Digital Lamang: Mga Pagtulun-an sa mga Lider sa Simbahan gikan sa Social Media
Mga Paagi nga Kitang Tanan Makahimo og Kalainan sa Atong mga Komunidad
Tan-awa kon unsay gitudlo sa buhi nga mga propeta ug sa ubang mga lider sa simbahan bag-ohay lang diha sa social media mahitungod kon unsaon nga makahimo og kalainan diha sa inyong komunidad isip disipulo ni Jesukristo.
“Konektado kitang tanan, ug kita adunay hinatag sa Dios nga responsibilidad nga motabang nga himoong mas maayo ang kinabuhi alang niadtong naglibot kanato,” mitudlo si Presidente Russell M. Nelson. Siya mipadayon: “Dili kita kinahanglan nga managsama o tan-awon nga managsama aron maadunay paghigugma sa usag usa. Dili gani kita kinahanglan nga mouyon sa usag usa aron nga mahigugma sa usag usa. Kon kita naglaom nga makab-ot ang pakigdait ug panglantaw sa mga katawhan, kini kinahanglan magsugod sa matag usa kanato, usa ka tawo matag usa ka higayon.”1
Ang mga lider sa Simbahan namulong sa kinatibuk-ang komperensiya kon unsaon nga kita, isip mga disipulo ni Jesukristo, makahimo og kalainan ngadto sa atong mga silingan, mga higala, ug mga komunidad pinaagi sa panaghiusa, pagserbisyo, ug paghigugma. Mipaambit usab sila og mga mensahe mahitungod niini nga mga hilisgotan diha sa social media, lakip na sa mosunod:
Dapita ang Kabataan sa Paghimo og Kalainan dinhi sa Kalibotan
“Tingali naghunahuna kamo nga tungod kay mga bata pa kamo, dili kamo makahimo og dagkong butang. Naghunahuna seguro kamo nga ang buhat sa Langitnong Amahan alang lamang sa mga hamtong. Apan gusto kong masayod mo nga ang Langitnong Amahan dili ingon niana ang panglantaw. Ang Iyang mga paagi lahi kaayo sa atoa. Miingon Siya, ‘Pinaagi sa gagmay ug yano nga mga butang ang mga dagko nga butang ipahinabo.’ Ang Ginoo makagamit ninyo—oo, kada usa ninyo—sa pagbuhat sa Iyang talagsaon ug importanteng buhat.
“Mao nga, unsa man ang pipila sa ‘gagmay ug yano nga mga butang’ nga inyong mabuhat sa paghimo og dakong kalainan sa kalibotan? Makatabang mo og tawong nanginahanglan. Makakat-on mo sa mga pagtulon-an ni Jesukristo ug motuman niini. Makapaambit mo sa inyong nasayran bahin sa Manluluwas. Makasunod mo sa Iyang mga sugo ug mangandam karon sa pag-adto sa templo ug mabunyagan alang sa inyong katigulangan. Kon mobuhat mo bisan asa niini, nagtabang mo sa Langitnong Amahan sa pagpundok sa Iyang mga anak balik Kaniya.”
Presidente Russell M. Nelson, Facebook, Feb. 21, 2021 (video), facebook.com/russell.m.nelson.
Mopakita og Pagtahod sa Tanang Anak sa Dios
“Atol sa akong bag-o nga propesyon isip doktor sa kasingkasing, mibarog ko sa lawak operahanan sa liboan ka higayon. Gani miatiman ko og samdan nga mga sundalo diha sa MASH nga mga yunit atol sa Gubat sa Korea. Sa pagkatinuod nakahikap gyod ko sa mga kasingkasing sa mga lalaki ug sa mga babaye sa lainlaing kaliwatan ug nasyonalidad sa tibuok kalibotan. Ang akong mga pag-ampo ngadto sa Dios alang sa Iyang tabang sa paggiya, ug ang sunod-sunod nga inspirasyon nga akong nadawat gikan Kaniya, mahinungdanon kaayo sa matag sitwasyon. Didto niadto nga mga lawak operahanan—diin ang kinabuhi anaa sa delikado nga kahimtang—akong nasayran nga ang atong Langitnong Amahan nagpakabana gayod sa matag usa sa Iyang mga anak. Kana tungod kay kita Iyang mga anak.
