“Lukso sa Suba!”
Elvin Jerome Laceda
Pampanga, Philippines
Paghulagway pinaagi ni Gary Alfonso
Usa ka adlaw gisugo ko sa akong lola sa paghatud sa pagkaon nga iyang giandam ngadto sa akong iyaan. Init kadto nga Sabado sa hapon, ug adunay daghan pang butang nga gusto nakong buhaton kay sa buhaton ang sugo sa akong lola. Ako hinoon siyang giingnan nga ang usa lang sa akong mga ig-agaw ang iyang sugoon, apan miinsister siya nga ako ang mobuhat niini.
Milabay ang usa ka oras, ug misugod ko sa pagbati nga angay nakong buhaton ang gisugo sa akong lola. Akong gikuha ang pagkaon ug mipadulong sa balay sa akong iyaan. Layo kini, ug sa akong pag-abut, wala ko magplano nga mopundo og dugay didto.
Akong nakit-an ang akong iyaan ug ang iyang lima ka bulan nga masuso sa usa ka duyan nga gihigot ngadto sa duha ka punoang mangga. Ang mga punoan anaa sa kilid sa usa ka suba sa luyo sa balay. Milakaw ko padulong nila aron sa paghatud sa pagkaon. Sa kalit lang, ang mga pisi sa duyan naputol. Ang akong iyaan ug ang iyang bata naligid ngadto sa suba. Mibati ko og tumang kahadlok. Dili ko kahibalong molangoy, ug walay laing tawo nga makatabang. Wala ko kahibalo unsa ang buhaton.
Diha-diha dayon, nakadungog ko sa tingog sa Espiritu: “Lukso!”
Sa walay pagduhaduha, milukso ko. Maayo gani, nakit-an nako ang bata sa pipila lang ka segundo, ug ang akong iyaan nakahimo sa paghaw-as gikan sa tubig. Sa akong pagkawas gikan sa tubig uban sa bata, dili ko makatuo sa bag-o lang nga nahitabo. Milukso ko ngadto sa suba nga dili man ko kahibalo molangoy, apan tungod kay naminaw ko sa Espiritu, ang akong ig-agaw nga masuso ug ako naluwas gikan sa pagkalumos.
Naamguhan nako kon unsa ka importante ang pag-ila ug pagpaminaw sa direksyon ug inspirasyon nga ihatag sa Dios kanato pinaagi sa Espiritu Santo. Mapasalamaton ko nga sa katapusan mituman ko sa sugo sa akong lola ug mihatud sa pagkaon ngadto sa balay sa akong iyaan. Nasayud ko nga kinahanglan natong mohimo og mga paningkamot nga mahimong sensitibo sa espiritwal nga mga pag-aghat aron mahimo kitang mga kamot sa Dios sa pagtabang sa Iyang mga anak.