Mao Kini ang Dapit
Simeon Nnah
Aba, Nigeria
Paghulagway pinaagi ni Allen Garns
Ang akong amahan, usa ka matinud-anong Kristiyano, mitudlo kanako sa pagbaton og pagtuo diha ni Jesukristo. Kana nga pagtuo nakatabang kanako nga makalahutay sa tulo ka tuig nga gubat sibil sa Nigeria sa ulahing bahin sa 1960 sa dihang anaa ko sa kasundalohan. Wala madugay, hinoon, naglibog ko ug mihunong sa pagtambong sa simbahan.
Dihang miabut ko sa Estados Unidos niadtong 1981 aron sa pag-eskwela, gibati nako nga akong gikinahanglan ang Dios sa akong kinabuhi. Sulod sa duha ka tuig mitambong ko og lain-laing mga simbahan sa Boston, Massachusetts, apan walay usa niini nga akong ganahan. Wala nako mabati ang Espiritu, mao nga mihunong ko sa pagpangita.
Wala madugay human ang akong asawa, si Mabel, miapas kanako gikan sa Nigeria niadtong 1984, misugod ang dako nakong tinguha nga magpaduol pag-usab sa Dios ug mahisakop og simbahan. Usa ka higala nga mibisita gikan sa Nigeria wala masayud nga nangita ko og simbahan, apan iya kong gisultihan kabahin sa usa ka simbahan nga iyang nadunggan nga adunay usa ka basahon nga gitawag og Basahon ni Mormon.
Human niana, mipadayon ko sa pagpangita og mga simbahan. Nakakita ko og simbahan nga gitawag og Ang Simbahan ni Jesukristo sa mga Santos sa Ulahing mga Adlaw. Ang pulong nga santos nakakuha sa akong atensyon. Wala ko kahibalo nga adunay simbahan nga ang mga miyembro gitawag og mga santos. Nianang Dominggoha nakahukom ko nga ako kining susihon.
Sa miting sa sakrament nga akong gitambungan, ang kongregasyon nanganta og mga himno uban sa balaang pagtahud, ang mga pari mipanalanginan sa pan ug tubig, ug ang serbisyo gipahigayon ubos sa kahan-ay ug kamapaubsanon. Pagkahuman, samtang milakaw ko ngadto sa lobby ug namalandong sa kalihokan sa simbahan, nakadungog ko sa akong ngalan.
“Simeon,” ang tingog sa Espiritu miingon, “mao kini ang dapit.”
Nianang puntoha, duha ka mga misyonaryo miduol kanako. Ilang gipaila ang ilang kaugalingon ug ang Basahon ni Mormon. Mitan-aw ko nila ug miingon, “Wala koy nasayran kabahin sa Basahon ni Mormon, apan nasayud ko sa Biblia. Andam na ko.”
Gisugdan ko nila sa pagtudlo sa plano sa kaluwasan. Wala kaabut og usa ka bulan, gibunyagan ko. Mipasakop sa Simbahan ang akong asawa wala madugay human niana. Pipila ka tuig human niana, na-seal mi didto sa Washington D.C. Temple ug ang among lima ka anak gi-seal ngari kanamo.
Sulod sa templo, daghang butang ang gipadayag ngari kanako, apan ang mga pulong nga akong nadungog sa akong unang adlaw sa simbahan gikumpirmar kanako sa makadaghang higayon pinaagi sa pagpadayag diha sa templo: “Mao kini ang dapit.” Ang epekto niana nga pamahayag gikan sa Espiritu Santo miusab sa akong kinabuhi ug sa kinabuhi sa akong asawa ug mga anak sa kahangturan.