“Ang panaglahi sa nasyonalidad, sa kolor, ug sa kultura dili makapausab sa kamatuoran nga kita mga anak nga lalaki ug mga anak nga babaye sa Dios. Ug isip sumusunod ug saksi ni Jesukristo, mas nasabtan nako og maayo ang kamatuoran. Manag-uban, kita mopahayag sa kahalangdon sa matag bililhon nga anak nga lalaki ug anak nga babaye sa Dios. Nasulti na nako kaniadto ug akong balikon karon nga ang diskriminasyon sa kaliwatan, diskriminasyon sa sekso, ug pagpasiugda sa uban pang mga diskriminasyon sa kinatibuk-an ug sa peligroso nga paagi makahatag og limitasyon sa paagi sa atong pagtagad ug pagtratar sa usag usa. Ang bisan unsa nga pag-abuso o pagpihig ngadto sa lain tungod sa kaliwatan, nasyonalidad, sekso, sekswal nga oryentasyon, kultura, o uban pang mga ilhanan makapasilo sa atong Tiglalang ug naglapas sa una ug ikaduha nga dakong sugo—nga kita kinahanglang mohigugma sa Dios sa tibuok natong kasingkasing ug sa atong mga silingan sama sa atong kaugalingon.
“Kita lig-ong nagtuo sa pagkaamahan sa Dios ug sa panag-inigsoonay sa tawo. Dili kita kinahanglan nga managsama o tan-awon nga managsama aron sa paghigugma sa usag usa. Mahimo kitang mosupak bahin sa usa ka butang apan dili masinupakon. Kon kita adunay paglaom nga makaugmad og panagdait ug pagbati sa katawhan nga gipangandoy natong tanan, kinahanglang magsugod kini sa matag usa kanato, usa ka tawo ug usa ka pakighinabi sa usa ka higayon.
“Hinaot nga kita isip mga anak nga lalaki ug mga anak nga babaye sa Dios, isip mahangtoron nga mga igsoong lalaki ug mga igsoong babaye, mobuhat kutob sa atong mahimo sa paglig-on sa usag usa, sa pagkat-on gikan sa usag usa, ug sa pagpakita og pagtahod sa tanang anak sa Dios. Hinaot nga kita magtinabangay diha sa gugma ug panag-igsoonay.”
Presidente Russell M. Nelson, Facebook, Apr. 13, 2023 (video), facebook.com/russell.m.nelson.
Ipadan-ag ang Kahayag sa Inyong Paglaom dinhi sa Kalibotan
“Atubanga ang mga kondisyon sa tibuok kalibotan ug ang inyong personal nga mga hagit nga may paglaom. Ayaw dawata ang kalibotan alang sa daw unsay makita niini. Ipadan-ag ang kahayag sa inyong paglaom niini, ug himoa kini kon unsa kini kinahanglan nga mahimo. Mahimong ingon niana nga kahayag diin kamo gipadala sa yuta aron mahimo, dili gayod mapalong.”
Presidente Jeffrey R. Holland, Facebook, Jan. 11, 2023, facebook.com/jeffreyr.holland.
Moila Nga sa Kanunay Adunay Usa ka Tawo Kinsa Nagkinahanglan og Higala
“Ang Simbahan kinahanglan nga mahimong usa ka dapit alang sa tanan. Bisan kon kita managlahi, kitang tanan usa ka pamilya. Kitang tanan nalakip niini. Ang gagmay nga mga butang—sama sa mubo nga pagbisita nga magdala og ice cream, ang pagkalingaw sa pagpangaon og dungan, o paglakaw-lakaw libot sa lim-aw sa baryo—makahimo gayod og kalainan sa kinabuhi sa usa ka tawo kinsa sa laing paagi dili gayod makasinati niana nga mga pagbati sa panaghigalaay ug pagkanahisakop. Nahitabo gayod kini nako.
“Ang atong tahas isip mga igsoong lalaki ug mga igsoong babaye diha sa ebanghelyo mao ang pag-ila nga sa kanunay adunay usa ka tawo kinsa nagkinahanglan og higala. Ang mga pagpahayag og panaghigalaay ug pagkanahisakop mas makatabang kaysa atong naamgohan usahay. Dili kinahanglan nga mag-inusara ka aron makadayeg ka sa panaghigalaay. Ang pagtutok sa ‘usa ka tawo’ makakompleto nato isip komunidad sa mga Santos—ug isip mga anak diha sa pamilya sa atong Langitnong Amahan.”
