“Ako ba Adunay Panahon sa Pagserbisyo sa Akong Kauban sa Klase?,” Liahona, Hunyo 2024.
Mga Tingog sa mga Santos sa Ulahing mga Adlaw
Ako ba Adunay Panahon sa Pagserbisyo sa Akong Kauban sa Klase?
Nagtuo ko nga ako walay panahon sa pagtabang, apan ang Ginoo mipanalangin kanako sa akong sakripisyo.
Paghulagway pinaagi ni Lee Montgomery / PaghulagwayX
Niadtong 1998, gisugdan nako ang akong mga pagtuon sa Unibersidad sa Andes. Nagtinguha ko og dako nga makaangkon og kurso sa unibersidad nga makakuha og maayong kinatibuk-an nga punto sa grado. Apan ang akong mga klase sa criminology lisod, ug naproblema ko sa pagpahiangay sa mga gimbuhaton sa unibersidad. Usab, nabusy ko sa pagserbisyo isip magtatambag sa bishophric sa akong ward ug nagtrabaho sa gabii aron makasangkap alang sa akong pamilya.
Ang pagduha-duha ug kabalaka nakapakyas sa akong mga paglaom nianang unang tuig samtang ang akong nakuha nga grado ubos kaayo kay sa kinatibuk-an nga grado sa klase. Samtang naghinapos ang tuig sa klase, akong gipadak-an ang akong mga pangaliyupo ngadto sa Dios diha sa pag-ampo alang sa tabang sa pagsabot sa matag teyoriya, baroganan, ug pamaagi.
Atol sa akong ikaduhang tuig, akong nahimamat ang usa ka kauban sa klase nga wala nako mamatikdi kaniadto nga ginganlan og Argenis. Akong nadiskobrihan nga wala usab siya makakita kanako—dili gayod siya makakita kanako tungod kay buta siya. Usa ka adlaw miduol siya nako gamit ang iyang sungkod ug braille nga tablet ug mihangyo og tabang. Miingon siya nga ako adunay nindot nga tingog ug nga siya nagkinahanglan nako sa pagrekord sa sinulat nga giya sa pagtuon aron siya makapaminaw niini.
Siya mihangyo sa uban, apan mibalibad sila. Kadtong mitabang kaniya sa miaging tuig nagduhaduha sa pagtabang kaniya pag-usab. Taliwala sa akong busy nga eskedyul ug ubos nga mga grado, nagduhaduha usab ako sa pagtabang.
Bisan og dili pa opisyal ang pag-uyon sa iyang hangyo, hinuon, sa wala madugay akong nakita ang akong kaugalingon nga nagbasa ug nagbasa pag-usab sa mga giya aron marekord ang sulod niini alang ni Argenis. Sa saktong panahon, nagkahigalaay kami, ug nagsugod ko sa pagpakigbahin sa ebanghelyo ni Jesukristo ngadto kaniya. Gani mihatag ko niya og Basahon ni Mormon sa braille. Gipasalamatan niya ang akong tabang apan wala gayod mahimong interesado sa pagkat-on og dugang mahitungod sa Simbahan.
Samtang akong gipadayon ang pagbasa ug pagrekord sa mga giya sa pagtuon, bisan pa niana, ang akong kinatibuk-an nga punto sa grado misugod sa pagsaka. Bisan ang akong mga higala nakabantay nga nahimo ko nga mas maayo nga estudyante ug milambo sa akong mga panabot.
Walo ka tuig human ako migradwar, ang akong higala si Argenis migradwar usab. Wala siya mainteresado sa Simbahan, apan siya nakatabang nako nga makasabot “nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Siya nakatabang nako nga makita nga samtang ako moserbisyo sa uban, ang Dios mopanalangin kanako ug mopalambo sa akong abilidad.