“Unsay Gipasabot Nato kon Mosulti Kita nga ang Simbahan Tinuod?,” Liahona, Hunyo 2024.
Unsay Gipasabot Nato Kon Mosulti Kita nga ang Simbahan Tinuod?
Gipangulohan sa Manluluwas Mismo, Ang Simbahan ni Jesukristo sa mga Santos sa Ulahing mga Adlaw naghatag og mga pagtulon-an, awtoridad sa pagkapari, mga ordinansa, ug mga pakigsaad nga mogiya kanato balik ngadto sa atong langitnong panimalay.
Ang atong mga kasingkasing kasagaran mobati og maayo kon kita makadungog og usa ka tawo nga mopamatuod, “Nasayod ko nga ang Simbahan tinuod.” Mahinungdanon kana nga butang nga ang Espiritu mohatag og saksi niana nga kamatuoran ngari kanato usab.
Apan ingon og ang kasamtangang mga uso sa kultura nagdala uban kanila og lapad nga pagkawalay pagsalig diha sa mga institusyon sa kinatibuk-an ug sa mas piho nga paagi diha sa relihiyoso nga mga organisasyon. Agig kalainan, ang mga Santos sa Ulahing mga Adlaw mipakigsaad sa pagsuporta sa Ang Simbahan ni Jesukristo sa mga Santos sa Ulahing mga Adlaw sa sukaranan nga misyon niini sa pagtukod sa gingharian sa Dios dinhi sa yuta ug sa pag-establisar sa Zion, tanan agi og malipayon nga pagpaabot sa Ikaduhang Pag-anhi ni Jesukristo. Sa pagbuhat sa ingon, atong giila nga pinaagi lamang sa pormal nga institusyon sa gipahiuli nga Simbahan sa Ginoo nga kadtong bililhon nga mga katuyoan mahimong matuman.
Klaro diha sa Bag-ong Tugon nga atol sa Iyang mortal nga pangalagad, si Ginoong Jesukristo wala lamang midasig sa usa ka komunidad sa mga tumutuo apan miorganisar usab sa Iyang Simbahan uban sa tinawag, gibansay, ug giorden nga mga lider (tan-awa sa Mga Taga-Efeso 4:11–16). Ang Simbahan mahinungdanon ngadto Kaniya. Ang Simbahan karon, ingon kaniadto, “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20; tan-awa usab sa Mateo 16:17–18). Ang Biblia nag-ingon nga human sa Iyang Pagkabanhaw, “matag adlaw gidugangan sa Ginoo ang ilang pundok ug mga tawo nga nangaluwas” (Mga Buhat 2:47).
Unsa man Kon ang mga Lider sa Simbahan Dili Hingpit?
Tingali ang pipila nagpanagana sa pagpamatuod sa kamatuoran sa Simbahan tungod kay sa ilang pamati ang Simbahan ug ang mga lider niini dili hingpit. Tinuod gayod, ni ang Simbahan ni ang mga lider niini hingpit, ni sila nangangkon nga sila hingpit! Importante nga timan-an nga wala bisan asa diha sa mga kasulatan o sa mga pagtulon-an sa mga lider sa Simbahan nga kini gipahayag nga ang katuyoan sa Ginoo mao ang paghingpit sa Simbahan. Hinuon, si Apostol Pablo misulat:
“Ug ang iyang mga gasa mao nga ang uban mahimong mga apostoles, ang uban mga propeta, ang uban mga ebanghilista, ang uban mga pastor ug mga magtutudlo;
“Aron sa pagsangkap sa mga balaan, alang sa buhat sa pagpangalagad, alang sa paglig-on sa lawas ni Kristo:
“Hangtod makakab-ot kitang tanan ngadto sa pagkahiniusa sa pagtuo, ug sa kahibalo mahitungod sa Anak sa Dios, ug ngadto sa kahamtong sa pagkatawo, sa sukod sa gidak-on sa kahingpitan ni Kristo” (Mga Taga-Efeso 4:11–13).
Nan ang katuyoan sa Ginoo mao ang paghingpit sa mga Santos, dili ang paghingpit sa Simbahan. Makakuha kita og tinuod nga kahupayan gikan niana nga baroganan tungod kay kini nagpasabot nga adunay luna diha sa Simbahan sa Ginoo alang kanatong tanan nga dili hingpit nga mga tawo!
Sa pagkatinuod, sa Oktubre 2013 nga kinatibuk-ang komperensiya, si Elder Dieter F. Uchtdorf, kaniadto Ikaduhang Magtatambag sa Unang Kapangulohan, miingon:
“Sa hingpit nga kaprangka, dunay mga higayon nga ang mga miyembro o lider sa Simbahan makahimo og sayop. Dunay mga butang nga nasulti o nabuhat nga wala mahiuyon sa atong mga mithi, baroganan, o doktrina.