Elder Dieter F. Uchtdorf, Facebook, July 30, 2021, facebook.com/dieterf.uchtdorf.
Ipataas Kadtong anaa sa Inyong Palibot
“Isip mga disipulo ni Jesukristo, kita adunay mahinungdanong tahas sa ‘pagtabang sa maluyahon, ipataas ang mga kamot sa nawad-an og paglaom, ug paglig-on sa mga tuhod nga mahuyang’ (Doktrina ug mga Pakigsaad 81:5).
“Kay nahimong usa ka mikagiw kaduha sa wala pa mag-edad og 12, niining World Refugee Day, ako mopahinumdom ninyo sa pagpataas niadtong anaa sa inyong palibot.
“Itunol ang maabiabihon nga kamot. Sa tanang anak sa Dios, paghatag og espesyal nga gidak-on sa pagkamakitawhanon, kamaluluy-on, ug gugmang putli aron mabati nila, nga sa kataposan, nakakaplag na gayod sila og panimalay.”
Elder Dieter F. Uchtdorf, Facebook, June 20, 2023, facebook.com/dieterf.uchtdorf.
Nagkinahanglan Kami sa Inyong Tabang
“Daghan ninyo nga nagbasa niini mga kabahin sa Generation Z. Nagdako kamo nga adunay natural nga kahibalo sa internet, mga smart device, social media, ug ubang may kalabotan nga mga teknolohiya nga kaming mas tigulang nga mga henerasyon kinahanglan pang maningkamot aron makat-on. Alang ninyo, ang ‘pag-like,’ ‘pag-share,’ ug ‘direkta nga pagmensahe’ ingon ra ka komon sa pagtawag, pagpanuktok, ug ang paghimo og sulat alang sa mga henerasyon nga nag-una ninyo. Apan kuyog sa inyong halapad nga kahibalo sa digital nga kalibotan nga naglibot ninyo, kamo adunay usa ka butang nga gani mas labaw pa nga inyong gipanag-iya—kamo adunay pundasyon nga mahimong labing makahimo nga henerasyon sa pagpasiugda sa plano sa atong Langitnong Amahan sa kalipay ngadto sa tanan Niya nga mga anak. Ug nagkinahanglan kami sa inyong tabang.”
Elder Quentin L. Cook, Facebook, Enero. 26, 2023, facebook.com/quentin.lcook
Magmasinabtanon ug Mopanalangin sa Uban
“Ang Batalyon sa mga Mormon usa ka talagsaong ehemplo sa pagbuhat sa lisod nga mga butang ug sa maayong pagbuhat niini. Sila adunay mga hagit nga maglisod kita sa pagsabot—pisikal nga mga hagit ug ang uban espirituwal, segurado ko niana. Apan nadumala nila kini. Wala sila moreklamo. Mipadayon sila sa pagtrabaho. Sa dihang miabot sila sa unsay gitawag karon og San Diego, [California, USA,] gipanindot nila ang lungsod pinaagi sa pagtrabaho og maayo sa pagkalot og mga atabay, pagtukod og eskwelahan, ug pagpalig-on sa komunidad.
“Ang mga leksiyon nga makat-onan kaniadto gikinahanglan gayod karon sama kaniadto. Matag usa nato adunay iyang kaugalingong mga hagit ug mga oportunidad nga atubangon. Apan makahimo kita niana inubanan sa hugot nga pagtuo diha ni Jesukristo nga kita makadawat og giya ug tabang samtang mag-atubang kita niini ingon man usab magmasinabtanon ug mopanalangin sa uban. Alang nako, makapainteresado nga magkinahanglan kini og hugot nga pagtuo aron masugdan ang pagbuhat sa usa ka butang. Apan kon kamo molihok inubanan sa hugot nga pagtuo, mopalambo kini sa hugot nga pagtuo nga imong gisugdan.”
Elder D. Todd Christofferson, Facebook, Peb. 2, 2022, facebook.com/dtodd.christofferson.
