Digital Lamang
Ang Gahom sa mga Kanta sa Primary
Ang tagsulat nagpuyo sa Idaho, USA.
Ang kasinatian sa akong anak nga babaye didto sa nursing home nakatabang nako sa pagkaamgo sa dakong ikatabang sa musika sa Primary sa pagpanalangin sa kinabuhi sa matag tawo.
Sa una dihang gitawag ko isip lider sa musika sa Primary, nahadlok kaayo ko. Bisan og naka-piano lesson na ko ug nakakanta kauban sa mga grupo, sa akong kinabuhi wala pa gyod ko makasulay nga mangulo sa pagpanganta. Sa unang bulan sa akong calling, gikahadlokan nako kana nga bahin sa Dominggo kay wala ko mobati nga kwalipikado.
Nianang higayona, ang 21 anyos nakong anak nga babaye, si KennaDee, nagtrabaho sa nursing home sa Veterans Affairs (VA). Si KennaDee ganahang mokanta, ug kanunay niya kining buhaton sa trabahoan. Mokanta siya og pang-musikal nga mga kanta samtang maniudto ang mga nagpuyo didto. Kantahon usab niya ang opisyal nga mga kanta sa mga branch sa militar nga ilang giserbisyohan ug modawat og mga request atol sa paninudo (lakip sa usa ka Kristiyano nga himno nga wala pa niya mahibaloi sa una apan nakat-onan alang sa usa nga nagpuyo didto).
Usa ka babaye nga nagpuyo didto nagpuyo og kinabuhi nga puno sa pag-abuso. Agresibo siya ug dili motugot nga ang mga tig-atiman ang mopakaon, moligo, o moilis og sinina kaniya. Makig-away siya batok sa pagtumar sa iyang mga tambal ug sa bisan unsang matang sa pisikal nga pagsusi. Usa ka adlaw, misunod sa inspirasyon, mikanta ang akong anak nga babaye og mga kanta sa Primary gikan sa Songbook sa mga Bata. Ang maong babaye mikalma diha-diha dayon. Nagpakita siya og pagkapamilyar sa kanta. Ang mga empleyado nakabantay nga kining babayhana mokooperar basta lang si KinnaDee mokanta og mga kanta sa Primary. Makahimo sila sa pag-ilis, pagkaligo, ug pagpakaon kaniya ug paghatag kaniya og mga tambal nga may gamay ra nga pagsupak o pagpugong. Gitudloan pa gani ni KennaDee og pipila ka kanta sa Primary ang ubang sakop sa kawani aron matabangan nila kining maong babaye kon wala sa trabaho si KennaDee.
Human makadungog sa mga istorya sa akong anak nga babaye, nasabtan nako ang laing rason kon nganong ang calling nga pagka-lider sa musika sa Primary mahinungdanon kaayo. Nausab ang akong kinaiya dihang mas nasabtan nako nga ang musika, ilabi na ang relihiyosong musika, mahimong mao lamang ang makatabang sa mga bata sa paglahotay atol sa labing lisod nilang mga pagsulay sa kinabuhi. Gihimo nako nga tumong ang pagtudlo sa mga bata og daghang kanta mahitungod ni Jesukristo kutob sa akong mahimo. Ang mga bata tingale dili mahinumdom og bisan usa nga pakigpulong sa Primary o sa miting sa sakramento, tingale dili sila mahinumdom sa pihong mga leksiyon, ug ang uban tingale mahisalaag gikan sa dalan sa pakigsaad, apan kalagmitan mahinumdoman nila ang mga kanta nga ilang nakat-onan ug unsay ilang gibati gumikan sa mga kanta. Mahitungod sa sitwasyon niini nga babaye, nahinumdoman niya kadtong mga kanta bisan kon wala na siya makahinumdom sa kaugalingon niyang pamilya! Palihog hibaloi unsa kaimportante kini nga calling!