“Si Jesukristo Mipagaan sa Akong mga Palas-anon,” Liahona, Hunyo 2024.
Mga Tingog sa mga Santos sa Ulahing mga Adlaw
Si Jesukristo Mipagaan sa Akong mga Palas-anon
Uban sa tanang komosyon sa akong kinabuhi, ako mibati nga daw malumos hangtod nga ako nakakaplag og kalinaw gikan sa pagbasa sa Basahon ni Mormon.
Paghulagway pinaagi ni Mariko Kowalski
Usa ka adlaw samtang ako nangalagad ngadto sa usa ka sister sa among ward, siya misulti kanako nga siya nagbasa sa Basahon ni Mormon sa matag tuig. Mipamatuod usab siya bahin sa talagsaon nga mga panalangin nga iyang nadawat tungod niining paningkamot. Ako mapasalamaton niana nga sister tungod sa iyang ehemplo.
Sa wala pa kana nga pagbisita, nabasa na nako ang Basahon ni Mormon sugod sa sinugdanan hangtod sa kataposan sa usa lang ka higayon, bisan og ako kanunayng nagtuon niini kon mag-andam alang sa mga assignment sa pagtudlo. Human sa akong pagbisita, midesisyon ko sa pagsunod sa ehemplo niining sister. Ako misugod pag-usab sa 1 Nephi ug mibasa hangtod sa kataposan. Sakto siya! Ako napanalanginan sa daghang paagi nga akong nahibaloan ug, segurado ko, sa laing mga paagi nga wala nako mahibaloi.
Dili pa lang dugay human nga akong nakompleto ang Basahon ni Mormon sa ikaduha nga higayon, ang akong bana mibiya sa among pamilya. Ang ingon og imposible nga tahas sa akong bag-o nga trabaho nahimo nga hilabihan ka makapaugtas, ug ang balikbalik nga kahimtang sa panglawas sa akong anak nga lalaki nakapabati nako nga daw malumos.
Apan ako nakahinumdom sa pagbasa diha sa Basahon ni Mormon mahitungod kon giunsa ni Amulon sa pagbutang og dakong palas-anon ngadto ni Alma ug sa iyang katawhan. Sa dihang ang katawhan nag-ampo alang sa tabang, ang Ginoo misulti kanila nga Siya nagmahunahunaon sa ilang sitwasyon ug moluwas kanila. Hangtod na nga, Siya miingon, “Ako usab mopagaan sa mga alantoson diin anaa gitungtong diha sa inyong mga abaga, gani kamo dili makabati [niini] diha sa inyong mga buko-buko” (Mosiah 24:14).
Akong gitun-an kana nga kapitulo sa Mosiah sa daghang higayon kaniadto, ug ako nagtudlo niini sa daghang higayon ngadto sa uban diha sa mga klase sa ebanghelyo. Ako mituo sa kamatuoran niadtong mga bersikulo. Tungod kay ako nakapamilyar sa mga pagtulun-an sa Basahon ni Mormon, ako nasayod nga ang personal nga kamatuoran magpakita kon akong ipahisama ang mga kasulatan ngadto sa akong personal nga mga kahimtang.
Busa misugod ko sa pagbasa niana nga kapitulo sa matag adlaw alang sa kalig-on ug aron sa pagpahinumdom sa akong kaugalingon nga ang Ginoo nagpakabana usab nako. Nakasinati gihapon ko og mga pagsulay, apan Siya mipagaan gayod sa akong mga palas-anon.
Kadtong mga bersikulo sa Basahon ni Mormon midala kanako latas sa usa ka panahon sa dakong personal nga kalisdanan, naghatag kanako og kalinaw ug usa ka makahupay nga kahibalo nga ang Ginoo nagmahunahunaon sa tanan Niyang mga anak.