Motabang sa Pagpalig-on sa Hugot nga Pagtuo Niadtong anaa sa Laing mga Relihiyon Usab
“Naghunahuna ko mahitungod sa World Faith Harmony Week ug namalandong nga ang mga tawo nga adunay hugot nga pagtuo, bisan unsa ang tinuohan, kalagmitan naghimo og positibo kaayo nga kontribusyon diha sa ilang katilingban, dinhi sa kalibotan. Mobulontaryo sila sa ilang mga komunidad. Sila adunay lig-ong mga pamilya, kasagaran. Mosuporta sila sa edukasyon. Moserbisyo sila. Andam sila nga mohimo gayod og kontribusyon alang sa kaayohan base sa ilang hugot nga pagtuo ug sa ilang gituohan. Kita gusto nga mopakigbahin ug modapit sa tanan sa pagpaminaw sa gipahiuli nga ebanghelyo ni Jesukristo. Apan sa tanang kalihokan, sa labing menos, manghinaot kita nga ang tanang tawo mopalig-on sa ilang pasalig—ilang pagkaaktibo—sa bisan asa man sila nga simbahan o tinuohan nga ilang pilion nga sundon.
“Pipila ka tuig ang milabay anaa ko sa usa ka pagpangaon uban ni Elder L. Tom Perry, diin nagdapit siya sa mga lider sa relihiyon sa tibuok Salt Lake Valley nga magsalo-salo, sa katuyoan, aron sa pagpasalamat nila, aron mas mailaila sila. Apan nakuratan kaayo ko—sa hapit na matapos ang pagpangaon, hapit niya dukdoka ang lamesa, apan siya miingon, ‘Kinahanglan nga ang inyong mga katawhan mas mahimong aktibo. Kinahanglan nga inyong seguroon nga dad-on ninyo ang tanan kutob sa inyong mahimo ngadto sa pagkaaktibo ug partisipasyon ug palig-ona ang ilang pagtuo ug lig-ona sila diha sa pagtuo. Kini lamang ang makatabang sa komunidad. Makaayo kini natong tanan.’ Ug nagtuo ko nga sakto kaayo siya. Kitang tanan napanalanginan sa pagkamatinud-anon sa mga tawo sa tanang tinuohan.”
Elder D. Todd Christofferson, Facebook, Peb. 1, 2023 (video), facebook.com/dtodd.christofferson.
Mahimong Maayo ug Mohimo og Maayo
“Isip mga disipulo ni Jesukristo, ang atong pakigsaad sa Dios ug sa usag usa nagdapit nato nga mahimong maayo ug mohimo og maayo. Abi ninyo, ang atong Simbahan mohatag og makitawhanong tabang nga walay pagtagad sa kaliwat, sa giapilan nga relihiyon, o sa nasyonalidad. Makigtambayayong kita sa tanang mga relihiyon, o sa walay relihiyon. Motubag kita sa dinalian ug taas og tagal nga mga panginahanglan. Bation nato ang mga panalangin sa langit samtang atong ipadayag ang atong gugma sa Dios sa paghimo sa tanang posible alang sa atong kaigsoonan, sa Iyang mga anak nga lalaki ug mga anak nga babaye, bisan asa, sa matag paagi nga atong mahimo.
“Kon nangita kamo og mga paagi nga mahimong mas maayo nga ‘kamo,’ ikonsiderar ang pag-download sa JustServe.org nga app sa pagpangita og mga oportunidad nga anaa duol kaninyo.
Elder Gerrit W. Gong, Facebook, Feb. 12, 2021, facebook.com/gerritw.gong.
Salig sa Ginoo sa Pagpadako sa Imong mga Paningkamot
“Sa iyang pakigpulong sa kinatibuk-ang komperensiya, si Elder Ardern mipakigbahin: … ‘Bisan sa atong tanan nga paningkamot, kamo ug ako dili makaayo sa tanan, apan ang matag usa kanato posibleng makahimo og kalainan alang sa kaayohan sa kinabuhi sa usa ka tawo. Usa lamang kadto ka bata, usa lamang ka batang lalaki, kinsa mihalad og lima ka pirasong pan ug duha ka isda nga nakapakaon sa lima ka libo. Tingali makapangutana kita bahin sa atong halad, sama sa gihimo sa disipulo nga si Andres bahin sa mga pan ug sa mga isda, ‘Mag-unsa man kini alang niining daghang tawo?’ (Juan 6:9). Ipaniguro ko kaninyo: igo na ang paghatag og pagbuhat sa unsay inyong mahatag ug dayon sa pagtugot kang Kristo nga modugang sa kulang’ (kinatibuk-ang komperensiya, Okt. 2023).
