“4 ka Paagi sa Paghimo og Espirituhanong Luna,” Liahona, Hunyo 2024.
Mga Young Adult
4 ka Paagi sa Paghimo og Espirituhanong Luna
Usa ka palisiya sa Jerusalem nga nagdili sa pagsangyaw miusab sa akong panglantaw sa paghimo og espirituhanong luna sa akong kinabuhi.
Mga paghulagway pinaagi ni Ingrid Nancy Ochoa Villarreal
Pipila ka biblikanhong mga site malakaw lang ang distansiya gikan sa Hebrew University sa Jerusalem diin ako kasamtangan nga nagpuyo isip usa ka estudyante. Ako makabisita sa mga ang-ang sa templo diin si Jesus mahimong nagtudlo o sa Lubnganan nga Tanaman diin ang pipila mibati nga ang Iyang lawas gipahimutang sa wala pa ang Iyang Pagkabanhaw. Ang magpuyo sa Balaan nga Yuta usa ka panalangin, ug ako mapasalamaton sa matag adlaw nga ako makagahin niining katingalahan nga dapit. Apan ang maanaa dinhi isip usa ka miyembro sa Iyang Simbahan dili sayon.
Tungod sa palisiya sa Israel nga nagdili sa pagsangyaw, dili ko pwede nga mopakigbahin sa akong pagtuo. Wala ako makaamgo kon unsa kini kalisod hangtod nga ang usa sa akong mga higala nangayo kanako og kopya sa Basahon ni Mormon ug ako dili makahatag kaniya niini. Ang pagkadisipulo ni Kristo usahay mahimong makapabati og pag-inusara ug pagkahimulag.
Apan ako nagkat-on usab og pipila ka lig-on nga mga leksiyon dinhi; ako mahimo gihapon nga mopakigbahin sa kahayag ug gugma ni Jesukristo ngadto ni bisan kinsa, ug ako makakonektar ngadto sa Espiritu.
Pinaagi sa Espirituhanong mga Panag-istoryahanay
Bisan og ang akong programa sa edukasyon sekular kaayo, hapit ang tanang estudyante sa akong mga klase mga tumutuo nga mga Kristiyano. Kami kasagaran manglingkod human sa klase ug mopakigbahin og mga opinyon ug mga panabot bahin sa mga leksiyon. Kini nga mga panag-istoryahanay nakahatag kanako og luna diin ako makahatag sa akong pagpamatuod ni Jesukristo.
Samtang kami mag-istoryahanay sa usag usa, ako kanunayng mapahinumdoman sa Mateo 18:20: “Kay kon may duha o tulo nga magkatigom sa akong ngalan, anaa ako uban kanila.”
Bisan og ako dili aktibong makapakigbahin sa ebanghelyo niining mga panag-istoryahanay, kining kasinatian nagtudlo kanako kon sa unsang paagi ang pakig-istorya ngadto sa isigka disipulo mahitungod ni Kristo makadapit sa Espiritu ngadto sa among mga relasyon ug ipabilin Siya diha sa taliwala sa tanan namong buhaton.
Pinaagi sa Pagtuman sa mga Pakigsaad
Naamgohan nako nga ang bugtong paagi nga akong mapakigbahin gayod ang ebanghelyo ni Jesukristo dinhi mao ang pinaagi sa pagpakita kon si kinsa ako. Dili ko makapanghatag sa mga tawo og Basahon ni Mormon dinhi, apan ako makaampo uban kanila, ako makatabang kanila nga mobati sa gugma sa Dios, ug ako makapamatuod nga ang Dios nahigugma kanila. Samtang ako yanong maningkamot sa pagtuman sa akong mga pakigsaad ug sa pagsunod sa mga sugo sa Ginoo, ako nagpamatuod sa akong pagtuo sa ebanghelyo ni Jesukristo.