“Makaingon ko nga perpekto lamang ang Simbahan kon gipadagan kini sa perpektong mga binuhat. Perpekto ang Dios, ug lunsay ang Iyang doktrina. Apan Siya naglihok pinaagi nato—dili perpekto Niyang mga anak—ug ang dili perpektong mga tawo masayop. …
“Subo lang nga ang uban nangawala tungod sa sayop nga nahimo sa tawo. Apan bisan pa niini, ang mahangtorong kamatuoran sa gipahiuling ebanghelyo nga anaa sa Ang Simbahan ni Jesukristo sa Ulahing mga Adlaw wala mamantsahi, mokunhod, o magun-ob.
“Isip Apostol ni Ginoong Jesukristo ug isip usa sa nakakita gayod sa mga council ug sa gipangbuhat niini nga Simbahan, mohatag ko sa akong balaang pagsaksi nga walay importanting mga desisyon kalabot niini nga Simbahan o sa mga miyembro niini nga gihimo nga wala [matinuorong] magtinguha og inspirasyon, giya, ug pagtugot sa atong Mahangtorong Amahan. Simbahan kini ni Jesukristo. Dili motugot ang Dios nga ang Iyang Simbahan motipas sa katuyoan niini o mapakyas sa pagtuman sa balaan niining tuyo.”1
Usahay atong panalipdan ang usa ka konsepto mahitungod sa paagi nga ang Ginoo modumala sa mga lider ug mga miyembro sa Iyang Simbahan nga dili makaayo kanato. Kita tingali magdahom nga ang Ginoo kinahanglang mokontrol sa tanan nga buhaton sa mga lider ug sa mga nagdumala sa Simbahan aron walay bisan unsang matang nga sayop ang mahimo. Mahimong mas maayo nga moila nga ang Ginoo mohatag og giya ngadto niadto nga mga sulugoon samtang sila mainampoong mobuhat sa ilang labing maayo sa ilang tinagsa-tagsa nga mga tahas sa pagdumala sa Iyang buhat. Mao kana ang paagi nga ang mahigugmaon nga mga ginikanan motudlo sa ilang mga anak.
Ang Ginoo mohatag kanato og giya apan sa kasagaran dili mogamit og pagkontrolar, gawas lang sa mga butang nga adunay direktang kalabotan sa atong kaluwasan. Usab, dili Niya katuyoan ang paghingpit sa Simbahan apan hinuon ang paghingpit sa Iyang mga anak, lakip sa mga lider ug mga nagdumala sa Simbahan. Kini nga sundanan sa dinasig nga mga pagpadagan didto sa punoang Buhatan sa Simbahan dili kaayo lahi kay sa nianang gigamit diha sa mga stake ug mga ward ug mga panimalay.
Samtang ang Ginoo mohatag gayod og direkta nga pagpadayag sa pipila ka higayon, ilabi na ngadto niadtong atong gipaluyohan isip mga propeta, mga manalagna, ug mga tigpadayag, Siya usab naglaom kanato nga motuon sa mga butang sa atong mga hunahuna (tan-awa sa Doktrina ug mga Pakigsaad 9:8–9) ug “magpahinabo sa daghan nga pagkamatarong” (Doktrina ug mga Pakigsaad 58:27) nga dili “[sugoon] diha sa tanan nga mga butang” (bersikulo 26).
Makasalig kita nga ang Ginoo mogiya kanato subay sa dalan sa atong kaluwasan samtang mosunod kita sa apostolikanhon nga mga lider sa Iyang Simbahan. Ug makakuha kita og dakong kahupay gikan sa saad sa Ginoo nga Siya mokompirmar sa matag usa kanato sa kamatuoran sa tanang butang samtang indibidwal kitang magtinguha niini (tan-awa sa Moroni 10:5).
Mga Panalangin diha sa Simbahan ni Jesukristo
Nan unsay gipasabot nato kon mosulti kita nga ang Simbahan tinuod kon wala nato gipasabot nga hingpit kini?
-
Una ug labing importante, gipasabot nato nga kini gipangulohan ni Ginoong Jesukristo Mismo pinaagi sa buhi nga mga propeta ug apostoles.
-
Gipasabot nato nga kini aduna sa tanang kasulatan nga gipadayag sa Dios ug sa matag doktrina ug kamatuoran nga importante alang sa atong kaluwasan.
-
Gipasabot nato nga kini naghupot sa awtoridad sa pagkapari sa pagdumala sa Simbahan ug sa pagpahigayon sa gikinahanglan nga mga ordinansa, ug gipasabot nato nga kadto nga mga ordinansa mahimong balido niini nga kinabuhi ug sa kahangtoran.
-
Gipasabot nato nga kadto kinsa mosunod sa mga lagda niini makabaton og malungtaron nga hingpit nga kalipay niini nga kinabuhi ug sa kahangtoran.
