Mga Disipulo ni Jesukristo sa Simbahan ug sa Komunidad

Isip mga miyembro sa Simbahan, atong pribilehiyo ug atong katungdanan nga “mobarog ingon nga mga saksi sa Dios sa tanan nga mga panahon ug diha sa tanan nga mga butang” (Mosiah 18:9). Sa pahina 4 niini nga isyu, si Elder Ronald A. Rasband sa Korum sa Napulog Duha ka Apostoles nagtudlo nga ang pagbarog isip mga saksi ni Jesukristo ngadto niadtong naglibot kanato makahimo og kalainan sa atong mga komunidad. Sa pahina 16, ako mopasabot nga kita makatuman usab niining responsibilidad sa paagi sa atong pagpamatuod ni Jesukristo ug sa pagkatinuod sa Iyang gipahiuli nga Simbahan ngadto sa uban nga mga miyembro.

Kita makahatag og pagsaksi nga masaligon sa kamatuoran sa gipahiuli nga Simbahan sa Ginoo ug sa mga lider niini samtang kita moila nga wala kinahanglana nga perpekto ang Simbahan, mga lider niini, o ang mga miyembro niini aron ang Simbahan mahimong tinuod. Sa pagkatinuod, ang Ginoo namahayag nga ang Iyang katuyoan mao “[ang] pagsangkap sa mga balaan” (Mga Taga-Efeso 4:12). Ang Simbahan mohangop sa dili hingpit apan naningkamot nga mga anak sa Ginoo. Pinaagi sa mga pagtulon-an, mga ordinansa, mga pakigsaad, ug sa Pag-ula ni Jesukristo, ang Simbahan makatabang kanato hangtod “makakab-ot kitang tanan ngadto sa pagkahiniusa sa pagtuo ug sa kahibalo mahitungod sa Anak sa Dios, ug ngadto sa kahamtong sa pagkatawo” (Mga Taga-Efeso 4:13), diin dili gayod nato hingpit nga makab-ot niining kinabuhia.

Ako mopamatuod nga Ang Simbahan ni Jesukristo sa mga Santos sa Ulahing mga Adlaw gipangulohan mismo ni Ginoong Jesukristo pinaagi sa buhi nga mga propeta ug apostoles; nga kadtong kinsa nakadawat sa mga ordinansa sa kaluwasan ug kahimayaan ug nagtuman sa nag-uban nga mga pakigsaad mahimaya gayod sa celestial nga gingharian sa Dios; ug nga ang Espiritu Santo mopamatuod niining mga butanga ngadto sa sinsero nga mga tigpangita sa kamatuoran.

Matinuoron,

Elder J. Devn Cornish

Emeritus nga Kinatibuk-ang Awtoridad nga Seventy