Bisan unsa man ang inyong kahimtang, ikonsiderar ang mga paagi nga ang inyong ehemplo mahimong usa ka kahayag nga mogiya sa uban ngadto sa mga kamatuoran ug mopakigbahin sa kaayo sa Espiritu.
Sama sa gitudlo ni Elder Dale G. Renlund sa Korum sa Napulog Duha ka Apostoles, “Mamahimo kitang mga disipulo [ni Jesukristo] ug makarepresentar Kaniya sa tukmang paagi kon atong tuyuon ug sa hinayhinay atong dad-on sa atong kaugalingon ang ngalan ni Jesukristo pinaagi sa mga pakigsaad.”1
Pinaagi sa Pagtutok sa Atong Relasyon ngadto sa Langitnong Amahan ug ni Jesukristo
Ako makabati lamang sa Espiritu pinaagi sa pagkonektar una sa Langitnong Amahan ug ni Jesukristo sa matag adlaw—sa pagpuyo diha Kanila aron ako “makadayeg sa [akong] Amahan nga atua sa langit.” (Mateo 5:16). Usahay atong tan-awon ang ebanghelyo isip usa ka pormula nga atong magamit aron makuha ang atong gitagna nga mga resulta. Apan akong nakat-onan nga ang labing mahinungdanon sa ebanghelyo mao gayod ang atong relasyon ngadto sa Langitnong Amahan ug sa Manluluwas.
Ang akong proseso sa pagkonektar Kanila walay kalainan dinhi sa Balaan nga Yuta. Bisan og ako makabisita sa mga dapit nga gilakwan ni Jesus, labing mabati nako ang Espiritu kon ako mag-ampo ug magtuon sa mga kasulatan ug mogahin og oras sa akong adlaw sa paghimo og kalidad nga panahon alang Kanila—mao na kana sa tibuok nakong kinabuhi.
Si sister Bonnie H. Cordon, kaniadto Kinatibuk-ang Presidente sa Young Women, mitudlo: “Adunay gahom sa paghimo niining balaan nga mga gawi nga dili kaayo usa ka listahan nga kinahanglang buhaton ug mas buhaton kini isip pagsaksi. Ang proseso hinay-hinay apan molambo sa inadlaw, aktibo nga pag-apil ug puno sa katuyoan nga mga kasinatian uban ni Kristo.”2
Ang paghatag og tinuoray nga paningkamot sa pagkonektar sa Langitnong Amahan ug ni Jesukristo makatabang kaninyo sa paghatag og luna alang sa sagrado nga mga higayon sa inyong kinabuhi.
Ako mosaad kaninyo nga inyong mabati ang kalainan.
Pinaagi sa Pagtutok sa Yano nga mga Kamatuoran
Tungod kay ako anaa sa lahi nga kahimtang diin dili ako makahisgot sa mga detalye sa akong hugot nga pagtuo, ang maanaa sa Jerusalem nakatudlo kanako nga dili motan-aw “lapas sa tumong” (Jacob 4:14). Ako nakakat-on sa pagtutok sa yano nga mga kamatuoran sa ebanghelyo: ang Dios nahigugma sa tanan Niyang mga anak, si Jesukristo mao ang akong Manluluwas, ug si Presidente Russell M. Nelson mao ang propeta sa Dios sa kalibotan karon.
Kini nga panglantaw nakatabang kanako sa pagtuman sa akong mga pakigsaad ug sa pagpabilin nga konektado ngadto sa Espiritu samtang ako monabigar sa mga hagit isip usa ka young adult sa Simbahan, ilabi na sa usa ka dapit nga diyutay ra ang mga miyembro.
Apan akong nakaplagan nga bisan asa man ako, basta maningkamot ko sa paghimo og espirituhanong luna sa akong kinabuhi sa matag adlaw, ang akong mga pangutana, mga problema, ug mga kabalaka kanunayng masulbad pinaagi sa paglaom diha sa Langitnong Amahan ug sa akong Manluluwas, si Jesukristo.