“Kita Gitawag sa Pagbuhat og Maayo,” Liahona, Hunyo 2024.
Kita Gitawag sa Pagbuhat og Maayo
Kita nagtukod sa gingharian sa Dios kon kita moserbisyo sa uban, mopakita sa atong kahayag, ug mobarog alang sa kagawasan sa relihiyon.
Si Gideon nasayod sa sayop nga doktrina sa dihang siya nakadungog niini. Siya nakadungog na niini kaniadto gikan ni Hari Noah ug sa iyang mga pari—mga pari kinsa “gibayaw sa garbo sa ilang mga kasingkasing” ug kinsa “gibuhi diha sa ilang pagkatapolan, ug diha sa ilang pagsimba sa mga dios-dios, ug diha sa ilang mga malaw-ay nga buhat, pinaagi sa mga buhis nga gipahamtang ni hari Noah sa iyang mga katawhan” (Mosiah 11:5–6).
Gisamotan pa, nga gipahamtangan ni Hari Noah si propeta Abinadi sa kamatayon ug nagtinguha sa paglaglag ni Alma ug sa iyang mga kinabig (tan-awa sa Mosiah 17; 18:33–34). Sa pagtapos sa maong pagkadaotan, si Gideon nanumpa sa pagpakgang sa hari, kinsa iyang giluwas lang tungod sa pagsulong sa mga Lamanita (tan-awa sa Mosiah 19:4–8).
Sa kadugayan, si Gideon tukma nga mibasol sa mga pari ni Noah tungod sa pagdagit sa 24 ka mga anak nga mga babaye nga Lamanita. Iyang nakita nga ang gipanagna ni Abinadi batok sa katawhan natuman tungod kay sila midumili sa paghinulsol. (Tan-awa sa Mosiah 20:17–22.) Siya mitabang sa pagtubos sa katawhan ni Limhi, kinsa nabihag ngadto sa mga Lamanita (tan-awa sa Mosiah 22:3–9).
Karon nga mas tigulang na, si Gideon nakigharong sa garbo ug pagkadaotan sa makausa pa samtang siya mibarog atubangan ni Nehor, kinsa mipasiugda sa pagpanapi taliwala sa katawhan. Si Nehor “nakigbatok sa simbahan” ug naningkamot sa pagpahisalaag sa katawhan. (Tan-awa sa Alma 1:3, 7, 12; tan-awa usab sa 2 Nephi 26:29.)
Gamit ang pulong sa Dios isip iyang hinagiban, ang maisog nga si Gideon mipahimangno ni Nehor sa iyang pagkadaotan. Sa kasuko, miatake si Nehor ug mipatay ni Gideon gamit ang iyang espada. (Tan-awa sa Alma 1:7–9.) Busa natapos ang panahon sa “usa ka matarong nga tawo” kinsa “nakahimo og daghan nga maayo taliwala niini nga katawhan” (Alma 1:13).
Ang ulahi nga mga adlaw diin kita nagpuyo nagtanyag kanato og mga oportunidad sa pagsunod ni Gideon isip “usa ka himan sa mga kamot sa Dios” (Alma 1:8) pinaagi sa “pag-alagad” (Mosiah 22:4) ngadto sa uban, sa pagbarog alang sa pagkamatarong, ug pag-atubang sa mga hulga sa atong kaluwasan sa pagsimba ug sa pagserbisyo sa Dios. Kon mosunod kita sa matinud-anong ehemplo ni Gideon, makahimo kita og daghan kaayo nga mga kaayohan.
