Digital Lamang
Pagtambong sa Kinatibuk-ang Komperensiya—usa ka Tambal sa Gilead alang sa Akong Nasakitan nga Kalag
Ang tagsulat nagpuyo sa Colorado, USA.
Human sa kamatayon sa akong inahan, ang kamabination, musika, ug gipakigbahin nga kaalam nga akong nasinati samtang nagtambong sa kinatibuk-ang komperensiya usa ka panalangin ngari nako.
Sa mabinationg pagginaksanay: Si Elder Matthew L. Carpenter sa Seventy (tuo) ug si Rabbi Joe Charnes (wala) sa Oktubre 2019 nga kinatibuk-ang komperensiya.
Litrato sa maayong kabubut-on ni Michael Law.
Usa ka semana ug tunga sa wala pa ang sesyon sa Oktubre 2019 nga kinatibuk-ang komperensiya, ako, uban sa akong pamilya ug mga higala, kinahanglang molubong sa matahom nakong inahan, si Eudie (YOU-dee) Charnes. Ang akong kasingkasing nasakitan, nagbangotan, ug hilabihan ka haw-ang nga dili masabot. Ang katahom ni Eudie, ang katahom nga mao si Eudie, sa yano ug sa masulob-on nga paagi, wala na. Wala na siya sa akong atubangan aron makuptan, magakos, o maamumahan—maatiman, kantahan, mahilakan, o ikauban sa pag-ampo. Ang kinabuhi ug kahayag nga naghatag nako og kinabuhi namatay na, ang iyang pagkabulahan nahanaw ug nawala na. Ug ingon man usab ang usa ka bahin kanako namatay usab kauban niya, usa ka bahin sa kinahiladman, nagbilin kanako og kahaw-ang sa kahangtoran. Uban sa grasya siya namatay, gihangop pinaagi sa hugot nga pagtuo, gigakos sa mahigugmaong mga bukton sa iyang pamilya: sa akong asawa, si Sarah; sa among anak nga babaye, si Yael; ug nako, iyang bag-ong nailo nga anak.
Anaa kaming tanan, apan hingpit nga nag-inusara—matag usa nag-inusara sa among indibidwal nga pagkanawad-an, apan naghiusa sa among gisaw-an nga kawad-an. Ug kanang talandogon nga pagkahiusa nga among gisaw-an sa usag usa gitabangan ug gani usahay gipahugtan, pinaagi sa kamabination ug presensya sa duha ka buhi nga mga bahandi sa komunidad sa mga Santos sa Ulahing mga Adlaw: si Brother Mike Law ug ang iyang mahangtoron nga celestial nga kapikas, si Sister Debbie Law, sa Colorado, USA. Ang ilang mapainubsanong mga kasingkasing napuno sa gugma nga mahulagway lamang isip dinasig gikan sa kahitas-an, ug mapasalamaton kami sa kahangtoran sa kahayag sa ilang presensya sa pag-uban kanamo atol sa among paglakaw latas sa kangitngit ug kawalay paglaom sa kamatayon.
Atol kadto niining higayona, duha ka adlaw pa lamang human sa paglubong sa akong inahan, nga ang akong desperado nga pangaliyupo alang sa bulahan gitubag—gitubag pinaagi sa yano nga tawag sa telepono ug tanyag gikan sa akong pinangga nga higala nga si Brother Mike Law. Siya mitabang na usab, sama sa gihimo kanunay, sa pagtan-aw kon kumusta na ang akong kahimtang ug sitwasyon, nga nawad-an subay niining taas ug masulob-on nga panaw sa kasakitan.
Samtang nag-istoryahanay kami, nakamatikod ko nga nausab ang tono sa tingog ni Mike nga ingon og dili segurado nangutana siya nako: “Joe, kahibalo ko nga ang tubag tingali moingon ka nga dili, apan ganahan ka ba moadto sa kinatibuk-ang komperensiya, kon makakuha ko og mga tiket?” Ang akong tubag yano, dali, direkta, ug kalit: “Mike, sa pagkatinuod wala koy lain pang dapit nga ganahang adtoan.”
Mao kadto ang akong mga pulong, mga higala; mao kadto ang akong mga pulong—mga pulong nga nalitok sa sinsero nga paagi. Nakahibalo lang gyod ko nga ang kinatibuk-ang komperensiya mahimong mao ang higayon nga gigahin sa mabinationg pagdasig alang sa akong kasingkasing. Ako nasayod sa madagayaon nga mga bukton sa dinasig nga kasingkasing sa matag Santos sa Ulahing mga Adlaw nga sa walay kondisyon gitunol ug nagtunol pinaagi sa gugma—nga ang mga bukton sa ilang mahigugmaong mga kasingkasing dili gayod mapakyas.
Diha sa kinatibuk-ang komperensiya, ang mga tawo kinasingkasing nga nagpahiyom. Kinasingkasing sila nga nag-ingon og kumusta, ug kinasingkasing nga nagmadasigon. Adunay dili malitok nga pinulongan nga anaa sa kasingkasing. Ang ilang presensya nagpakita og pangumusta. Ang pagkaanaa lang gani didto nagpakita na og pangumusta. Ang pagkaanaa lang gani didto gihangop.
Kana mao ang tambal nga gikinahanglan sa akong nagngutngot nga kalag—kanang modulot sa kasingkasing nga tambal sa kamabination diha sa kinatibuk-ang komperensiya. Mao nga ang kinatibuk-ang komperensiya mao kanang tinuod nga makaayo nga tambal sa Gilead nga gikinahanglan sa akong kalag.
