“Mga Pangutana ug mga Tubag mahitungod sa ‘Lunsay nga Pagpamatuod,’” Liahona, Hunyo 2024.
Dali, Sunod Kanako
Mga Pangutana ug mga Tubag mahitungod sa “Lunsay nga Pagpamatuod”
“[Himoa] ang inyong pagpamatuod nga inyong kinatas-an nga prayoridad.”1 —Presidente Russell M. Nelson
Sacred Prayer [Sagrado nga Pag-ampo,], ni Linda Curley Christensen, dili mahimong kopyahon
Isip ang labaw nga maghuhukom, nakita ni Alma “nga ang mga katawhan sa simbahan misugod sa pagkamapagarbohon” (Alma 4:6) ug “nagpahimutang sa ilang mga kasingkasing diha sa mga katigayonan ug diha sa kawang nga mga butang sa kalibotan, nga sila misugod sa pagkamabiay-biayon, ang usa ngadto sa lain” (Alma 4:8). Imbes nga magpatuman og mga balaod, mipili si Alma og laing tawo aron mopuli sa iyang dapit isip ang labaw nga maghuhukom, ug mipahinungod sa iyang kaugalingon sa pagsangyaw sa pulong sa Dios ngadto sa katawhan, “wala makakita og paagi nga siya unta makapausab kanila gawas kini sa paghatag sa lunsay nga pagpamatuod” (Alma 4:19).
Unsa ang importante nga mga bahin sa usa ka pagpamatuod?
Makabaton kita og pagpamatuod sa tanang baroganan sa ebanghelyo, apan ang sukaranan nga mga kamatuoran mao kini:
-
Ang Dios mao ang atong Amahan sa Langit, ug Siya nahigugma kanato.
-
Si Jesukristo buhi. Siya ang Anak sa Dios ug ang atong Manluluwas.
-
Si Joseph Smith mao ang propeta nga gitawag sa pagpahiuli sa ebanghelyo.
-
Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan sa Manluluwas ug gigiyahan pinaagi sa usa ka buhi nga propeta.2
Ang usa ka pagpamatuod mga pulong lamang ba?
“Kamo mohatag sa inyong pagpamatuod kon kamo mopaambit og espirituhanong mga pagbati ngadto sa uban. …
“Laing paagi sa inyong pagpaambit sa inyong pagpamatuod mao ang pinaagi sa matarong nga kinaiya. Ang inyong pagpamatuod ni Jesukristo dili lang unsay inyong isulti—kon dili kinsa kamo” (Gary E. Stevenson sa Korum sa Napulog Duha ka Apostoles, “Pag-alima ug Paghatag sa Inyong Pagpamatuod,” Liahona, Nob. 2022, 112).
Unsa ang gahom sa lunsay nga pagpamatuod?
Si Presidente Brigham Young mihinumdom sa epekto sa sinsero ug yano nga pagpamatuod sa “tawo nga walay kahanas sa pagsulti, o [mga] talento sa pagpamulong sa publiko, kinsa makasulti og, ‘Ako nasayod, pinaagi sa gahom sa Espiritu Santo, nga ang Basahon ni Mormon tinuod, nga si Joseph Smith usa ka Propeta sa Ginoo.’ Ang Espiritu Santo nga gikan niana nga indibidwal nakapasanag sa akong pagsabot … ; ako gilibotan niini, napuno niini, ug nasayod sa akong kaugalingon nga ang pagpamatuod sa tawo tinuod” (“Discourse,” Deseret News, Feb. 9, 1854, 4).
Unsa kaha kon ang mga tawo dili modawat sa pagpamatuod?
Usa ka young adult nagpakigbahin sa iyang pagpamatuod ngadto sa mga bisita sa Temple Square didto sa Siyudad sa Salt Lake sa dihang ang usa ka tawo mihagit kaniya pinaagi sa mabatokon nga mga pangutana.
“Wala ko kahibalo,” miingon siya. “Makasulti ra ko nimo sa unsay akong nahibaloan.”
Siya [ang tawo] misanta kaniya: “Ayaw ipakigbahin ang imong pagpamatuod kanako.”
“Mao kana ang tanan nga anaa kanako,” miingon siya.
“Aw, kana wala ra kaayoy bili, dili ba? siya mitubag.
Natapos ang panag-istoryahanay, apan nakapasagmuyo kini kaniya. Apan, samtang namalandong siya, naamgohan niya nga ang iyang pagpamatuod labaw pa gayod sa “wala ra kaayoy bili.” Makahuloganon kaayo kini ngadto kaniya. Kini nakaimpluwensiya sa matag desisyon sa iyang kinabuhi.
Sa unsa nga mga paagi nga ako mahimong mopakigbahin sa akong pagpamatuod?
Kasagaran maghunahuna kita mahitungod sa pagpakigbahin og pagpamatuod diha sa panagtigom alang sa sakramento atol sa Dominggo sa puasa, apan adunay daghang ubang mga paagi sa pagpakigbahin sa atong espirituwal nga mga pagbati:
-
Paghimo og sulat ngadto sa inyong mga anak o mga apo nga nagpakigbahin sa inyong pagsaksi ni Jesukristo ug sa Iyang gipahiuli nga ebanghelyo.
-
Ipreserbar ang inyong pagpamatuod diha sa “Mga Handomanan” sa FamilySearch aron sa pagpalig-on sa inyong kaliwatan.
-
Pag-post sa social media kon unsa ka mahinungdanon si Jesukristo alang kaninyo.
-
Sa mga miting sa Dominggo, ipakigbahin kon sa unsang paagi nga ang usa ka baroganan sa ebanghelyo nga gihisgotan nakapanalangin sa inyong kinabuhi.