pag-apostasiya, nahisalaag sila sa kamingawan sulod sa 40 ka tuig!
Jesukristo
Wala lamang mitudlo si Jesukristo sa ebanghelyo ug mihimo og mga milagro, apan gi-establisar usab Niya ang Iyang Simbahan dinhi sa yuta. Gitubos Niya ang atong mga sala ug gilansang sa krus ug nabanhaw aron makahimo kita sa pagbuntog sa espiritwal ug pisikal nga kamatayon. Siya mao ang pangulo sa Iyang Simbahan karon, ug Siya ug ang Langitnong Amahan mao ang tinubdan sa awtoridad sa priesthood.
Ang Dakong Apostasiya
Human sa Pagkabanhaw sa Manluluwas, ang Iyang mga Apostoles ug ubang mga lider sa Simbahan naningkamot sa pagsangyaw sa ebanghelyo, apan ang mga tawo misalikway sa ilang mga pagtulun-an ug gani mipatay sa ubang mga Apostoles. Tungod sa pagkadautan sa katawhan, ang kahingpitan sa ebanghelyo nawala sa kalibutan. Ang kalibutan nahiagum sa espiritwal nga kangitngit (tan-awa sa Isaias 60:2).
-
Sa sobra 1,000 ka tuig, ang katawhan walay kahigayunan nga makaangkon sa mga ordinansa sa kaluwasan, sa mga panalangin sa templo, o sa giya sa usa ka propeta.
-
Ang bililhong mga kamatuoran nangawala sa Biblia.
-
Ang sayop nga mga ideya gitudlo mahitungod sa tinuod nga kinaiyahan sa Dios.
-
Ang ubang mga ordinansa sa kaluwasan giusab o gitudlo nga sayop (tan-awa sa Isaias 24:5).
-
Kini nga apostasiya sa ngadto-ngadto miresulta sa pagtumaw sa daghang mga simbahan.
Ang Repormasyon
Panahon sa Dakong Apostasiya, ang relihiyuso og panghunahuna nga mga tawo sa Europe nakaamgo nga ang ebanghelyo ni Jesukristo wala gitudlo sa hustong paagi. Kini nga mga reformer dili mga propeta, apan gibuhat nila ang ilang pinakamaayo sa pagtudlo sa kamatuoran sumala sa ilang pagsabut niini. Mitabang sila nga mahimong anaa ang Biblia alang sa daghang tawo. Daghan ang nakig-away alang sa relihiyusong kagawasan ug mihimong posible sa Pagpahiuli sa ebanghelyo.
Joseph Smith
Busa ang kahingpitan sa ebanghelyo nawala ba gayud sa hangtud? Wala! Gipadayag pag-usab sa Dios ang importante nga mga kamatuoran ngadto ni Joseph Smith. Ang langitnong mga mensahero mipahiuli sa tanang gikinahanglan nga mga yawe sa priesthood ngadto kaniya (tan-awa sa D&P 27:8–13; 110; 128:18–21), nga naghimo niini nga “kapaigoan [dispensasyon] sa kahingpitan sa panahon” (D&P 138:48). Naila usab kini isip ang ulahing mga adlaw tungod kay kini mao ang katapusang dispensasyon sa dili pa ang Ikaduhang Pag-anhi ni Jesukristo.
Ang Pagpahiuli
Tag-ana kon unsa? IKAW nakabaton sa mga panalangin sa Pagpahiuli. Oo, ikaw!
-
Ang Simbahan ni Jesukristo gipahiuli nga adunay usa ka propeta ug mga apostoles nga nangulo niini.
-
Ang Basahon ni Mormon, Doktrina ug mga Pakigsaad, Perlas nga Labing Bililhon, ug uban pang moderno nga pagpadayag mipahiuli sa bililhong mga kamatuoran nga nawala (tan-awa sa 2 Nephi 27).
-
Nadawat ni Joseph Smith ang Aaronic Priesthood gikan ni Juan Bautista (tan-awa sa D&P 13) ug ang Melchizedek Priesthood gikan nila ni Apostol Pedro, Santiago, ug Juan (tan-awa sa D&P 128:20).
-
Ang awtorisadong mga naghupot sa priesthood mopahigayon sa mga ordinansa sa kaluwasan sa tukmang paagi.
-
Ug nasayud kita nga ang kamatuoran dili na gayud mawala pag-usab tungod sa usa ka apostasiya (tan-awa sa Daniel 2:44).