Ug kini ang kinatibuk-ang kamatuoran sa inyong dakong pagtuo. Ang maalamon, mahigugmaon, maamumahon nga kamabination mao ang tema sa pagserbisyo sa komunidad sa mga Santos sa Ulahing mga Adlaw; kini makahuloganon nga timailhan ug kabilin sa inyong hugot nga pagtuo. Kon ang karaang panultihon tinuod nga “ang kinatas-an nga matang sa kaalam mao ang kamabination,” niana ang kinatibuk-ang komperensiya sa pagkatinuod mao ang pundokanan sa pipila sa labing maalamon nga mga tawo sa planeta.
Kamo mao ang “kahayag sa mga nasod,” ug kahayag sa akong kasingkasing. Panalanginan ka, Mike, sa pagsunod sa mga pag-aghat sa imong kasingkasing. Ang imong debosyon sa pagtabang nako nga mabalik ang kalinaw sa kahiladman adunay langitnong choir sa kahitas-an nga nanag-awit, “Maayo! Buotan ka ug matinumanon nga sulugoon” (Mateo 25:23).
Ang himaya sa kinatibuk-ang komperensiya nagpadayon uban sa mga himno sa kaalam. Ug akong klarohon mga himno sa kaalam, dili lang himno sa katahom. Ang tanang himno mga binuhat sa halangdong balak ug melodiya nga makapadasig sa atong mga kalag sa pagsuhid, diha ug pinaagi sa awit. Apan ang mga himno mao usab ang tinuoray nga halawom nga mga paghinuklog, nga sa kanunay kinahanglang kinasingkasing nga pamalandongan ug iampo. Ang mga pulong niini gitumong aron magiyahan ang atong mga kinabuhi, aron mahimong atong sanglitanan kon unsa ang kaalam, kabalaan ug Pagkabalaanon. Gikan sa himaya sa himno sa kaalam, kita mopaingon ngadto sa himaya sa kaalam mismo, samtang ang mga Santos ug ang mga maalamon karon naghiusa atubangan sa tanan aron sa paglamdag sa atong kinabuhi og tinuod nga panawagan gikan sa kinahiladman sa kalag. Diha sa unsay mahulagway lamang isip mga serye sa mga halad sa kalaam, mga lalaki ug mga babaye nga adunay kaalam ug maayong kasingkasing naghatag sa katawhan og maanindot nga talan-awon sa sagrado, nagtanyag ug nagpakita sa uniberso sa tinuod nga kahayag.
Diha sa mas taas nga artikulo, “General Reflections: A Rabbi’s Meditation on General Conference,” akong gipakigbahin ang pipila sa mga mensahe nga nakapatandog nako, nga gisundan sa akong kaugalingong mga komentaryo sa pipila niadtong balaan nga mga highlight.
Ako mobilin ninyo karon, mga higala, og usa ka kataposang halad sa himaya. Naglakip kini sa usa ka buotan nga sister ug estudyante sa Brigham Young University (BYU) nga mipanalangin nako og mga pulong sa pasalamat gikan sa kinahiladman. Balik-balikon ug pamalandongan nako kanunay ang iyang mga pulong.
Sa maanindot nga Lunes human sa kinatibuk-ang komperensiya, aduna koy kahigayonan sa pagbisita sa klase ni Professor David Seely sa karaang Israel sa BYU–Provo. Human sa pangbukas nga pag-ampo aron matabangan nga maabli ang among kasingkasing sa langitnon, sa ibabaw ug sa kinahiladman, gisugdan namo ang klase pinaagi sa pagpakigbahin sa among mga hunahuna bahin sa kinatibuk-ang komperensiya ug sa makaamuma nga gasa nga nahatag niini. Human sa pagpakigbahin sa pipila sa akong personal nga mga pamalandong sa pagsinati sa balaanong mga gutlo, ang among buotan nga sister nga Santos sa Ulahing mga Adlaw mitubag, “Salamat sa pagpahinumdom nako sa katahom sa akong hugot nga pagtuo.” Hangtod karong adlawa, ang iyang mga pulong nagbalikbalik gihapon.
Kanimo, minahal nga sister, kansang ngalan wala ko makaila, ug sa tibuok komunidad sa mga Santos sa Ulahing mga Adlaw, tugoti nga moingon usab ko nga salamat kaninyo. Salamat sa katahom sa inyong hugot nga pagtuo. Salamat sa pagpahinumdom nako sa katahom sa hugot nga pagtuo. Salamat sa pagpahinumdom ug pagdasig nako nga magpakabuhi ug mopahayag sa akong hugot nga pagtuo sa mas matahom nga paagi. Salamat sa pagpahinumdom nako sa matahom nga potensiyal nga mahimong bunga ug bulak sa hugot nga pagtuo. Ang inyong hugot nga pagtuo sa pagkatinuod mao ang “kahayag sa mga nasod” ug ang hayag nga bituon nga nagsidlak sa akong kasingkasing.
Ang inyong paagi usa ka paagi sa melodiya, ug usa ka paagi nga adunay grasya sa melodiya. Mao kini ang melodiya nga nagdasig sa matinud-anong mga sumusunod niini sa pagpuyo sa kinabuhi sa pagserbisyo, nga adunay gugma sa pagserbisyo, diha sa mahigugmaong pagserbisyo ngadto sa tanan. Mao kana ang inyong gasa, mao kana ang inyong panalangin, ug mao kana ang inyong Santos sa Ulahing mga Adlaw nga himaya.
Ang kinatibuk-ang komperensiya usa ka Kinatibuk-ang Himaya. Ako mopanalangin ninyo sa tanan nga inyong buhaton, samtang kamo “[Mo]lakaw uban ang Hugot nga Pagtuo.”1 “Ang Dios Magauban [Kaninyo].”2
Shalom.