Diha sa Pulpito

Mga Basket ug mga Botelya

Ni Chieko N. Okazaki

Mahitungod ni Sister Okazaki

Si Chieko Nishimura Okazaki (1926–2011) nagdako sa Hawaii, USA, sa usa ka Buddhist nga pamilya nga adunay Hapon nga kagikan. Mipasakop siya sa Simbahan sa dihang 15 anyos siya.

Nianang higayuna, nakaamgo na si Sister Okazaki sa ka komplikado sa iyang kagikan ug kultural nga kahimtang. Nabalaka kon unsay bation sa uban nganha kanila human gibombahan sa militar sa Hapon ang Pearl Harbor, Hawaii, si Sister Okazaki ug ang iyang inahan mipundok ug misunog sa tanang butang nga Hapon nga ilang gipanag-iya. Apan mitan-aw siya sa salamin ug naghunahuna, “Wala pa gyud ko makaadto sa Japan. Dili ko Hapon sa akong kasingkasing. Apan dili nako malimud kon unsa ko. Ang akong mga mata, akong panit, ug akong buhok Hapon.”¹

Si Sister Okazaki misagubang og diskriminasyon tungod sa kaliwatan [racism] sa tibuok niyang kinabuhi. Misugod siya sa pagtudlo wala madugay human ang Ikaduhang Gubat sa Kalibutan sa dihang ang mga sentimento batok sa mga Hapon kusog pa kaayo diha sa Estados Unidos. Tulo ka mga inahan wala motugot nga maanaa sa iyang klase ang ilang mga anak. Apan nadani ra sila ni Sister Okazaki sa wala madugay.²

Si Sister Okazaki ang unang babaye nga nakaserbisyo sa tulo ka auxiliary board sa mga babaye: una diha sa Young Women, dayon sa Primary, dayon sa Relief Society.³

Kini nga mensahe usa ka kinutlo gikan sa iyang pakigpulong sa kinatibuk-ang komperensya sa Abril 1996 mahitungod sa panaghiusa ug panaglahi.

Ang Dios mihatag kanato og daghang mga gasa, daghang panaglahi, ug daghang kalainan, apan ang mahinungdanon mao ang unsay atong nahibaloan mahitungod sa usag usa—nga kitang tanan Iyang mga anak.

Ang atong hagit isip mga miyembro sa Simbahan mao nga kitang tanan makat-on gikan sa usag usa, nga kitang tanan unta mohigugma sa usag usa ug magdungan sa paglambo.

Ang mga doktrina sa ebanghelyo hingpit nga gikinahanglan. Kini mahinungdanon kaayo, apan ang sudlanan opsyonal. Tuguti ko nga mopaambit og yano nga ehemplo aron mapakita ang kalainan tali sa mga doktrina sa Simbahan ug sa kultural nga sudlanan. Aniay usa ka botelya sa peach sa Utah, giandam sa usa ka tagbalay sa Utah aron ipakaon sa iyang pamilya atol sa ting-snow nga panahon. Ang mga tagbalay sa Hawaii dili mopreserbar og mga prutas. Mamupo sila og igong gidaghanon sa prutas alang sa pipila ka adlaw ug tipigan kini sa mga basket nga sama niini alang sa ilang mga pamilya. Kini nga basket adunay mangga, saging, pinya, ug kapayas … gipupo sa usa ka tagbalay nga Polynesian aron ipakaon sa iyang pamilya diha sa klima nga ang mga prutas manghinog sa tibuok tuig.

Ang basket ug ang botelya managlahi nga mga sudlanan, apan ang sulod parehas ra: prutas alang sa usa ka pamilya. Sakto ba ang botelya ug sayop ang basket? Dili, ang duha parehong sakto. Mga sudlanan kini nga haum sa kultura ug mga panginahanglan sa mga tawo. Ug pareho kining haum sa sulod nga gidala niini, nga mao ang prutas.

Karon, unsa man ang [bunga nga] prutas? Si Pablo miingon kanato: “Ang bunga sa Espiritu mao ang gugma, kalipay, kalinaw, pailub, pagkamapuanguron, pagkamaayo, pagkamatinumanon, kaaghop, [ug] pagpugong sa kaugalingon.” [Mga Taga-Galacia 5:22–23]. Diha sa panag-igsoonay sa Relief Society, diha sa panag-igsoonay sa mga korum sa priesthood, diha sa matinahurong panagpundok aron sa pag-ambit sa sakrament, ang bunga sa Espiritu naghiusa kanato sa gugma, kalipay ug kalinaw bisan kon ang Relief Society anaa man sa Taipei o Tonga, bisan kon ang korum sa priesthood anaa sa Montana o Mexico, ug kon ang sakrament miting anaa sa Fiji o sa Pilipinas.

… Sa dihang gitawag ako ngadto sa Kinatibuk-ang Kapangulohan sa Relief Society, si Presidente [Gordon B.] Hinckley mitambag kanako: “Nagdala ka og espesyal nga kalidad ngadto niini nga kapangulohan. Pagailhon ka isip tawo nga nagrepresentar niadtong anaa gawas sa mga utlanan sa Estados Unidos ug Canada. … Ilang makita diha kanimo ang representasyon sa ilang pakighiusa sa Simbahan.” Mihatag siya kanako og panalangin nga moluag ang akong dila samtang mamulong ko sa katawhan.⁴

… [Sa dihang namulong ko sa laing mga dapit] gibati nako ang Espiritu nga midala sa akong mga pulong ngadto sa ilang mga kasingkasing, ug akong gibati “ang bunga sa Espiritu” nga midala balik kanako sa ilang gugma, ilang kalipay, ug ilang pagtuo. Gibati nako ang Espiritu nga mihiusa kanato.

Mga kaigsoonan, kon ang inyong mga prutas mga peach o kapayas man, ug kon gidala ninyo kini sulod sa mga botelya o sa mga basket, salamat sa inyong paghalad niini diha sa gugma. Amahan sa Langit, hinaut nga mahiusa kami ug hinaut nga mamahimo kaming imo⁵ ako nag-ampo sa pangalan sa atong Manluluwas, si Jesukristo, amen.