Dali, Sunod Kanako
Usa ka Kausaban sa Kasingkasing: “Kamo Mibati ba Karon sa Mao?”
Ang malungtaron nga pagkakabig mahimo natong maangkon samtang kita mohinumdom sa Ginoo ug sa Iyang kamaayo ngari kanato.
Si Alma nga Batan-on mihatag niining makapahinuklog nga mga pangutana ngadto sa katawhan diha sa dakbayan sa Zarahemla:
“Kamo sa espirituhanon nga paagi natawo ba sa Dios? Kamo nakadawat ba sa iyang hitsura diha sa inyong mga panagway? Kamo nakasinati ba niining dako nga kausaban diha sa inyong mga kasingkasing? …
“Ug karon tan-awa, ako moingon nganha kaninyo, … kon kamo nakasinati og usa ka kausaban sa kasingkasing, ug kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?” (Alma 5:14, 26).
Nagdako ko nga nagtambong sa Ogden First Ward sa Ogden, Utah, USA. Sa dihang mga nuybe anyos pa ko, ang among bishop (kinsa mao ang akong amahan) misugod sa pagpamatuod nga bahin sa usa ka panagtigom sa pagpuasa ug pagpamatuod pinaagi sa paghangyo sa tanan diha sa kongregasyon sa paghatag sa ilang pagpamatuod. Ang miting mipadayon sama gayod sa gihangyo ni Papa. Hapit tanan nga nanambong mibarog ug mihatag sa ilang mga pagpamatuod.
Ang bilding sa simbahan diin si Elder Hales mitambong sa Ogden First Ward isip usa ka bata.
Mga litrato sa maayong kabubut-on sa tagsulat
Usa kadto ka mahinungdanon kaayo nga hitabo alang kanako. Ang matag pagpamatuod yano, direkta sa punto, ug nakatutok sa unsay nahibaloan sa matag tawo nga tinuod mahitungod sa Manluluwas ug sa Iyang ebanghelyo. Sa akong nahinumdoman, ang tanan nakabati og dili ikalimod nga impluwensiya sa Espiritu. Dili kaduhaduhaan, nabati nako ang Espiritu kaniadto, apan ang Espiritu anaa sa usa ka talagsaon nga paagi nianang adlawa. Nabati nako ang usa ka gamhanan nga pagsaksi sa katinuod sa ebanghelyo. Human niining tanang katuigan, wala na gayod ako makalimot niini nga kasinatian sa dihang nabati nako ang panaghiusa sa ward ug ang gugma sa Manluluwas.
Bisan unsa pa man ang atong una nga mga kasinatian sa pagdawat og makapanghimatuod nga pagsaksi sa katinuod sa ebanghelyo ni Jesukristo, kita makabenepisyo gayod og maayo sa pagpangutana sa atong kaugalingon, “[Kita] mibati ba karon sa mao [nga pagbati]?” ug dayon mohimo og bisan unsa nga gikinahanglan nga mga koreksiyon sa direksiyon.
Nakahinumdom ba kita sa unsay atong nasinati ug nabati sa dihang gidawat nato ang ebanghelyo ni Jesukristo ug mipasalig sa pagserbisyo Kaniya ug pagsunod sa Iyang mga sugo? Nabati pa ba gihapon nato “ang Espiritu sa Dios samas kalayo”1 sa atong kahiladman? Madasigon pa ba gihapon kita sa atong pagkadisipulo?
Hinumdomi ug Paghinulsol
Ang Basahon ni Mormon kanunay nga nagtambag kanato sa paghinumdom. Ngano man? Tungod kay samtang hinumdoman nato ang espirituhanon nga mga kasinatian ug mga pagbati, mas lagmit kita nga makabaton og mas dako nga kusog sa paglikay sa sala ug sa pagpadayon sa atong pasalig nga magpabilin sa dalan sa pakigsaad.
Ang Basahon ni Mormon nagtanyag usab og dakong pagdasig nga maghinulsol. Human nakaobserbar sa panginahanglan sa katawhan nga maghinulsol, gipasabot ni Alma ang mga panalangin sa kapasayloan nga anaa pinaagi sa Pag-ula sa Manluluwas ug mitanyag niining mensahe sa paglaom, nga magamit kanato karon:
“Tan-awa, [ang Manluluwas] nagpadala og usa ka pagdapit ngadto sa tanan nga mga tawo, kay ang mga bukton sa kaluoy gitunol ngadto kanila, ug siya miingon: Paghinulsol, ug Ako modawat kaninyo.