“Ako mopamatuod nga ang inyong panahon, mga talento, kaluoy, mga materyal, ug pinansiyal nga mga kapanguhaan kabahin sa balay-tipiganan sa Ginoo. Bisan kon ingon og gamay ra kini, ang inyong kontribusyon, nga gihatag inubanan sa gugma, mopanalangin sa Iyang mga anak sa matag suok sa kalibotan. Siya mopadako sa atong mga paningkamot!”
Presidente Camille N. Johnson, Facebook, Okt. 9, 2023, facebook.com/RSGeneralPresident
Mahimong usa ka Tighimo og Kalainan
“Mahimong usa ka tighimo og kalainan.
“Sa among unang adlaw sa seminary sa hayskul pa ko, ang magtutudlo mihagit namo nga makighigala sa usa ka tawo nga bag-o sa kataposan sa semester.
“Ganahan ko og hagit, mao nga mipili ko og usa ka tawo nga lahi nako.
“Maulawon ko, adunay sama nga mga higala sukad pa sa elementarya, ug ganahan og seminary.
“Si Kevin mikanta sa mga awit sa hilabihan ka kusog ug miingon ni Brother Howell nga motambong siya kada adlaw kon hatagan siya og hagbong nga grado sa iyang kard. (Ang iyang mga higala dili ganahan sa seminary.)
“Nakahukom ko nga kuyogan si Kevin padulong ug pauli sa seminary kada adlaw. Tabok lang sa parkinganan. Murag sayon ra kini. Kanunay siya nga naglakaw nga nag-inusara. Inig-abot dayon namo sa eskwelahan, magbulag dayon kami.
“Wala kini madugay nga namatikdan nga si Kevin wala kaayoy higala. Gani, sa sunod nga pipila ka bulan akong namatikdan nga siya adunay duha lang. Mikaon siya og paniudto kuyog nila, milakaw sa pasilyo kuyog nila. Ug mieskapo sa klase kuyog nila. Apan dili sa seminary.
“Usa ka adlaw, si Kevin ug ang iyang duha ka higala miduol nako sa akong locker. Si Kevin misulti nako nga nagdula sila og scavenger hunt ug nagkinahanglan sa usa sa akong mga sapatos. Nagsul-ob ko og mga sandalyas. Kalapasan kini sa mga lagda nga magtiniil sa eskwelahan. Apan si Kevin dili mao ang matang sa bata nga mosunod sa lagda. Nakiglalis ko niya og kadiyot ug unya miduko aron huboon ang akong sandalyas. Dayon giingnan nako siya nga kinahanglan nga ibalik ang akong sapatos inighuman sa ikaduha nga klase, bisan unsay mahitabo.
“Dili gayod nako makalimtan ang unsay sunod nga nahitabo. Sobra na kini sa tulo ka dekada, ug nahinumdoman pa gihapon nako nga murag kagahapon lang.
“OK ra kana,’ miingon siya, ‘wala man gyod ko magkinahanglan sa imong sapatos.’ Dayon milingi siya sa iyang duha ka higala ug misulti sa mga pulong nga dili gayod nako makalimtan: ‘Giingnan bitaw mo nako nga adunay tawo niini nga eskwelahan nga mituo nako.’
“Kinsa ang nagkinahanglan ninyo nga motuo nila karon?
“Kinsa ang nagkinahanglan og dugang nga higala?
“Kinsa ang inyong mahimong kuyogan sa paglakaw ngadto sa parkinganan?
“Usahay ang pagbarog isip saksi ni Kristo nagpasabot nga mokaon og paniudto kuyog sa usa ka tawo nga nagkinahanglan og higala, mohunong aron makig-istorya sa usa ka tawo nga bag-o pa, makigtagbo sa usa ka tawo kon asa siya, ug mopadangat sa paghigugma ngadto niya.
“Mahimong tighimo og kalainan.
“Ang Ginoo nagkinahanglan kaninyo.
“Ug pananglitan kon manginahanglan kamo niini nga pahinumdom karon, ako mituo kaninyo.”
Presidente Emily Belle Freeman, Facebook, Ago. 22, 2023, facebook.com/youngwomenworldwide.