Mga Tingog sa mga Santos sa Ulahing mga Adlaw

Kab-ot Pa og Mas Taas

Ni Michael R. Morris, mga Magasin sa Simbahan

Natingala ko kon nganong mihunong si Emily diha sa dalan hangtod nga nakit-an nako siya nga mitabang sa batan-ong babaye sa luyo niya.

Litrato pinaagi sa tagsulat

Samtang ang akong asawa miserbisyo isip among presidente sa Young Women sa ward, matag ting-init gidapit ko niya ngadto sa kamping sa Young Women aron motabang sa mga kalihokan sa gawas. Atol sa usa ka bag-ohay nga kamping, mitabang ko sa usa ka lisod nga agianan nga naggamit og pisi [ropes course] nga gilakawan sa mga batan-ong babaye samtang gitaptapan ang mata.

Kadtong naglakaw sa agianan gikinahanglang moggunit sa usa ka nipis nga pisi nga gihigot gikan sa usa ka kahoy ngadto sa lain. Human nga maabot sila sa matag kahoy, liboton nila og hikap ang punoan sa kahoy alang sa dapit sa pisi nga mogiya ngadto sa sunod nga kahoy. Ang agianan naglakip og pipila ka lisod nga mga dapit, lakip sa wala nay padulngan. Tabangan nako ang mga partisipante kon madagma sila o maglisod sa usa ka pihong mahagiton nga dapit sa tunga-tunga sa agianan.

Niana nga dapit, ang pisi gihigot sa samang paagi ra gihapon ngadto sa usa ka kahoy. Apan ang pisi nga mopadulong ngadto sa sunod nga kahoy nahimutang sa pipila ka pye ibabaw sa pisi nga nagpadulong sa kahoy. Niana nga punto sa agianan, ang mga batan-ong babaye naanad ra nga mokab-ot palibot sa matag punoan sa kahoy aron makit-an ang sunod nga pisi. Sa dihang maglisod sila sa pagpangita sa mas taas nga pisi, sultihan nako sila, “Kab-ot pa og mas taas.”

Sama sa uban nga nag-una kaniya, usa ka batan-ong babaye nga ginganlan og Emily sa wala madugay nahimong nasagmuyo sa pagsulay sa pagpangita sa mas taas nga pisi. Human sa mga 20 segundos, mihunghong ko, “Kab-ot og pa mas taas.” Sa wala madugay nakit-an ni Emily ang pisi, apan mihunong dayon siya.

Imbes nga mopadayon, milingi si Emily ug mitabang sa batan-ong babaye sa luyo niya, si Gwen. Dayon malumo nga gipataas ni Emily ang kamot ni Gwen ngadto sa mas taas nga pisi aron mahibalo siya asa kini makit-an. Unya mipadayon si Emily, ug misunod si Gwen.

Ang matinabangon nga buhat ni Emily gamay ra, apan kini nagpahinumdom kanako sa atong mahinungdanon nga responsibilidad sa pagtabang sa uban subay sa dalan sa pakigsaad isip mga disipulo ni Jesukristo, sa pagtabang sa mga anak sa Dios nga mokab-ot pa og mas taas, ug “ipataas ang mga kamot sa nawad-an og paglaom” (Doktrina ug mga Pakigsaad 81:5).

“Sa atong pag-agak sa uban, mosaka usab kita og gamay sa atong kaugalingon,” gitudlo ni Elder Dieter F. Uchtdorf, kaniadto Ikaduhang Magtatambag sa Unang Kapangulohan. Miingon usab siya, “Kon kita moduol aron sa pagpanalangin sa mga kinabuhi sa uban, ang atong mga kinabuhi mapanalanginan usab. Ang pag-alagad ug pagsakripisyo nagbukas sa mga bintana sa langit, aron ang piniling mga panalangin mabubo kanato” (“Ang Kalipay, Inyong Kabilin,” Liahona, Nob. 2008, 119).