Unsaon Nako nga Mabalik ang Kadasig sa Akong Pagtuon sa Kasulatan?

Sarah Keenan

Utah, USA

Tulo ka bulan pa lang akong nauli gikan sa akong misyon sa dihang misugod ko nga manlimbasug sa pagbasa sa mga kasulatan.

Mibasa ko sa mga kasulatan matag adlaw sa akong misyon ug misaad nga magpadayon kon mouli na ko. Apan paglabay sa panahon, daw kanunay nga adunay makababag niini. Mahimong daghan kaayo ko og homework, nagkapuliki sa pagtrabaho, o sobra ra ang kakapoy. Sa matag pangatarungan, nagkamubo ang akong pagbasa sa kasulatan hangtud nga wala na ko magbasahan.

Giukab nako ang Basahon ni Mormon usa ka gabii ug nagplano nga mobasa og usa lang ka bersikulo. Ang bersikulo nga akong gibasa mipahinumdom kanako nga ang mga kasulatan naglangkob sa “makapahimuot nga pulong sa Dios, oo, ang pulong nga makapaalim sa samaran nga kalag” (Jacob 2:8).

Namalandong ko niini nga bersikulo ug nakaamgo sa negatibong epekto ngari kanako sa pagbaliwala sa pagtuon sa kasulatan. Mas mibati ko og kahasol sa eskwelahan, mas walay pagpakabana sa simbahan, ug mas layo sa Dios. Nagkinahanglan ang akong kalag sa makaalim nga pulong sa Dios nga makita diha sa mga kasulatan. Nasayud ko nga kinahanglan nakong han-ayon og usab ang akong mga prayoridad.

Midangup ko sa akong mga higala, pamilya, ug mga lider sa Simbahan aron sa pagpangayo og mga sugyot nga mabalik ang kadasig sa akong pagtuon sa kasulatan. Nakakaplag ko og tulo ka butang nga makatabang.

Una, akong naamguhan nga ang pagtuon sa mga kasulatan sa gabii dili epektibo alang nako. Ang pagtuon sa buntag nakatugot kanako sa pagpamalandong sa tibuok adlaw sa doktrina ug mga baruganan nga akong gibasa nianang buntaga.

Ikaduha, gitudloan kita sa pagbasa sa mga kasulatan uban sa atong mga pamilya, apan tungod kay anaa ako sa kolehiyo ug layo sa akong pamilya, misugod ko sa pagbasa sa mga kasulatan uban sa mga kauban sa kwarto ug mga higala. Nakatabang kini kanako nga magpabiling responsable, ug misangput kini ngadto sa nindot nga mga diskusyon sa ebanghelyo.

Ikatulo, misugod ko sa pagsulat sa mga pag-aghat ug mga hunahuna nga akong nadawat panahon sa pagtuon sa kasulatan. Nakatabang kini kanako nga matutokan ang unsay akong gibasa ug nakatabang nako nga mas makaila sa tingog sa Espiritu.

Sa dihang ang pagtuon sa kasulatan nahimo na usab nga usa ka prayoridad sa akong kinabuhi, akong nakita nga mas aduna akoy panahon ug kalagsik sa pagbuhat sa tanang butang nga kinahanglan nakong buhaton. Labing importante, mibati na usab ako og kasuod ngadto sa Dios samtang nagbasa ug namalandong ko sa mga kasulatan. Karon kon mogahin ko og panahon sa mga kasulatan, mobati ko og kalinaw ug makakita og kaayohan sa akong kalag.