Naghiusa sa Pagserbisyo
“Isip mga sumusunod [sa Manlululwas], kita magtinguha sa paghigugma sa Dios ug sa atong mga silingan sa tibuok kalibotan,” ang Unang Kapangulohan nag-ingon. “Ang Simbahan ni Jesukristo sa mga Santos sa Ulahing mga Adlaw matinguhaon sa pagpanalangin sa uban ug sa pagtabang niadtong nanginahanglan. Kita napanalanginan nga nakabaton og abilidad, mga kapanguhaan, ug kasaligan nga mga koneksiyon sa tibuok kalibotan sa pagtuman niining sagrado nga responsibilidad.”1
Ako mapasalamaton sa walay paghinakog nga pagserbisyo ug pagpangalagad nga gitanyag sa mga miyembro sa Simbahan diha sa atong mga templo ug diha sa ilang mga ward, mga branch, ug mga stake. Ako mapasalamaton usab nga ang mga miyembro sa Simbahan nagserbisyo sa dili na maihap nga komunidad, sa edukasyon, ug sa manggihatagon nga mga organisasyon ug nga sila miapil diha sa liboan ka tinuig nga makitawhanon nga mga proyekto, nagboluntaryo og minilyon ka oras sa dul-an sa 200 ka nasod ug mga teritoryo.2
Usa ka paagi nga ang Simbahan nakapalapad sa mga oportunidad sa pagserbisyo sa pipila ka nasod mao ang pinaagi sa JustServe.org. Gipasiugdahan sa Simbahan apan magamit ngadto ni bisan kinsa nga gustong mopanalangin sa uban, ang JustServe.org “nag-link sa mga boluntaryo sa komunidad uban sa mga boluntaryo” kinsa “mopalambo sa kalidad sa kinabuhi diha sa komunidad.”3
Ang Simbahan ug ang mga miyembro niini makig-alayon usab sa mga organisasyon nga moserbisyo sa tibuok kalibotan. Ang Simbahan, salamat sa mga miyembro niini, “mao lang ang kinadak-ang magtatampo sa pagdonar og dugo sa Red Cross niadtong 2022.” Dugang pa, ang Simbahan sa kasamtangan nakahimo og $8.7 milyones nga donasyon ngadto sa Red Cross.4
Ang Simbahan usab miapil sa mga organisasyon sa pagdala og limpyo nga tubig ug mga proyekto sa pagpanglimpyo ngadto sa mga dapit sa tibuok kalibotan. Niadtong 2022, ang Simbahan nakaapil og 156 sa maong mga proyekto.5 Kita usab nakigtambayayong ug nagdonar ngadto sa laing mga ahensiya nga makadala og kahupayan ngadto sa nag-antos nga mga anak sa Dios.6
“Kon kita moapil sa pagtabang aron sa pagserbisyo sa mga tawo nga anaa sa panginahanglan,” miingon sa Presidente Henry B. Eyring, Ikaduhang Magtatambag sa Unang Kapangulohan, “ang Ginoo mohiusa sa atong mga kasingkasing.”7
Ipakita Ninyo ang Inyong Kahayag
Isip mga disipulo sa Manluluwas, kita usab mopanalangin sa atong mga silingan samtang kita motuman sa atong mga pakigsaad ug mangulo sa Kristohanon nga mga kinabuhi. Ang Basahon ni Mormon nagtudlo nga “ang katawhan sa simbahan” dili lang mopili sa pagkamatarong apan mohimo gayod sa ilang matarong nga mga tingog nga madungog kon sila gusto nga ang Ginoo manalipod ug mopauswag kanila (tan-awa sa Alma 2:3–7; tan-awa usab sa Mosiah 29:27). Ang Ginoo naglaom kanato nga mopakigbahin sa atong hugot nga pagtuo ug mga gituohan ug mopakita sa atong kahayag. “Tan-awa Ako mao ang kahayag diin kamo mopakita” (3 Nephi 18:24).
“Dili kaayo kita makaserbisyo sa atong Manluluwas kon mas nahadlok kita sa tawo kay sa Dios,” miingon si Presidente Dallin H. Oaks, Unang Magtatambag sa Unang Kapangulohan. Siya midugang, “Kita gitawag aron sa pag-establisar sa mga sumbanan sa Ginoo, dili aron mosunod sa sumbanan sa kalibotan.”8
Maanaa man sa eskwelahan, sa trabaho, o sa dula, sa bakasyon, sa usa ka date, o sa internet, ang mga disipulo sa Ginoo dili “maulaw sa pagdala nganha kanila sa ngalan ni Kristo” (Alma 46:21). Pinaagi sa atong mga pulong ug sa atong mga buhat, kita nagsaksi nga ang Dios buhi ug nga kita nagsunod sa Iyang Anak.
“Ang atong hugot nga pagtuo wala gibahin-bahin, o sigurado nga kini dili mahimong mabahin-bahin. Ang hugot nga pagtuo dili lang alang sa simbahan, dili lang kini alang sa panimalay, dili lang kini alang sa [eskwelahan],” matod pa ni Paul Lambert, usa ka Santos sa Ulahing mga Adlaw nga batid sa relihiyosong pluralismo. “Kini alang sa tanang butang nga inyong buhaton.”9
Kita wala masayod sa mahimong epekto sa atong pagpamatuod, maayong ehemplo, ug maayong binuhatan ngadto sa uban. Apan kon kita mobarog alang sa matarong ug mopakita sa kahayag sa Manluluwas, ang mga tawo makamatngon kanato ug mosuporta kanato.