“Oo, siya miingon: Duol ngari kanako ug kamo moambit sa bunga sa kahoy sa kinabuhi; oo, kamo mokaon ug moinom sa pan ug tubig sa kinabuhi sa walay kalisod;
“Oo, duol ngari kanako ug pagdala sa mga buhat sa pagkamatarong, ug kamo dili putlon ug itambog ngadto sa kalayo. …
“Tan-awa, ako moingon nganha kaninyo, nga ang maayo nga magbalantay nagtawag kaninyo; oo, ug diha sa iyang kaugalingon nga ngalan siya nagtawag kaninyo, diin mao ang ngalan ni Kristo” (Alma 5:33–35, 38).
Higugmaa ang Dios ug Silingan
Si Alma mipadayon sa iyang mga pagtulon-an pinaagi sa pagpangutana sa katawhan kon sila ba gitangtangan sa garbo ug kasina (tan-awa sa Alma 5:28–29). Siya nangutana usab:
“Aduna bay usa taliwala kaninyo nga naghimo og usa ka pagbiay-biay sa iyang igsoon, ug nga nagbutang nganha kaniya og mga panggukod?
“Alaot ngadto sa mao nga [tawo], kay siya dili andam, ug ang takna duol na nga siya kinahanglan gayod maghinulsol o siya dili maluwas!” (Alma 5:30–31).
Si Presidente Russell M. Nelson mitudlo kanato kabahin sa atong obligasyon sa pagtratar sa ubang mga tawo uban ang gugma ug pagtahod ug sa paglikay sa paghukom ug pagkadili mabination. Miingon siya:
“Sama sa gipahayag diha sa Basahon ni Mormon, … ang Manluluwas nagdapit sa ‘tanan sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye; … ang tanan managsama ngadto sa Dios’ (2 Nephi 26:33). …
“… Sa dihang ang usa ka matamayon nga Pariseo mihagit [sa Manluluwas] sa pag-ila sa labing dako nga sugo sa balaod, ang tubag sa Manluluwas labing halandomon ug mubo. Napuno kini sa kamatuoran nga mosangpot ngadto sa usa ka malipayon nga kinabuhi. Ang Iyang instruksiyon mao nga, una, higugmaon ang Dios sa tibuok natong kasingkasing ug, dayon, higugmaon ang atong mga silingan sama sa atong kaugalingon (tan-awa sa Mateo 22:35–39).”2
Agig dugang, ang mga pulong ni Alma naghatag og gamhanan ug direkta sa punto nga mensahe nga dili talikdan ang mga kabos ug timawa (tan-awa sa Alma 5:55). Hinuon, kinahanglan natong tabangan kadtong nanginahanglan. Importante kaayo kini aron kita makabaton og kapasayloan sa atong mga sala (tan-awa sa Mosiah 4:16–26) ug padayon nga makabati sa kausaban nga gidala sa Manluluwas sa atong mga kasingkasing.
Pagmakugihon sa Personal nga Relihiyoso nga mga Binuhatan
Ang atong mortal nga mga kasinatian nagkinahanglan nga magkinabuhi kita pinaagi sa hugot nga pagtuo. Usahay kita mahimong dali nga masuko. Ang mga sakop sa pamilya ug kadtong atong ikauban tingali makapasagmuyo kanato. Tingali kita usahay mobati nga gikapoy, gikutasan, naluya, ug gitintal sa tanang paagi. Ang mga kahimtang dinhi niini nga kalibotan mahimong maoy makaingon nga maghunahuna kita kon tinuod ba gayod nga “ang yawa nagkatawa, ug ang iyang mga anghel nalipay” sa atong kahimtang (3 Nephi 9:2). Tungod niini nga mga kahimtag ug mga pagsulay, ilabi na niining kataposan nga mga adlaw, ang atong kadasig alang sa pagsunod sa ebanghelyo mahimong moawop kon dili kita magmakugihon.
Apan makasunod kita sa sukaranan nga relihiyoso nga mga binuhatan aron sa pagpanalipod sa atong kaugalingon, bisan kon lisod ang kinabuhi. Kining personal nga relihiyoso nga mga binuhatan gikinahanglan sa pagpalig-on sa atong hugot nga pagtuo, pagmentinar sa atong abilidad sa pagbatok sa tintasyon, ug paghinumdom sa atong espirituhanon nga mga kasinatian. Nagtabang kini kanato sa paglambo sa espirituwal nga paagi ug sa pagbuntog sa mga taktika ni Satanas.
