Nahiusa sa Among Mahangtoron nga Simbahan

Ni Angela Okoro-Omaka, Stockholm, Sweden

Human mibalhin gikan sa Nigeria ngadto sa Sweden, naglisod kami sa pagpangita og simbahan nga mabati nga husto alang kanamo. Dayon usa ka adlaw nahimamat nako ang duha ka batan-ong babaye kinsa misulti kanako nga gusto silang makig-istorya kanako mahitungod ni Jesukristo.

Imahe

bana ug asawa nga magkaubang naglingkod ug naggunitay sa mga kamot

Mga litrato pinaagi ni Ashlee Larsen

Ang relihiyon usa ka importante nga bahin sa among mga kinabuhi didto sa Nigeria. Ang akong bana, si Okoro, ug ako adunay dakong hugot nga pagtuo kang Jesukristo ug nahigugma Kaniya. Human nga mibalhin kami sa Sweden, nahurot ang tanan namong panahon sa dihang ang among kaluha natawo og sayo nga kulang pa og tulo ka bulan. Nagpuyo kami sulod sa upat ka bulan didto sa ospital ug wala makaadto sa bisan unsa nga simbahan niadtong higayona.

Kadugayan, gusto kaming moadto sa simabhan pag-usab, apan wala kami makakaplag og simbahan nga mabati nga husto alang kanamo. Gusto kami og simbahan nga ang among tibuok pamilya makatambong sa tibuok namong mga kinabuhi ug sa kahangtoran. Kini nga tinguha nagpadayon sulod sa duha ka tuig, apan nabalaka kami nga nawagtang ang among naandan nga kinaiya nga moadto sa simbahan ug magkaubang pag-ampo isip usa ka pamilya.

Sa dihang usa ka tuig na ang pangidaron sa mga bata, anaa ko sa gawas atol sa usa ka makalilisang nga unos sa niyebe aron makatambong ko sa eskwelahan ug magkat-on og Swedish. Nakadungog ko og usa ka tawo nga mitawag gikan sa akong luyo. Sa dihang milingi ko, nakakita ko og duha ka matahom nga batan-ong mga babaye. Wala ko makasabot sa unsay ilang gisulti apan akong nailhan ang mga pulong nga “Jesukristo.”

Sa dihang ilang naamgohan nga dili ko makasulti og Swedish, nangutana sila, “Makasulti ka ba og Iningles?” Sa dihang gisultihan nako sila nga makasulti ko og Iningles, miingon sila, “Gusto kaming makig-istorya kanimo mahitungod ni Jesukristo.”

“Unsa man kabahin Kaniya?” Nangutana ko. “Nakaila ko Kaniya!”

Nangatawa sila ug mahinamon kaayo nga miduol sila kanako. Nadani ko ug matinguhaon nga mahibalo kon unsay ilang ikasulti. Miingon sila nga mga misyonaryo sila ni Jesukristo, ug miuyon ko nga makigkita kanila pag-usab ug maghisgot og dugang mahitungod ni Jesus. Samtang mibiya ko, mibati ko nga malipayon. Sa dihang milingi ko nila og balik, nagbarog lang sila didto nga nagpakita sa samang kalipay nga akong gibati.

Imahe

babaye nga naglingkod sa lingkoranan

Sa dihang nakaplagan niya ang Simbahan, si Sister Okoro-Omaka “mipagawas og matahom nga mga luha tungod kay malipayon kaayo ko nga mobalik ngadto sa akong Manluluwas.”

Pagbalik ngadto ni Jesukristo

Sa dihang nauli ko gikan sa eskwelahan, gisultihan nako ang akong bana, “Mahal, tag-ana unsa. Akong nakaplagan ang simbahan diin mamahimo kita nga mga miyembro!” Nagkurog ko, mahinamon kaayo ko. Wala ko mahibalo ko diin gikan kining tanan nga mga pagbati, apan malipayon ko sa kahiladman sa akong kasingkasing bahin sa paghimamat sa mga misyonaryo.

Sa wala madugay nagsugod kami sa pagkat-on mahitungod sa gipahiuli nga Simbahan ni Jesukristo uban sa mga misyonaryo. Mipagawas ko og matahom nga mga luha tungod kay malipayon kaayo ko nga mobalik ngadto sa akong Manluluwas. Wala koy mga pangutana mahitungod sa unsay gitudlo nila kanako hangtod nga miabot kami sa Basahon ni Mormon. Naglisod ko sa pagtuo sa bisan unsa mahitungod niini. Apan, ang mga misyonaryo mihangyo kanako sa pagbasa sa Basahon ni Mormon ug sa pag-ampo mahitungod niini. Sinsero akong nag-ampo kada adlaw sulod sa pipila ka semana aron masayod kon kini pulong ba gayod sa Dios, apan wala nako gayod kini basaha.

Human sa pipila ka semana nga walay tubag gikan sa Dios, misakay ko sa usa ka tren alang sa usa ka biyahe paingon sa Stockholm. Samtang nagbiyahe, gikuha nako ang Basahon ni Mormon ug nagsugod sa pagbasa.

Gibasa nako ang pasiuna ug ang Pagpamatuod sa Tulo ka mga Saksi ug ang Pagpamatuod sa Walo ka mga Saksi, ug gibasa nako ang mahitungod ni Joseph Smith. Gibasa nako kini ug gibasa kini ug gibasa kini. Sa panahon nga naabot ko sa Stockholm, naghilak ko, nagkurog, ug nanglimbawot gayod ang balahibo. Gibati nako nga napuno sa Espiritu sa Dios. Nasayod ako gikan sa personal nga pagpadayag kon kinsa gayod si Joseph Smith—nga siya usa ka propeta ug sulugoon sa Dios. Nasayod ako nga gipahiuli sa Ginoo ang ebanghelyo ni Jesukristo dinhi sa yuta pinaagi kaniya.

Ako dayon mituo sa tanan nga gisulti sa mga misyonaryo kanako. Sa dihang nabasa nako sa akong kaugalingon ang Basahon ni Mormon, nasayod ako nga tinuod kini. Gisultihan nako ang mga misyonaryo nga gusto kong magpabunyag. Gidala sa akong bana ang among tibuok nga pamilya aron sa pagpakita sa ilang suporta alang kanako.

Human sa akong bunyag, nagsugod na usab kami sa pag-ampo og dungan isip usa ka pamilya, ug nagsugod ko sa pagtudlo kanila mahitungod sa unsay akong nakat-onan. Wala madugay, mihangyo si Okoro sa pakighimamat og usab sa mga misyonaryo. Madasigon niyang gidawat ang ilang mga pagtulon-an, gibasa ang Basahon ni Mormon, ug nag-ampo mahitungod niini. Nadawat niya ang sama nga tubag nga akong nadawat, ug mihangyo usab siya nga magpabunyag. Sa kataposan, ang among tibuok nga pamilya nahiusa sa among mahangtoron nga Simbahan.