“Unsa ang Akong Nakat-onan sa Hulma sa Pan mahitungod sa Pagpangalagad,” Liahona, Hunyo 2024.
Mga Tingog sa mga Santos sa Ulahing mga Adlaw
Unsa ang Akong Nakat-onan sa usa ka Hulma sa Pan mahitungod sa Pagpangalagad
Unsa ang akong ipakaon sa akong anak nga babaye karong gabii nga mahimong epektibo alang sa iyang diyeta?
Ang akong higala si Wendy maayo kaayo nga moluto. Sukad sa iyang pagbalhin sa unahan dili layo gikan sa among pamilya, manghatag siya og pagkaon ngari namo. Kanunay siya nga adunay ikarason: “Dili na man mapaigo sa akong fridge,” o “daghan kaayo ko og gihimo!” Bisan unsa lang iyang isulti kon siya magdala sa iyang mga hinatag, ang kanunay nakong madungog mao ang, “gimahal ko kamo.”
Akong nabati ang iyang gugma alang sa among pamilya ilabi na human sa lisod kaayo nga panahon. Usa sa akong mga anak bag-o lang nga na-diagnose nga adunay deperensiya sa pagkaon, ang tanang butang mahitungod sa pagkaon nagkakomplikado ug makaugtas diha sa among panimalay.
Usa ka gabii ang akong anak nga babaye ug ako nakigkita sa iyang team sa therapy. Niini nga panagkita gihatagan siya og usa ka plano sa pagkaon, ug ako mao ang gitahasan sa paghimo ug sa pagplano og tulo ka pagkaon ug tulo ka snack alang kaniya sa matag adlaw. Kini nga mga pagkaon ug mga snack kinahanglan magsubay sa mga lagda sa diyeta nga makatabang maulian ang iyang timbang.
Alang kanako, kini nga tahas makaluya. Dili kaayo ko maayong moluto, mao nga ang pagdawat sa maong piho nga mga lagda ug ang paghunahuna daan kon unsay angay andamon sa paningkamot nga mapakaon og maayo ang akong anak og daghang pagkaon hapit makapahilak nako. Samtang nagdrayb padulong sa panimalay, ang akong panghunahuna magul-anong nakatutok sa usa ka hunahuna: “wala koy dala nga bisan unsa nga sakto niya nga pang-snack karong gabii.”
Pag-abot sa balay, mitikang ko padulong sa pultahan ug dihadiha dayon nakatimaho og lamiang pagkaon. Didto, gibutang sa counter sa kusina, ang usa ka hulma nga banana bread nga gihatod ni Wendy samtang wala kami. Naglangkob kini og lugas, prutas, ug fat—sakto kaayo alang sa nga among gikinahanglan nga snack sa gabii! Ang mas nakanindot, ang akong anak nga babaye mikaon og maayo niini.
Sa dihang akong gitawagan si Wendy aron pasalamatan siya sa pan, wala na nako gisugilon ang nahitabo. Tingali naghunahuna siya kon nganong medyo emosyonal ko sa iyang gasa. Wala makahibalo si Wendy nga nagkalisod kami. Siya naghimo lang og “daghan ra kaayo” nga banana bread ug dili gusto nga mabahaw kini.
Pila ka bulan ang milabay, samtang naminaw sa usa ka podcast mahitungod sa pagkahimong mga tigtuman sa pakigsaad, naghunahuna ko kon unsa gyod ang kahulogan sa usa ka tigtuman sa pakigsaad. Dayon ang gasa ni Wendy nga banana bread misantop sa akong hunahuna.
Sa dihang gisunod ni Wendy ang iyang kasingkasing ug gidad-an kami og pan nianang adlawa, siya nagbangotan uban niadto nga nagbangotan ug mihupay niadto nga nagkinahanglan sa kahupayan (tan-awa sa Mosiah 18:9), bisan wala nakahibalo sa tibuok istorya. Ug kini nakahimo og kalainan.