Ang mga pagpamatuod sa duha ka propeta sa ulahing mga adlaw bahin sa mga panalangin sa duha niini nga personal nga relihiyoso nga mga binuhatan importante nga timan-an:
Si Presidente Ezra Taft Benson (1899–1994) mipamatuod:
“Usa sa labing importanting mga butang nga inyong mahimo … mao ang pagsubsob sa inyong kaugalingon diha sa mga kasulatan. Siksika kini nga makugihon. Pagbusog sa mga pulong ni Kristo. Kat-oni ang doktrina. Magmahimong batid sa mga baroganan nga makita dinha. Adunay pipila ka ubang mga paningkamot nga magdala og mas dako nga mga kaayohan. … Adunay pipila ka ubang mga paagi sa pagbaton og mas dako nga inspirasyon. …
“… Kon ang indibidwal nga mga sakop ug mga pamilya regular ug makanunayon nga mosubsob sa ilang mga kaugalingon diha sa mga kasulatan, … ang mga pagpamatuod molambo. Ang pasalig malig-on. Ang mga pamilya malig-on. Ang personal nga pagpadayag modagayday”3
Sa Oktubre 2019 nga seminar sa pagpangulo sa kinatibuk-ang komperensiya, si Presidente Nelson miingon: “Sa pagtapos sa Oktubre nga kinatibuk-ang komperensiya sa miaging tuig, akong giawhag ang mga Santos nga makanunayong motambong sa templo. Ngano man? Tungod kay ang mga pagpang-atake sa kaaway hilabihan nga nagkapaspas, sa gikusgon ug sa matang. Ang panginahanglan nga maanaa sa templo kanunay wala pa sukad maingon niini kamahinungdanon. Akong gisaad kaniadto, ug sublion karon, nga kadtong kinsa makanunayon nga mohimo og appointment sa Ginoo—nga maanaa sa Iyang balaan nga balay—ug motuman niana nga appointment, makadawat og mga milagro.”4
Ang mga Panalangin sa usa ka Nausab nga Kasingkasing
Giawhag ni Alma ang katawhan sa Zarahemla nga hinumdoman ang pagkabihag niadtong kinsa nag-una kanila. Giawhag niya sila sa paghinumdom sa “kaluoy ug pagkamainantoson” sa Ginoo ngadto sa ilang mga amahan ug sa paghinumdom nga Siya “miluwas sa ilang mga kalag gikan sa impyerno” (Alma 5:6). Ang mga kasingkasing sa ilang mga amahan nausab pinaagi sa mga maayo nga buhat, kaluoy, ug grasya ni Jesukristo (tan-awa sa Alma 5:7; tan-awa usab sa 2 Nephi 2:8). Kana mao ang mga panalangin nga mahimo usab natong maangkon samtang hinumdoman nato ang Ginoo ug ang Iyang kamaayo kanato.
Samtang akong hinumdoman kadtong talagsaon nga panagtigom sa puasa ug pagpamatuod gikan sa akong pagkabata, ang mga pagbati nga anaa kanako ug ang mga binhi sa pagpamatuod nga natanom sa akong kasingkasing pinaagi sa Espiritu Santo nagtabang kanako sa pagtinguha nga mahimong mas maayo nga tawo karon. Kon sundon nato ang tambag ni Alma pinaagi sa paghinumdom sa atong kaugalingon nga espirituhanon nga mga kasinatian, matinud-anong pagsunod sa atong personal nga relihiyoso nga mga binuhatan, ug mapaubsanong pagpamalandong sa tanan nga gibuhat sa Manluluwas alang kanato, atong mapalig-on ang atong abilidad sa pagtahod sa atong mga pakigsaad ug mas magpaduol ngadto Kaniya.
Mga young adult nagpundok alang sa usa ka kalihokan diha sa chapel sa Ogden First Ward. Ang inahan ni Elder Hales (tuo nga bahin, ikatulo nga laray, layo sa wala) ug ang amahan (tuo nga bahin, ikaduha nga laray, layo sa tuo) mitambong sa kalihokan sa wala pa ang ilang kaminyoon niadtong Oktubre 1949.