-
Gipasabot nato nga kadto kinsa modawat sa makaluwas nga mga ordinansa ug mosunod sa may kalabotan nga mga pakigsaad, sinsero nga maghinulsol kon gikinahanglan, positibong mahimaya gayod sa celestial nga gingharian sa Dios.
-
Ug ilabi na gipasabot nato nga ang Espiritu Santo mosaksi niini nga mga butang ngadto sa sinsero nga mga nagtinguha sa kamatuoran.
Epektibo ang pagsunod sa mga pagtulon-an sa Simbahan—mohimo kini kanato nga mas maayo nga katawhan, magdala og kalinaw ug hingpit nga kalipay, ug moandam kanato sa pagbalik ngadto sa atong Langitnong Amahan.
“Ang Simbahan mao ang gipanagna nga gingharian sa ulahing mga adlaw, nga wala gilalang og tawo apan gitukod sa Dios sa langit,” gitudlo ni Elder D. Todd Christofferson sa Korum sa Napulog Duha ka Apostoles.2 Importante kaayo nga ang sinsero nga mga tumutuo sa mga kamatuoran nga gipahiuli ni Jesukristo mopanalipod ug maisogong mopamatuod nga Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan” (Doktrina ug mga Pakigsaad 1:30).
Atong gitanyag ang atong tibuok nga gugma ug pagtahod ngadto sa tanan kinsa motuo ug mosunod sa kamatuoran bisan asa man kini makaplagan. Atong gitahod ug gihatagan og bili ang masanagon nga pagkamaayo nga atong naobserbahan diha sa daghan kaayong uban nga mga simbahan, ug kita dili mosaway sa mga gituohan ni bisan kinsa nga grupo o indibidwal. Apan binuang ang paghanduraw nga kita mahimong motuo ni Jesukristo ug sa mga lagda nga Iyang gitudlo ug makadawat sa tibuok nga benepisyo sa mga panalangin ug mga ordinansa nga anaa lamang diha sa Iyang gipahiuli nga Simbahan nga dili motuo, moawhag, ug mopanalipod niana nga Simbahan.
Siyempre, kinahanglan kita nga mopamatuod nga ang ebanghelyo ni Jesukristo, si Propeta Joseph Smith, ang Basahon ni Mormon, ug ubang mga sukaranan tinuod, apan mahinungdanon usab kaayo nga mopamatuod sa kamatuoran sa Simbahan isip usa ka institusyon. Diha sa templo atong makat-onan nga mao kana ang dapit diin nakatutok ang atong pagpahinungod. Samtang mabati nato ang katinuod sa organisasyon nga ang Ginoo Mismo mao ang nagdumala, nan mobati kita nga responsable nga mahimong matinud-anon ngadto sa doktrina ug mga tulumanon nga gitudlo sa Simbahan.
Pagkahimong Matinud-anon ngadto sa Simbahan
Ang mga kamatuoran sa ebanghelyo wala nagkinahanglan sa pagpanalipod ug pag-unong sa mga Santos aron magpabilin kini. Kini tinuod diha ug sa kaugalingon mismo niini. Apan ang tinuohan sa kinatibuk-an mahimong dili gayod klaro nga ingon nga wala niini ang makadasig ni ang makaluwas nga gahom, ug ang mga nagduhaduha mahimong moangkon nga matinuohon (tan-awa sa Santiago 2:19–20). Agig kalainan, ang usa ka lig-on nga pagtuo nga Ang Simbahan ni Jesukristo sa mga Santos sa Ulahing mga Adlaw tinuod ug gigiyahan sa Ginoo mao ang modala sa usa ka tawo nga motambong og mga miting, mobayad og mga ikapulo ug mga halad, moserbisyo diha sa mga calling, modawat og mga ordinansa, ug mosunod sa may kalabotan nga mga pakigsaad. Uban sa klaro nga tinuohan ug lig-on nga pagtuo moabot ang klaro ug lig-on nga mga pasalig. Sa laing pagkasulti, sa higayon nga masayod kita nga kini tinuod, mahimo kitang moral nga obligado sa paglihok nga ingon nga kini tinuod.
Ako magpamatuod nga ako nasayod pinaagi sa personal nga mga kasinatian ug pinaagi sa segurado nga pagsaksi sa Espiritu Santo nga Ang Simbahan ni Jesukristo sa mga Santos sa Ulahing mga Adlaw mao ang tinuod ug buhi nga Simbahan nga gipangulohan ni Ginoong Jesukristo pinaagi sa atong kasamtangang mga propeta ug apostoles. Hinaot nga kita wala lang masayod nga ang Simbahan tinuod apan usab, sa atong mga pulong ug mga buhat, hinaot nga magmatinud-anon kita ngadto sa Simbahan.