Ang Buhatan ni Abuelo sa mga Sapatos
Ang tagsulat nagpuyo sa Utah, USA.
“Kabalo ka, kinahanglang mas mahimo kitang sama niini nga sapatos,” miingon si Lolo.
“‘Gikasubo ko’, dili kanunay sayon isulti” (Children’s Songbook, 98).
Giablihan ni Miguel ang pultahan ngadto sa buhatan sa iyang abuelo (iyang lolo) sa mga sapatos. Iyang napanimahoan ang panit nga gitrabaho ni Abuelo. Usa kini sa iyang paborito nga baho.
“Hi, Abuelo!”
Si Abuelo nagluhod ug nagsubay sa tiil sa kustomer diha sa usa ka piraso nga papel. Wala siya mohangad. Dili kaayo maayo ang pangdungog ni Abuelo.
Milingkod si Miguel sa talad trabahoanan. Mitan-aw siya sa nagsapaw-sapaw nga ginunting nga mga panit. Gihunahuna niya unsay buhaton ni Abuelo sa matag usa, gamit ang iyang martilyo ug pliers.
Ang mga himan mipahinumdom ni Miguel og laing butang nga iyang ganahan. Si Abuelo kanunay nga mohatag niya og usa ka piraso nga kendi matag higayon nga motabang si Miguel sa pagpanglimpyo.
Apan gigutom na si Miguel karon! Nasayud siya nga dili siya angay nga mokuha og pagkaon nga dili mananghid, apan morag magkapuliki pa sa trabaho si Abuelo. “Tingali dili na ko kinahanglang mohulat pa,” naghunahuna si Miguel.
Mikab-ut si Miguel sa ilawom sa estante alang sa garapon sa kendi. Puno kini sa iyang paborito nga mga kendi—tam-is ug halang-halang nga gibutangan og chili powder! Sa iyang pag-abli niini, may gibati si Miguel nga pagkadili komportable. Apan lamian kaayo tan-awon ang kendi. Nagdali siya ug gibutang kini sa iyang ba-ba.
Wala madugay mibiya ang kustomer. Mikuha si Abuelo og usa ka piraso nga panit ug gituslob kini sa tubig. Nakatabang kini nga mahumok ang panit ug sayon trabahoon.
Gidali-dali og kaon ni Miguel ang kendi kutob sa iyang mahimo. Dayon miduol siya ngadto ni Abuelo.
“Hello!” Miingon si Abuelo nga nagpahiyom. “Nalipay ko nga mibisita ka nako.”
Migakos si Miguel kang Abuelo. Nanghinaut siya nga dili makabantay si Abuelo nga mikaon siya og kendi. Giwagtang ni Miguel ang iyang kabalaka.
“Morag busy ka ron,” miingon si Miguel, nga nagtudlo ngadto sa nagsapaw-sapaw nga mga panit. “Nagkinahanglan ka og tabang?”
“Sige! Pwede nimong ipasa kana nga hilo?”
Mikab-ut si Miguel sa usa ka taas nga piraso sa hilo. Gibira niya kini sa iyang duha ka kamot. Mas gahi kini kay sa iyang gituohan.
“Wow, lig-una gud.”
Mikatawa si Abuelo. “Kinahanglan gayud, aron makalahutay sa grabe nga paggamit sa mga tawo.” Gibira ni Abuelo ang hilo agi sa panit. Dayon makita sa iyang nawong ang unsay giingon ni Mama usahay nga ang “Maalamong Abuelo” nga dagway.
“Kabalo ka, kinahanglang mas mahimo kitang sama niini nga sapatos,” misulti si Abuelo nga miyango.
Mitan-aw og maayo si Miguel sa panit. “Um. Kita?”
“Oo, sa tinuod lang. Kinahanglan kitang magpabiling lig-on. Nianang paagiha ang mga tintasyon ni Satanas dili makabuntog kanato.”
Ang pula nga kendi misantup sa hunahuna ni Miguel. Nasayud siya nga kinahanglan niyang sultihan si Abuelo kabahin niini.
Gikuha ni Abuelo ang usa ka karaang sapatos diha sa estante. “Nakakita ka aning dakong lungag?”
Mahimo tingaling mapasok ni Miguel ang iyang kamot diha sa lungag. “Oo.”
“Gamay ra kini nga lungag kaniadto nga sayon ra untang ayuhon. Apan naglangay sila, ug karon mas lisud na kining ayuhon. Ang ngil-ad nga mga gawi ug ngil-ad nga mga pagpili susama niana nga lungag. Labing maayo nga ayuhon kini og sayo.”
Miyango na usab si Abuelo, ug ang Maalamong Abuelo nga dagway mipahiyom. Nagpadayon sila sa pag-istorya samtang nagtrabaho si Abuelo. Sa tibuok panahon, nagsige og hunahuna si Miguel mahitungod sa pula nga kendi.
Sa dihang nahuman si Abuelo, gitabangan siya ni Miguel sa pagpanglimpyo. Dayon gikuha ni Abuelo ang iyang garapon sa kendi.
Sa katapusan, dili na makaagwanta si Miguel. “Mikuha ko og usa sa imong mga kendi!” kalit niyang gisulti.
Gibutang ni Abuelo ang garapon. “Unsa to?”
Gisultihan siya ni Miguel mahitungod sa iyang pagkuha sa kendi nga wala mananghid. “Pasayloa ko, Abuelo! Dili na gyud ko mousab, mosaad ko!”
Gigakos og maayo ni Abuelo si Miguel. Maayo na kaayo ang gibati ni Miguel.
“Salamat sa imong pagkamatinuoron. Mas importante kana kanako kay sa bisan unsa.”
Sa iyang pagpauli, gibati ni Miguel nga daw sama sa usa sa bag-ong parisan nga sapatos ni Abuelo. Lig-on kutob sa mahimo, ug andam sa kinabuhi!