Mobarog alang sa Kagawasan sa Relihiyon
Ang pagpanapi sa panahon karon, uban sa nagkadaghan nga sekular nga katilingban nga nakigbatok sa katawhan nga adunay hugot nga pagtuo, wala ray kalahian kon itandi nianang kapanahonan sa Basahon ni Mormon. Ang tingog niadtong kinsa supak sa mahinungdanong tahas sa relihiyon diha sa publiko ug sa politikanhong mga nataran nagkakusog. Ang mga sekularista ug mga gobyerno, lakip na ang daghang eskwelahan ug mga unibersidad, nagpugos og mga gawi ug nagtudlo og imoralidad, ateyismo [atheism], ug walay hingpit nga baroganan sa katarong [moral relativism].
Ang mga pag-atake sa kagawasan sa relihiyon magmalamposon kon kita dili mobarog alang sa atong mga katungod sa relihiyon. “Isip usa ka simbahan,” ako sa kasamtangan nagtudlo, “kita miapil sa ubang mga relihiyon nga nagpanalipod sa mga tawo sa tanang relihiyon ug tinuohan ug sa ilang katungod nga ipahayag ang ilang mga lig-on nga pagtuo.”10
Usa ka gubat sa langit nahitabo tungod sa moral nga kabubut-on—ang atong kagawasan sa pagpili. Aron mapreserbar ang atong kabubut-on gikinahanglan nga kita magmakugihon sa pagpanalipod sa atong kagawasan sa relihiyon.
Ang madasigon nga pagtuo sa relihiyon maglig-on ug manalipod sa mga pamilya, mga komunidad, ug mga nasod. Kini mosangpot ngadto sa pagsunod sa balaod, motisok og pagtahod alang sa kinabuhi ug kabtangan, ug magtudlo og gugmang putli, kamatinuoron, ug moralidad—mga hiyas nga gikinahanglan aron mapadayon ang makiangayon, gawasnon, ug sibil nga katilingban. Kita kinahanglan dili gayod mangayo og pasensya alang sa atong hugot nga pagtuo.
Ang atong misyonaryo nga mga paningkamot, ang atong mga buhat para sa uban diha sa mga templo, ang atong mga paningkamot sa pagtukod sa gingharian sa Dios, ug ang atong kalipay mismo nanginahanglan nga atong barogan ang atong kagawasan sa relihiyon ug pagtuo. Kita dili mahimong mawad-an niana nga kagawasan nga dili mawad-an sa uban nga mga kagawasan.
Si Propeta Joseph Smith nagtudlo, “Kini mao ang gugma sa kagawasan nga nagdasig sa akong kalag—sibil ug relihiyosong kagawasan sa tibuok katawhan.”11 Ang relihiyoso nga kagawasan makapadasig usab sa atong mga kalag kon kita mosunod sa tambag gikan sa mga lider sa Simbahan:
-
“Magpabilin nga magpakisayod mahitungod sa mga isyu nga may importansiya sa publiko, ug dayon mamulong uban sa kaisog ug pagkamatinahoron.”12
-
“Ilha nga ang pagkadaot sa kagawasan sa relihiyon adunay dakong epekto sa atong mga oportunidad sa paglambo diha sa kalig-on ug sa kahibalo sa ebanghelyo, aron mahimong mabulahan pinaagi sa sagrado nga mga ordinansa, ug aron mosalig sa Ginoo sa paggiya sa Iyang Simbahan.”13
-
“Barog ug sulti sa pagmatuod nga ang Dios buhi ug nga adunay bug-os nga mga kamatuoran sa Iyang mga sugo.”14
-
“Hagita ang mga balaod nga mobalda sa atong kagawasan sa pagbuhat sa atong mga gituohan.”15
-
“Lakaw sa kalibotan aron sa pagbuhat og maayo, sa pagtukod og hugot nga pagtuo sa Labawng Makagagahom nga Dios, ug sa pagtabang sa uban ngadto sa usa ka mas malipayon nga dapit.”16
-
Tun-i ang mga kapanguhaan diha sa religiousfreedom.ChurchofJesusChrist.org ug sa religiousfreedomlibrary.org/documents.
Kita nagtukod sa gingharian sa Dios samtang kita moserbisyo sa uban, mopakita sa atong kahayag, ug mobarog alang sa kagawasan sa relihiyon. Hinaot ang Ginoo mopanalangin kanato sa atong mga paningkamot sa pagbuhat og “daghan nga maayo” taliwala sa atong mga pamilya, mga komunidad, ug mga nasod.